საქართველოს მთავრობა “ფრონტერასთან” კონტრაქტს აღარ წყვეტს

საქართველოს ნავთობისა და გაზის სახელმწიფო სააგენტოსა და კომპანია „ფრონტერა რისორსიზ ჯორჯია კორპორეიშენს“ შორის გაფორმებული კონტრაქტი, რომელიც ჰააგის საარბიტრაჟო სასამართლოს გადაწყვეტილებით 2020 წლის 27 ივლისს უნდა შემწყდარიყო, აღარ შეწყდება.  

საქართველოს მთავრობა კომპანიას უფლებას აძლევს, გააგრძელოს ნავთობის მოპოვება სახელმწიფოს საძიებო ტერიტორიის 1%-ზე, რადგან ამ ტერიტორიის დაახლოებით 99%, „ფრონტერამ“ საარბიტრაჟო გადაწყვეტილების თანახმად, სახელმწიფოს უკვე უკან  დაუბრუნა.

საქართველოს მთავრობა აცხადებს, რომ ის “ფრონტერასთან” დავაში მართალია და ამას საარბიტრაჟო სასამართლოს გადაწყვეტილებაც მოწმობს, მაგრამ ახლა მისთვის ყველაზე მთავარი ქვეყნის “რეპუტაციისა და  საინვესტიციო კლიმატის უაღრესად დადებითი აღქმის შენარჩუნებაა”. 

საქართველოს ეკონომიკისა და მდგრადი განვითარების სამინისტრომ კომპანიას მოლაპარაკება და თანამშრომლობის გაგრძელება მას შემდეგ შესთავაზა, რაც ამერიკელმა სენატორებმა აშშ-ის სახელმწიფო მდივანს, მაიკ პომპეოს წერილი მისწერეს და საქართველოში დასავლური ბიზნესის შევიწროების გამო შეშფოთება გამოთქვეს.

• ივანიშვილის კავშირი რუსეთის მთავრობასთან, დასავლური ბიზნესის შევიწროება – რას წერენ სენატორები აშშ-ს სახელმწიფო მდივანს
• 2013 წლიდან ჩვენ ვხედავთ მზარდ ანტიამერიკულ განწყობას – “ფრონტერა”

ვრცელ განცხადებაში, რომელიც ეკონომიკის სამინისტრომ გაავრცელა, წერია: 

“სამწუხაროდ, „ფრონტერა“-ს მიერ წამოწყებულ კამპანიაში ძალაუნებურად ჩართული აღმოჩნდა საქართველოს მთავარი სტრატეგიული პარტნიორის, ამერიკის შეერთებული შტატების კონგრესის რამდენიმე წევრი – საქართველოს მეგობარი კონგრესმენები, რომლებსაც მიმდინარე მოვლენების თაობაზე არსებითად მცდარ ინფორმაციას ისევ „ფრონტერა“-ს მესვეურები და მათ მიერვე დაქირავებული ლობისტები აწვდიდნენ.” 

განცხადებაში აღნიშნულია, რომ ამერიკის შეერთებულ შტატებთან და ქვეყნის უმთავრეს სტრატეგიულ პარტნიორთან ურთიერთობაა, საქართველოს მთავრობისთვის “ფუნდამენტური და პრინციპული საკითხია” და რომ ქვეყანას არ სურს “ ამერიკის უაღრესად მრავალფეროვან პოლიტიკურ სპექტრში ვინმეს გაუჩნდეს საბაბი და ეს აბსოლუტურად რუტინული კომერციული დავა ქვეყნებს შორის არსებული სტრატეგიული ურთიერთობების საზიანოდ გამოიყენოს.” 

“აღნიშნული გადაწყვეტილება კომპანია „ფრონტერა რისორსიზ ჯორჯია კორპორეიშენ“-ს საშუალებას აძლევს, აღარ დახარჯოს ძალისხმევა ლობისტების მობილიზებასა და მათთან ურთიერთობაზე, რის ნაცვლადაც, სასურველია კონცენტრირება მოახდინოს იმ ვალდებულებების შესრულებაზე, რაც დასაქმებულ პირთა მიმართ დაუგროვდა, გაისტუმროს სახელფასო დავალიანებები, მოაწესრიგოს ურთიერთობა სხვა მრავალ კრედიტორთან და გააგრძელოს საქმიანობა საძიებო სამუშაოების განხორციელების კუთხით,” – წერია განცხადებაში. 

“ფრონტერა” აშშ-ში დაფუძნებული კომპანიაა, რომლის მიზანიც ნავთობისა და გაზის მოპოვებაა. მან საქართველოში მუშაობა 1997 წლიდან დაიწყო. ამ ხნის განმავლობაში კომპანიამ არაერთხელ განაცხადა, რომ გაზის დიდ მარაგს მიაგნო. 

საქართველოს მთავრობა აცხადებს, რომ საერთაშორისო არბიტრაჟში მიმდინარე დავა ქართული მხარის გამარჯვებით დასრულდა. თავის მხრივ, “ფრონტერა” ამტკიცებს, რომ მთავრობა ცრუობს და საარბიტრაჟო დავა მათ სასარგებლოდ გადაწყდა. 

საარბიტრაჟო სასამართლოს გადაწყვეტილება დღემდე არ გასაჯაროებულა. დოკუმენტის გამოქვეყნებაზე უარს “ფრონტერა” ამბობს.

ქართული მხარე აცხადებს, რომ მზადაა, გაასაჯაროოს არბიტრაჟის გადაწყვეტილება, თუმცა მხარეთა შეთანხმების საფუძველზე, ცალმხრივად ამის უფლება არ აქვს და უკვე მიმართეს კომპანიას შედეგების გასაჯაროებაზე თანხმობის მისაღებად.

როგორც საქართველოს ნავთობისა და გაზის სახელმწიფო სააგენტოში აცხადებენ, საარბიტრაჟო ტრიბუნალმა დაადგინა „ფრონტერას“ მხრიდან კონტრაქტის არსებითი დარღვევის ფაქტი და კომპანიას ქართული მხარისთვის 6 მლნ აშშ დოლარის გადახდა დააკისრა. 

საქართველოს ნავთობისა და გაზის სახელმწიფო სააგენტოსა და  „ფრონტერას“ შორის გაფორმებული კონტრაქტი 2020 წლის 27 ივლისს უნდა შეწყდეს. 

ამერიკელი ინვესტორებისთვის, მათ შორის „ფრონტერასთვის“ საქართველოში შექმნილ პრობლემებზე საუბარია ამერიკელი სენატორების და კონგრესმენების ჯგუფის წერილში, რომელიც მათ 15 მაისს გაუგზავნეს შეერთებული შტატების სახელმწიფო მდივანს და ფინანსთა მინისტრს.

2 ივნისს კომპანია “ფრონტერას” ხელმძღვანელებმა საქართველოს პრემიერ-მინისტრს, გიორგი გახარიას წერილით მიმართეს. წერილში აღნიშნულია, რომ საქართველოში გაუარესდა ბიზნესგარემო,  რომელიც არ ცნობს კანონის უზენაესობას და იყენებს სასამართლოს, როგორც იარაღს და ნაცვლად ამერიკულ ინვესტიციებთან პარტნიორობისა, უპირატესობას ანიჭებს სახელმწიფოს მიტაცებას. 

წერილში ისინი გიორგი გახარიას თანამშრომლობის გაგრძელებისკენ მოუწოდებენ და აცხადებენ, რომ “ფრონტერასთან” თანამშრომლობის გაგრძელება “წამახალისებელი სიგნალი იქნება ამერიკული კომპანიებისთვის”.