საქართველოს მოქალაქეობის მისაღები ტესტები შეიცვალა. ამოიღეს კითხვები სააკაშვილზე, შევარდნაძეზე, ოკუპაციაზე

საქართველოს მოქალაქეობის მიღება

ისტორიის ტესტებიდან, რომელსაც საქართველოს მოქალაქეობის მიღების მსურველები აბარებენ, ედუარდ შევარდნაძე, მიხეილ სააკაშვილი, ვარდების რევოლუცია და საქართველოს ოკუპაციის თემა ამოიღეს.

ამიერიდან, გამოცდაზე გასულებს აღარ მოუწევთ უპასუხონ ისეთ კითხვებს, როგორიცაა:

• ვინ იყო საქართველოს მეორე პრეზიდენტი? 
• რომელ წელს მოხდა „ვარდების რევოლუცია“ საქართველოში?
• ვინ იყო საქართველოს მესამე პრეზიდენტი?
• ვინ მოვიდა საქართველოს ხელისუფლების სათავეში, ვარდების რევოლუციის შემდეგ?

საქართველოში ცხოვრობს რამდენიმე ათასი ადამიანი, რომლებიც ამ ქვეყანაში დაიბადნენ, გაიზარდნენ, მაგრამ საქართველოს მოქალაქეობა არ აქვთ. ესენი არიან ის ადამიანები, რომლებიც სხვადასხვა დროს საცხოვრებლად ან სამუშაოდ სხვა ქვეყანაში, უმეტესად რუსეთში წავიდნენ. 

ასეთმა ადამიანებმა საქართველოს მოქალაქეობა რომ მიიღონ, უნდა მოაგროვონ მთელი რიგი საბუთები, მიმართონ იუსტიციის სამინისტროს და შემდეგ გაიარონ რამდენიმე პროცედურა. მათ შორის, ჩააბარონ სამი გამოცდა: ქართულ ენაში, სამართლის საფუძვლებში და საქართველოს ისტორიაში.

ამოღებულია კითხვა საქართველოს ოკუპაციის შესახებაც. ისტორიის ტესტების ძველ ვერსიაში, ეს კითხვა ასე ჟღერდა:

კითხვა #199: დღეს რომელი სახელმწიფოს მიერაა საქართველოს ტერიტორიის 20% ოკუპირებული?

ა) ისრაელის;
ბ) ჩინეთის;
 გ) იაპონიის;
დ) რუსეთის;
სწორი პასუხია: დ) რუსეთის;  

როგორ მივიღოთ საქართველოს მოქალაქეობა. დეტალური გიდი მოქალაქეობის არმქონე პირებისთვის

ათასობით ადამიანი საქართველოში ცდილობს აღიდგინოს საქართველოს მოქალაქეობა. მათ შორის არან აფხაზეთიდან დევნილები

ასევე, ამოღებულია კითხვები საქართველოს პარტნიორებზე.

საუბარია შემდეგ კითხვებზე:

კითხვა #200. ჩამოთვლილთაგან რომელი სახელმწიფოა საქართველოს სტრატეგიული პარტნიორი?

 ა) აშშ;
 ბ) სამხრეთი კორეა;
გ) სამხრეთი აფრიკა;
დ) ბრაზილია;
სწორი პასუხია: ა) აშშ;

კითხვა #201. ჩამოთვლილთაგან რომელი სახელმწიფო არ აღიარებს საქართველოს ოკუპირებული ტერიტორიების, აფხაზეთისა და ცხინვალის რეგიონის, დამოუკიდებლობას?

ა) ნიკარაგუა;
ბ) ნაურუ;
 გ) ლიეტუვა;
დ) ვენესუელა;
სწორი პასუხია: გ) ლიეტუვა;

კითხვა #202. ჩამოთვლილ სახელმწიფო მეთაურთაგან რომელს მიენიჭა საქართველოს ეროვნული გმირის წოდება?

ა) იოსებ სტალინს;
ბ) ლეხ კაჩინსკის;
გ) ვლადიმერ პუტინს;
დ) უგო ჩავესს
სწორი პასუხია: ბ) ლეხ კაჩინსკი

სამაგიეროდ, ტესტების ახალ ვერსიაში ერთი ახალი კითხვა გაჩნდა. ეს კითხვა ეხება საქართველო-ევროკავშირის ასოცირების ხელშეკრულებას. შეთანხმებას, რომელსაც ხელი “ქართული ოცნების” პერიოდში მოეწერა.

