საქართველოს რუსული ენერგოკომპანიის დელეგაცია ეწვია, რომლის დირექტორი ანდრეი რიუმინი სანქცირებულია
საქართველოს რუსული ენერგოკომპანიის დელეგაცია ეწვია
რუსეთის სახელმწიფო ენერგეტიკული კომპანია “როსსეტის“ დელეგაცია აღმასრულებელი დირექტორის, სანქცირებული ანდრეი რიუმინის ხელმძღვანელობით, სამუშაო ვიზიტით საქართველოში იმყოფებოდა. რიუმინმა დელეგაციის წევრებთან ერთად შეხვედრები გამართა საქართველოს ენერგეტიკული კომპანიებისა და ეკონომიკის სამინისტროს წარმომადგენლებთან.
რიუმინი, რომელიც დელეგაციას ხელმძღვანელობდა, რუსეთის პრეზიდენტთან, ვლადიმირ პუტინთან დაახლოებულ ბიზნესმენად ითვლება, რის გამოც ის ევროკავშირის, გაერთიანებული სამეფოს, შვეიცარიის, კანადის, ავსტრალიის, ახალი ზელანდიის და უკრაინის მიერ არის სანქცირებული.
კომპანიის განცხადების თანახმად, ქვეყნის უდიდესი ენერგეტიკული კომპანიის, “საქრუსენერგოს“ (აქციების 50%-იანი წილები “როსსეტის“ და საქართველოს მთავრობის საკუთრებაშია) მენეჯმენტთან შეხვედრაზე განიხილეს ელექტროქსელის საიმედოობის, მიმდინარე შედეგებისა და საინვესტიციო გეგმების საკითხები. ასევე შეჯამდა 2024 წლის წარმოებისა და ფინანსურ-ეკონომიკური შედეგები.
1996 წელს დაარსებული სს „საქრუსენერგო“ მართავს 500, 330 და 220 კვ ძაბვის ელექტროგადამცემ ხაზებს, მათ შორის რუსეთთან, აზერბაიჯანსა და თურქეთთან დამაკავშირებელ ხაზებს.
რუსული კომპანიის მიხედვით, შეხვედრაზე არსებული და სამომავლო ინვესტიციების გეგმები განიხილეს. ასევე, ეკონომიკის სამინისტროში შეხვედრის დროს ერთ-ერთი განხილვის თემა ელექტროენერგიის ინფრასტრუქტურის მოდერნიზებასა და მშენებლობასთან დაკავშირებული ერთობლივი პროექტების ჩატარების პერსპექტივები იყო.
“ასევე შეხვედრა გაიმართა საქართველოს ეკონომიკისა და მდგრადი განვითარების სამინისტროში, რომელზეც განიხილეს ელექტროენერგეტიკული ინფრასტრუქტურის მოდერნიზაციასა და მშენებლობასთან დაკავშირებულ ერთობლივ პროექტებში მონაწილეობის შესაძლებლობა“, – ნათქვამია განცხადებაში.
აღსანიშნავია, რომ “საქრუსენერგოს“, “სახელმწიფო ელექტროსისტემას“ და საქართველოს ეკონომიკის სამინისტროს რუსეთის დელეგაციასთან შეხვედრის შესახებ ინფორმაცია საჯაროდ არ გაუვრცელებიათ.
ვინ არის ანდრეი რიუმინი
ანდრეი რიუმინი ევროკავშირის სანქციების სიაში 2022 წლის 15 მარტს შეიყვანეს. მის შესახებ ვკითხულობთ, რომ რიუმინი არის ეკონომიკის საკვანძო სექტორში ერთ-ერთი წამყვანი ბიზნესმენი და 2022 წლის 24 თებერვალს ვლადიმირ პუტინთან “ოლიგარქიულ“ შეხვედრაში მონაწილეობა. ეს შეფასდა უკრაინის სუვერენიტეტის შემაფერხებელი პოლიტიკის მხარდაჭერად. ევროკავშირის სანქციების ფარგლებში, გაიყინა რიუმინისა და “როსსეტის” აქტივები ევროკავშირში, აიკრძალა მათთან ნებისმიერი ტრანზაქცია, ხოლო თავად რიუმინს აეკრძალა ევროკავშირის ქვეყნებში შესვლა.
დიდმა ბრიტანეთმა რიუმინი სანქციების სიაში იმავე დღეს, 2022 წლის 15 მარტს შეიყვანა. მისი აქტივები დიდ ბრიტანეთში გაყინულია, ბრიტანულ იურიდიულ და ფიზიკურ პირებს მასთან საქმიანი ურთიერთობა ეკრძალებათ, ხოლო თავად მას ქვეყანაში შესვლა აეკრძალა.
კანადამ რიუმინს სანქციები 2022 წლის 18 მაისს დაუწესა. კანადის მთავრობის განცხადებით, ეს არის პასუხი უკრაინაში “რუსეთის აგრესიაზე“ და ზომა “ოლიგარქებისა და მათი გარემოცვის“ წინააღმდეგ.
ამასთან, შვეიცარიამ ევროკავშირის მიერ დაწესებული ზომები გაიზიარა და რიუმინს სანქციები 2022 წლის 16 მარტს დაუწესა.
