საერთაშორისო სასამართლომ არ დააკმაყოფილა ხაზარაძის სარჩელი ანაკლიაზე
სარჩელი ანაკლიის პორტზე
საერთაშორისო საარბიტრაჟო სასამართლომ არ დააკმაყოფილა “ანაკლიის განვითარების კონსორციუმის სარჩელი” საქართველოს მთავრობის წინააღმდეგ. კონსორციუმის განცხადებაში ნათქვამია, რომ საარბიტრაჟო გადაწყვეტილებასთან და საარბიტრაჟო პროცესთან დაკავშირებული დეტალები კონფიდენციალურია.
„საარბიტრაჟო სასამართლოს მიერ მიღებული გადაწყვეტილება სამწუხაროა – ჩვენ კვლავ გვჯერა, რომ საქართველოს მთავრობა მოიქცა უკანონოდ, საქართველოს მოქალაქეების ინტერესების საზიანოდ, როდესაც სცადა ზიანი მიაყენა ანაკლიის პორტის პროექტს, რამაც გამოიწვია პორტის პროექტის თითქმის ათწლეულით გაჭიანურება და ათასობით სამუშაო ადგილის და შემოსავლის დაკარგვა“, – აცხადებენ „ანაკლიის განვითარების კონსორციუმში“, კომპანიაში, რომელსაც წლების წინ ანაკლიაში ღრმაწყლოვანი პორტი უნდა აეშენებინა.
ანაკლიის განვითარების კონსორციუმის დამფუძნებელმა მამუკა ხაზარაძემ 29 ივლისს ფეისბუქზე დაწერა, რომ საერთაშორისო საარბიტრაჟო სასამართლომ გამოაცხადა გადაწყვეტილება 2020 წელს შეტანილ სარჩელზე, რომელიც მან და კონსორციუმის კიდევ ერთმა დამფუძნებელმა ,ბადრი ჯაფარიძემ სხვა უცხოელებთან ერთად შეიტანეს.
„სასამართლოს მიერ მიღებული გადაწყვეტილება გულდასაწყვეტია“, – დაწერა ხაზარაძემ ფეისბუკზე.
ხელისუფლება საარბიტრაჟო სასამართლოს გადაწყვეტილებას არა მარტო სამართლებრივ, არამედ მნიშვნელოვან პოლიტიკურ გამარჯვებად მიიჩნევს.
საქართველოს ხელისუფლების წარმომადგენლები ოპოზიციური პარტია „ლელოს“ ლიდერს, მამუკა ხაზარაძეს და მის პარტნიორებს პოლიტიკურ თაღლითობაში ადანაშაულებენ და 26 ოქტომბრის საპარლამენტო არჩევნებში დამარცხებას უწინასწარმეტყველებენ.
29 ივლისს საქართველოს პრემიერ-მინისტრმა ირაკლი კობახიძემ ტელეკომპანია იმედის ეთერში საერთაშორისო საარბიტრაჟო სასამართლოს გადაწყვეტილებაზე კომენტარი გააკეთა.
„სიმართლე დაადგინა საერთაშორისო არბიტრაჟმა, სადაც თავიდან ბოლომდე გამტყუნდა, რა თქმა უნდა, ხაზარაძე-ჯაფარიძის მხარე, იმ მარტივი მიზეზის გამო, რომ მათ ჩააგდეს პროექტი, ვერ მოახერხეს ინვესტორების მოზიდვა. შეგახსენებთ, ინვესტორებს ეძებდნენ ყველგან, როგორც დასავლეთში, ისე აღმოსავლეთში, ასევე – ჩრდილოეთში, თუმცა ვერსად მოახერხეს ინვესტორის მოზიდვა. აქედან გამომდინარე, რეალურად მათი ბრალია ამ საქმის წაგება და სახელმწიფო ამ საქმეში აბსოლუტურად პირნათელია“, – თქვა ირაკლი კობახიძემ.
იმის გამო, რომ ორივე მხარე განაჩენის მხოლოდ იმ ნაწილებს ასაჯაროებს, რომლებიც მათ აწყობთ, რთულია კონკრეტული დასკვნების გაკეთება, ამბობს ექსპერტი გია ხუხაშვილი. ის არ აყენებს ეჭვქვეშ საერთაშორისო საარბიტრაჟო სასამართლოს გადაწყვეტილების სამართლიანობას, თუმცა ამბობს, რომ პარიზი ვერ ხედავს “ქართული ოცნების” ფარულ პოლიტიკურ პრიორიტეტებს და მის თავდასხმებს ოპონენტებზე.
2020 წლის დასაწყისში საქართველოს მთავრობის განცხადებით, ის „ანაკლიის განვითარების კონსორციუმთან“ წყვეტდა ღრმაწყლოვანი პორტის მშენებლობის საინვესტიციო ხელშეკრულებას. მიზეზად დასახელდა ის, რომ კონსორციუმმა ვერ შეასრულა ხელშეკრულებით გათვალისწინებული ვალდებულებები. თუმცა, კონსორციუმის ხელმძღვანელობა აცხადებდა, რომ სტრატეგიული პორტის მშენებლობა მიზანმიმართულად ჩაიშალა გეოპოლიტიკური მიზეზებით.
სწორედ ხელშეკრულების ჩაშლის შემდეგ, „ანაკლიის განვითარების კონსორციუმმა“ საქართველოს მთავრობის წინააღმდეგ საარბიტრაჟო სასამართლოს მიმართა.
2024 წლის 29 მაისს საქართველოს მთავრობამ გამოაცხადა, რომ ანაკლიის პორტის 49 პროცენტიან წილს ჩინურ-სინგაპურული კონსორციუმი ჩაიბარებს. კონსორციუმში, რომელთანაც საქართველოს მთავრობა ანაკლიის პორტზე კონტრაქტს უახლოეს მომავალში ოფიციალურად გააფორმებს, შედიან „ჩინეთის კომუნიკაციების მშენებლობის კომპანია“ (China Communications Construction Company Limited – CCCC); „ჩინეთის პორტების ინვესტიციები“ (China Harbour Investment CHI). კონსორციუმს, თავის მხრივ, ორი მნიშვნელოვანი კონტრაქტორი ჰყავს: „ჩინეთის გზებისა და ხიდების კორპორაცია“ (China Road and Bridge Corporation – CRBC) და „ცინდაოს საერთაშორისო პორტი“ (Qingdao Port International – QPI).
ყველა ზემოთჩამოთვლილ კომპანია სახელმწიფო კომპანიაა.
