საქართველოს პარლამენტმა მთავრობას 10-ზე მეტი ადამიანის შეკრების შეზღუდვის უფლება მისცა

საქართველოს პარლამენტმა პირველი მოსმენით მიიღო კანონპროექტი, რომლითაც მთავრობას ადამიანის კონსტიტუციური უფლებების, მათ შორის ქუჩაში თავისუფლად გადაადგილების და 10-ზე მეტი ადამიანის შეკრების უფლების შეზღუდვა პარლამენტის ნებართვის და საგანგებო მდგომარეობის გამოცხადების გარეშე 2021 წლის პირველ იანვრამდე შეეძლება. პროექტს მხარი არ დაუჭირა საპარლამენტო ოპოზიციამ, რომელიც მიიჩნევს, რომ ის ანტიკონსტიტუციურია და შემოდგომაზე დაგეგმილი საპარლამენტო არჩევნების წინ სახელისუფლებო პარტიისთვის მისი მიღება ძალიან მომგებიანია. 

“საზოგადოებრივი ჯანმრთელობის შესახებ” კანონის მოქმედი რედაქციით, მთავრობას შეზღუდვების დაწესების უფლება 15 ივლისამდე ჰქონდა. კორონავირუსის პანდემიის გავრცელების თავიდან აცილების და მოსახლეობის ჯანმრთელობაზე ზრუნვის საბაბით მთავრობამ ამ უფლების გახანგრძლივება 2021 წლამდე მოითხოვა. 

„საგანგებო მდგომარეობის დროს „გაუტკბა“ მთავრობას, რომ არც საპარლამენტო ჩართულობა იყო პროცესში და ერთპიროვნულად შეეძლო გადაეწყვიტა შეზღუდვების დრო და მასშტაბი.  მოეწონა ეს ამბავი, მოირგო ეს პრეცედენტი და ახლა კიდევ უფრო იხანგრძლივებს ასე მართვის შესაძლებლობას, რაც,  ჯამში, ძალიან საშიშია,” – ამბობს ანა ნაცვლიშვილი, პოლიტიკური გაერთიანება “ლელო საქართველოსთვის” წევრი, რომელმაც საკონსტიტუციო სასამართლოს უკვე მიმართა სარჩელით, რომლითაც საგანგებო მდგომარეობის გამოცხადების გარეშე ადამიანის კონსტიტუციური უფლებების შეზღუდვის არაკონსტიტუციურად ცნობას ითხოვს.  

• “გამარჯობა, თქვენ დაწერეთ სტატუსი კორონავირუსზე?”- სუს-ი ფეისბუკ-პოსტების გამო პოლიტიკოსებს და ჟურნალისტებს იბარებს
• ბაჩანა შენგელიას საქმე – რა ღირს პოლიტიკური შეხედულებების საჯაროდ გამომჟღავნება

ჯანდაცვის კომიტეტის თავმჯდომარე, დიმიტრი ხუნდაძე განმარტავს, რომ მთავრობას ეს უფლება კორონავირუსთან საბრძოლველად და მოსახლეობის ჯანმრთელობის დასაცავად სჭირდება. ის საპარლამენტო არჩევნების თემასაც შეეხო. მისი თქმით, საგანგებო მდგომარეობის პირობებში არჩევნების ჩატარება შეუძლებელია და საგანგებო მდგომარეობის გარეშე შეზღუდვების დაწესების ბერკეტი ხელისუფლებას იმისთვისაც სჭირდება, რომ 2020 წლის ოქტომბერში დაგეგმილი არჩევნები, ეპიდემიოლოგიური მდგომარეობის გართულების გარეშე, ნორმალურ ვითარებაში ჩატარდეს.

კორონავირუსის პანდემიის გავრცელების თვალსაზრისით საქართველოში ამ დროისთვის  სტაბილური ეპიდემიოლოგიური სურათია, რის გამოც საქართველო მოხვდა იმ 14 ქვეყნის სიაში, რომელთანაც ევროკავშირმა საზღვრები გახსნა.