საქართველოში რესტორნები და სასტუმროები გაიხსნა. აღდგა საქალაქთაშორისო ტრანსპორტის მიმოსვლაც

8 ივნისიდან საქართველოში კორონავირუსის გამო დაწესებული შეზღუდვების ნაწილი იხსნება.

8 ივნისის მონაცემებით, საქართველოში კორონავირუსით ინფიცირების 810 შემთხვევაა დადასტურებული. კარანტინის რეჟიმშია 2915 ადამიანი, ხოლო სტაციონარში მეთვალყურეობის ქვეშ – 237 პირი. კორონავირუსით ინფიცირებულთაგან 683 გამოჯანმრთელდა და 13  გარდაიცვალა.

კერძოდ:

● დღეიდან საქართველოში იხსნება დახურული სივრცის მქონე რესტორნები და კაფეები. ღია სივრცის მქონე კაფეებმა და რესტორნებმა მუშაობა ერთი კვირის წინ, 1 ივნისიდან განაახლეს. 

● 8 ივნისიდან იხსნება კორონავირუსის პანდემიის გამო დაკეტილი სასტუმროებიც. მუშაობის უფლება აქვთ მხოლოდ იმ სასტუმროებს, რომლებმაც შემოწმება გაიარეს და მუშაობის განახლების თაობაზე ჯანდაცვის სამინისტროს ნებართვა აქვთ. სასტუმროები ვალდებულები არიან, ჯანდაცვის სამინისტროს მიერ დაწესებული რეგულაციები დაიცვან.

● მუშაობა დაიწყეს კორონავირუსის პანდემიის გამო დაკეტილმა ვალუტის გადამცვლელმა პუნქტებმაც. 

• ეკლესია, რომელმაც ტრანსგენდერი ადამიანები შეიფარა. ვიდეო
• საქართველოში 29 800 ბავშვს სახლში წყლითა და საპნით ხელის დაბანის პირობები არა აქვთ – UNICEF
• როგორი იქნება ტურიზმი კორონავირუსის შემდეგ. საქართველო ტურისტების მისაღებად ემზადება

● განახლდა საქალაქთაშორისო ტრანსპორტის მიმოსვლაც.

მუნიციპალიტეტებს შორის მგზავრობა ავტობუსებით და მიკროავტობუსებით დაშვებულია. ტრანსპორტში სავალდებულოა პირბადის გამოყენება და ღია უნდა იყოს ფანჯრები.

● საქალაქთაშორისო ტრანსპორტის მიმოსვლაზე შეზღუდვის მოხსნა მატარებლებს არ ეხება: ჯერჯერობით ისევ შეჩერებულია რკინიგზით მგზავრობა. სარკინიგზო მიმოსვლა, სავარაუდოდ, 15 ივნისიდან, შიდა ტურიზმის განახლებასთან ერთად აღდგება. 

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული. 

კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა.15 ივნისიდან საქართველო შიდა ტურიზმის განახლებას გეგმავს, 1 ივლისიდან კი საზღვრების გახსნას და უცხოელი ტურისტების მიღებას.