სასტუმროები აზერბაიჯანში: შეხვედრების ადგილი მხოლოდ ოჯახური წყვილებისთვის?

კორონავირუსის პანდემიის გამო გამოცხადებულმა კარანტინმა აზერბაიჯანულ სასტუმროებში ცვლილებები, ზოგჯერ კი ძალიან მკაცრი წესები შეიტანა. ზოგიერთ მათგანში ნომრები მიზერულ ფასად ქირავდება. მაგრამ არის ისეთი დასვენების ადგილებიც, რომლებიც არავითარ შემთხვევაში არ აპირებენ პირობების შემსუბუქებას. JAMnews-ი ვითარებაში გარკვევას შეეცადა.

ტურისტების გარეშე

კორონავირუსის პანდემიის გამო გამოცხადებულმა კარანტინმა და საზღვრების ჩაკეტვამ დიდი გავლენა მოახდინა ტურისტულ ნაკადებზე აზერბაიჯანში.

სახელმწიფო სასაზღვრო სამსახურის მონაცემების თანახმად, 2020 წლის პირველი ათი თვის განმავლობაში, ქვეყანაში, მსოფლიო 155 ქვეყნიდან, დაახლოებით, 670 ათასი ადამიანი ჩამოვიდა. ეს გასული წლის ანალოგიურ მონაცემებთან შედარებით 3.5-ჯერ ნაკლებია.

უნდა აღინიშნოს, რომ ტურისტების მითითებული რაოდენობიდან უდიდესი ნაწილი აზერბაიჯანში, 2020 წლის პირველი თვეების განმავლობაში ჩავიდა, როდესაც საკარანტინო ზომები ჯერ კიდევ არ იყო ძალიან მკაცრი.

სასტუმროები გადარჩენას ცდილობენ

ქვეყანაში ტურისტული ნაკადების მკვეთრი შემცირების გამო, სასტუმროები ძალიან რთულ ვითარებაში აღმოჩნდნენ.

„ვიზიტორები არ გვყავს. რასაც ჰქვია, საერთოდ არ გვყავს. კარანტინის პირველ თვეებში , რაღაცნაირად მაინც ვახერხებდი თანამშრომლებისთვის ხელფასის გადახდას. შემდეგ კი ბევრის უხელფასო შვებულებაში გაშვება მომიწია. მაგრამ მაინც მიწევს რამდენიმე თანამშრომლის დატოვება, სასტუმრომ ნორმალური სახე რომ შეინარჩუნოს.

კრედიტი ავიღე, რათა დარჩენილ თანამშრომლებს ხელფასი გადავუხადო, სავალდებულო გადასახადები დავფარო. მაგრამ ასე დიდხანს ვერ გავძლებ“, – ამბობს JAMnews-სთან საუბრისას ბაქოს ცენტრში განლაგებული ერთ-ერთი სასტუმროს მეპატრონე.

20 მანათი დღე-ღამეში

გააცნობიერეს რა, რომ შექმნილ ვითარებაში ტურისტების ლოდინი დიდხანს მოუწევდათ, ბაქოში ზოგიერთი სასტუმრო ადგილობრივებზე გადაერთო.

მაგალითად, ბაქოს რკინიგზის სადგურთან მდებარე ერთ-ერთი სასტუმროს ეკონომ-ნომრის ფასი დღე-ღამეში სულ რაღაც 20 მანათს (11.76$) შეადგენს.

ასეთი ნომრების რეკლამა თავად მეტყველებს ყველაფერზე: ნომერს სთავაზობენ შეყვარებულ წყვილებს, რომლებსაც ოთახი განმარტოებისთვის ესაჭიროებათ.

ქორწინების მოწმობის გარეშე არ შეიძლება

აზერბაიჯანში ისეთი დასვენების ადგილებიც არის, რომლებიც კარანტინის პერიოდშიც კი არ ამსუბუქებენ პირობებს ვიზიტორებისთვის. მათი თანამშრომლების განცხადებით, ამით ეს ობიექტები ცდილობენ შეინარჩუნონ თავიანთი იმიჯი, როგორც „ოჯახური დასვენების ადგილისა“.

„დავრეკე შემახაში (ბაქოდან 120 კილომეტრში მდებარეობს), ერთ-ერთ რესტორანში, რათა მეგობართან ერთად სასადილოდ მაგიდა დამეჯავშნა. თანამშრომელმა მაშინვე მკითხა: შეგიძლიათ ქორწინების მოწმობა წარმოგვიდგინოთ?

ვუთხარი, რომ ნომრის აღებას არ ვაპირებ, მხოლოდ სადილისთვის მივდივართ. მიპასუხეს, რომ ქორწინების მოწმობა აუცილებელია, თუკი აქ აპირებთ სადილის მირთმევას, წინააღმდეგ შემთხვევაში, უარი უნდა გითხრათ.

ეს რას ნიშნავს? ვინმეს შეუძლია, ამიხსნას?“, – დაწერა სოციალური ქსელის აზერბაიჯანული სეგმენტის ერთ-ერთმა მომხმარებელმა.

ექსპერტის კომენტარი

ეკონომიკის ექსპერტის, ალი ახმედოვის თქმით, აზერბაიჯანის კულტურისა და ტურიზმის სამინისტრომ არაერთხელ განაცხადა იმის შესახებ, რომ მათ სასტუმროებსა და დასვენების სხვა ადგილებს ურჩიეს, არ მოითხოვონ ვიზიტორებისგან დამატებითი დოკუმენტები.

„მაგრამ სამინისტროს მხოლოდ რეკომენდაციის გაცემა შეუძლია, კერძო ბიზნესი კი თავად წყვეტს შიდაპოლიტიკურ საკითხებს. სხვა სიტყვებით რომ ვთქვათ, სასტუმროებსა და დასვენების სხვა ადგილებს შეუძლიათ მოითხოვონ ვიზიტორებისგან ქორწინების მოწმობა. საბედნიეროდ, ამ დროისთვის ძალიან დიდი არჩევანია და მსურველებს ადვილად შეუძლიათ მოძებნონ სასტუმროები და დასვენების ადგილები, სადაც უფრო მოქნილი წესებია“, – აღნიშნა ექსპერტმა JAMnews-ისთვის მიცემულ კომენტარში.