ეს ტესტების ბოლო კითხვაა. აქამდე, მსგავსი კითხვა ტესტებში არ იყო.

რა ეწოდება იმ მნიშვნელოვან ხელშეკრულებას, რომელსაც საქართველომ ხელი მოაწერა ბრიუსელში 2014 წელს?

ა) საქართველო-ევროკავშირის ასოცირების შეთანხმება;
ბ) საქართველო – ევროპის კონფედერაციული კავშირი;
გ) საქართველო-შენგენის ზონის საინვესტიციო კომუნიკე;
დ) საქართველო-ატლანტიკური ალიანსის თანამშრომლობის პროტოკოლი.

სწორი პასუხია: ა) საქართველო-ევროკავშირის ასოცირების შეთანხმება;

ამავე დროს, ტესტების ძველ და ახალ ვერსიაში, ჯამურად კითხვების რაოდენობა მნიშვნელოვნად შეცვლილი არ არის.

ძველ ვერსიაში 202 კითხვა იყო. ახალ ვერსიაში 200 კითხვაა. შესაბამისად, იუსტიციის სამინისტრო ამ ცვლილებას ტესტების შემოკლებით ვერ გაამართლებს.

აქვე, ჯერ იუსტიციის სამინისტროს, ან რომელიმე სახელმწიფო უწყებას, ამ ცვლილებებზე რაიმე განმარტება არ გაუკეთებია.

როდიდან და კიდევ რა შეიცვალა საქართველოს მოქალაქეობის მოპოვების მსურველებისთვის

„საქართველოს მოქალაქეობის შესახებ“ საქართველოს ორგანულ კანონში ცვლილება საქართველოს პარლამენტმა 2023 წლის 1-ელ ნოემბერს მიიღო. ახალი წესები 2024 წლის 1 მაისიდან ამოქმედდა.

კანონში რამდენიმე ცვლილებაა.

#1 – შემცირდა საქართველოში უწყვეტად ცხოვრების ვადა

თუ ამ ცვლილებამდე მოქალაქეობის მიღების მსურველებს საქართველოში უწყვეტად ცხოვრება 10 წლით მოეთხოვებოდათ, ახლა ეს ვადა 5 წლამდე შემცირდა.

განმარტებით ბარათში, რომელიც იუსტიციის სამინისტრომ ცვლილებების ინიციირებისას გამოაქვეყნა, უწყებამ თქვა, რომ ეს ცენზი 10 წლამდე 2018 წელს გაიზარდა. იქამდე ისეც 5 წელი იყო. ვადის გაზრდამ კი ბევრს პრობლემა შეუქმნა.

#2 – შეიცვალა მოქალაქეობის მისაღები პროცედურების თანამიმდევრობა

საქართველოს მოქალაქეობის მისაღებად, ერთ-ერთი მოთხოვნა, სამი გამოცდის ჩაბარებაა. მოქალაქეობის მიღების მსურველი აბარებს გამოცდას ქართულ ენაში, სამართლის საფუძვლებში და ისტორიაში. ხშირად, ამ გზაზე ბარიერი, სწორედ ეს გამოცდები იყო, რადგან ტესტები არც ისე მარტივია. მითუმეტეს, ეთნიკურად არაქართველებისთვის.

ტესტებს ადამიანი აბარებდა მას შემდეგ, რაც განაცხადს შეიტანდა დასამინისტრო ყველაფერს გადაამოწმებდა.

ამიერიდან, საქართველოს მოქალაქეობის მოპოვების მსურველი პირი გამოცდას განცხადების შეტანამდე ჩააბარებს. და, არადამაკმაყოფილებელი შედეგის შემთხვევაში, სააგენტო მოქალაქეობის მინიჭების ფორმალურ პროცედურებს აღარ დაიწყებს.

იუსტიციის სამინისტრომ ეს ახსნა იმით, რომ ასე, დაიზოგება როგორც მოქალაქეების, ისე უწყების დრო და რესურსები;

#3 – შემცირდა განმეორებით მიმართვის ვადა

კიდევ ერთი ცვლილება, უარის შემთხვევაში, სამინისტროსთვის ხელახლა მიმართვას ეხება. აქამდე, პირს, რომელსაც სურდა მოქალაქეობის მიღება ნატურალიზაციის გზით და ერთხეულ უკვე უთხრეს უარი განმეორებით მიმართვა მხოლოდ ერთი წლის შემდეგ შეეძლო. 1-ლი მაისიდან ეს ვადა 6 თვემდე შემცირდა.

საქართველოს მოქალაქეობის მიღება