სავიზო რეჟიმი რუსეთთან - კანონპროექტი საქართველოს პარლამენტში უკვე ინიცირებულია
სავიზო რეჟიმი რუსეთთან
საქართველოს პარლამენტში უკვე ინიცირებულია კანონპროექტი, რომელიც რუსეთის მოქალაქეებისთვის სავიზო რეჟიმის შემოღებას ითვალისწინებს.
კანონპროექტი ოპოზიციური პარტია “ლელოს დეპუტატებმა” – ანა ნაცვლიშვილმა, დავით უსუფაშვილმა, შალვა შავგულიძემ და სალომე სამადაშვილმა წარადგინეს.
ამჟამად მოქმედი წესით, რუსეთის ფედერაციის მოქალაქეებს შეუძლიათ საქართველოში შემოვიდნენ უვიზოდ, საზღვარგარეთის პასპორტით და დარჩნენ ერთი წლის განმავლობაში.
კანონპროექტის ავტორებს მიაჩნიათ, რომ უკრაინაში ომის დაწყების შემდეგ რუსეთის მოქალაქეების მასობრივი შემოსვლა საქართველოში საზიანოა ქვეყნის უსაფრთხოებისთვის, ამიტომ წესები უნდა გამკაცრდეს.
თუკი, პარლამენტი აღნიშნულ ინიციატივას დაეთანხმება, რუსეთის მოქალაქეებისთვის საქართველოში შძემოსვლის წესები მნიშვნელოვნად შეიცვლება.
რა წერია კანონპროექტში:
● რუსეთის მოქალაქეებისთვის ტურისტული ვიზის (C1 და C2 კატეგორიის) აღება შესაძლებელი იქნება მხოლოდ საქართველოს სახელმწიფო საზღვარზე არსებულ საერთაშორისო მიმოსვლისათვის გახსნილ სასაზღვრო გამტარ პუნქტში.
აღნიშნული წესისგან არსებობს რამდენიმე გამონაკლისი:
● სავიზო რეჟიმი არ შეეხება იმ პირებს, რომლებიც ამჟამად რუსეთის ფედერაციის მოქალაქეობას ფლობენ, თუმცა ადრე საქართველოს მოქალაქეობა ჰქონდათ და გავიდნენ მოქალაქეობიდან ან დაკარგეს იგი.
● ასევე, სავიზო რეგულაციისგან თავისუფალი იქნებიან რუსეთის მოქალაქეები, რომლებსაც მანამდე არ ჰქონდათ საქართველოს მოქალაქეობა, მაგრამ არიან საქართველოს მოქალაქის ოჯახის წევრები ან ნათესავები (მეუღლე, შვილი, მშობელი, და, ძმა, ბაბუა, ბებია, შვილიშვილი).
● ამასთან, ცვლილებები ითვალისწინებს გამონაკლის შემთხვევებს იმ პირებისთვის, რომლებსაც აქვთ „განსაკუთრებული კავშირი საქართველოსთან“.
სხვა პირობები ვიზის ასაღებად:
● პროექტით, რუსეთის ფედერაციის მოქალაქემ საქართველოში შემოსვლამდე წერილობით უნდა დაადასტუროს, რომ აღიარებს საქართველოს ტერიტორიულ მთლიანობას და რომ აფხაზეთი და სამხრეთ ოსეთი საქართველოს ტერიტორიებია, რომლებიც ოკუპირებულია რუსეთის მიერ. პროექტის ავტორები აცხადებენ, რომ ამგვარად აღკვეთენ ქვეყანაში იმ პირთა შემოსვლას, ვისთვისაც პუტინის რეჟიმი არ არის აგრესორი და ვისთვისაც პრობლემურია საკუთარი ქვეყნის აგრესორ სახელმწიფოდ აღიარება და საქართველოს ტერიტორიული მთლიანობის პატივისცემის გამოხატვა.
● კიდევ ერთი შეზღუდვა შეეხება უკრაინაში რუსული აგრესიის სიმბოლოდ ქცეული ლათინური ასოების Z-ისა და V-ს გრაფიკულ გამოსახვას. საქართველოში შემოსვლაზე უარი ეთქმება პირს, რომლის კუთვნილ ნივთებზე ან სატრანსპორტო საშუალებაზე გამოსახული იქნება აღნიშნული არასამშვიდობო სიმბოლიკა.
რატომაა აუცილებელი სავიზო რეჟიმის შემოღება
განმარტებით ბარათში, რომელიც კანონპროექტს ერთვის, აღნიშნულია, რომ მთავარი მიზეზი ქვეყნის უსაფრთხოებაა.
“2022 წელს, წინა წლის შესაბამის პერიოდთან შედარებით, საქართველოში ბინადრობის უფლების მისაღებად რუსეთის ფედერაციის მოქალაქეების მიმართვიანობა 54%-ით არის გაზრდილი. 2022 წლის 21 სექტემბერს, რუსეთის ფედერაციის პრეზიდენტის მიერ გამოცხადებული “ნაწილობრივი მობილიზაცია“ დამატებითი იმპულსი აღმოჩნდა რუსეთის ფედერაციის უამრავი მოქალაქისთვის, შემოსულიყვნენ საქართველოში,” – ვკითხულობთ დოკუმენტში.
აქ ასევე მოყვანილია კობნკრეტული ციფრები: მობილიზაციის გამოცხადებიდან სულ რამდენიმედღიან მონაკვეთში, 21-26 სექტემბრის პერიოდში საქართველოში შემოვიდა რუსეთის ფედერაციის 53 136 მოქალაქე, ხოლო გავიდა 34 990.
“სხვაობა ქვეყნიდან გამსვლელ და შემომსვლელ პირთა შორის მკვეთრად გაიზარდა, ფრაც დროულ რეაგირებას საჭიროებს“, – ვკითხულობთ პროექტის განმარტებით ბარათში.
რუსეთის ფედერაციასთან სავიზო რეჟიმის შემოღების მოთხოვნით საქართველოში არაერთი საპროტესტო აქციაც გაიმართა. ეს თემა განსაკუთრებით აქტუალური რუსეთში ნაწილობრივი მობილიზაციის გამოცხადების შემდეგ გახდა, როდესაც ქვეყანაში ერთდროულად რამდენიმე ათასი რუსეთის მოქალაქე შემოვიდა. „დაკეტე საზღვარი” – ასე ერქვა ერთ-ერთ ბოლო აქციას, რომელიც თბილისში, პარლამენტის წინ გაიმართა.
რაც შეეხება საქართველოს ხელისუფლების პოზიციას, “ქართული ოცნების” წარმომადგენლებმა არაერთხელ აღნიშნეს, რომ არ უჭერენ მხარს რუსეთთან სავიზო რეჟიმის შემოღებას. მმართველი გუნდის თავმჯდომარე “ირაციონალურს” უწოდებს ამ ნაბიჯს.
