როგორ აღნიშნა საქართველომ დამოუკიდებლობის დღე - მოქალაქეები ევროპას ირჩევენ. ფოტოები
როგორ აღნიშნა საქართველომ დამოუკიდებლობის დღე
საქართველოს დამოუკიდებლობის დღე ტრადიციულად რუსთაველის გამზირზე აღინიშნა. 26 მაისი თბილისის გარდა იზეიმეს საქართველოს 15 ქალაქში.
თბილისში საზეიმო ღონისძიებების პარალელურად მოქალაქეთა ნაწილმა რუსთაველის გამზირზე მსვლელობა გამართა სახელწოდებით – “საქართველო ირჩევს ევროპას”. მათ გამზირზე ევროკავშირისა და საქართველოს დროშებით ხელში ჩაიარეს. “საქართველო! ევროპა!” – ისმოდა მსვლელობის მონაწილეთა შეძახილები.
მოქალაქეებმა ევროკავშირის დროშებით მსვლელობის გამართვა მას შემდეგ გადაწყვიტეს, რაც გასული წლის 26 მაისისგან განსხვავებით ხელისუფლებამ წლევანდელ ღონისძიებებზე პარლამენტის შენობის გაფორმებისას ევროკავშირის დროშები აღარ გამოიყენა.
მთავრობის წარმომადგენლებმა განაცხადეს, რომ 26 მაისი ყოველწლიურად იძენს “დამატებით თემატიკას”, რაც წლიდან წლამდე იცვლება და შესაბამისად ფორმდება ქალაქიც. წლევანდელ თემატიკად მათ “თავისუფლების სიყვარულით” დააარქვეს.
ხელისუფლების ამ გადაწყვეტილებას მოქალაქეები პროტესტით და ევროკავშირის დროშებით შეხვდნენ.
დამოუკიდებლობის დღისადმი მიძღვნილი საზეიმო ღონისძიებები თბილისში ფიცის დადების ცერემონიით გაიხსნა თავისუფლების მოედანზე. შეკრებილებს სიტყვით საქართველოს პრემიერმინისტრმა, პარლამენტის თავმჯდომარემ და პრეზიდენტმა მიმართეს.
საქართველოს პრემიერ-მინისტრმა ირაკლი ღარიბაშვილმა დამოუკიდებლობის დღისადმი მიძღვნილ საზეიმო ღონისძიებაზე სიტყვით გამოსვლისას თქვა, რომ “განსაკუთრებით შთამბეჭდავია ჩვენი წარმატებები ევროინტეგრაციის გზაზე.” ღარიბაშვილის თქმით, ხელისუფლება არ იშურებს ძალისხმევას, რომ “წლის ბოლოს ქვეყანამ მიიღოს კანდიდატის სტატუსი.” ის მიიჩნევს, რომ საქართველოსთან დაკავშირებით ეს იქნება ერთადერთი სწორი და სამართლიანი გადაწყვეტილება ევროპის მხრიდან.
“დღევანდელ ურთულეს გეოპოლიტიკურ ვითარებაში ჩვენ, საქართველოს ხელისუფლება და ქართველი ხალხი, ევროპისაგან ველით ერთადერთ სწორ და სამართლიან გადაწყვეტილებას – საქართველოს საუკუნოვანი მისწრაფების, ჩვენი ხელისუფლებისა და ხალხის ერთიანი ძალისხმევის აღიარებას, ევროკავშირის კანდიდატის სტატუსის მონიჭებას. ევროპის მხრიდან ჩვენი დამსახურების სამართლიანი აღიარება იქნება ისტორიული ნაბიჯი, რომელიც ხელს შეუწყობს ქვეყანაში პოლარიზაციის დასრულებას, მშვიდობისა და სტაბილურობის განმტკიცებას, ჩვენი ქვეყნის შემდგომ წინსვლას“, – განაცხადა პრემიერმა.
ირაკლი ღარიბაშვილმა უკრაინაში მიმდინარე ომზეც ისაუბრა და თანადგომა გამოუცხადა უკრაინელ ხალხს. ღარიბაშვილმა იმედი გამოთქვა, რომ ომი მალე დასრულდება. მან კიდევ ერთხელ განმარტა, რომ არსებულ გეოპოლიტიკურ ვითარებაში, როცა “ისტორიაში ყველაზე მწვავედ დგას ბირთვული ომის საფრთხე”, საქართველოს მთავრობა თავის მთავარ ამოცანად მშვიდობის შენარჩუნებას და “ქვეყნის გადარჩენას” მიიჩნევს.
პრეზიდენტმა სალომე ზურაბიშვილმა დამოუკიდებლობის დღესთან დაკავშირებით ოფიციალური მიმართვისას „ქართული ოცნების“ ხელისუფლება ანტიდასავლური პოლიტიკის გამო გააკრიტიკა.
მან ხელისუფლების ქმედებების გამო ბოდიში მოუხადა აგვისტოს ომის გმირის, გიორგი ანწუხელიძის ოჯახს, ასევე გიგა ოთხოზორიას ოჯახს, რომელიც აფხაზეთის ადმინისტრაციულ საზღვართან რამდენიმე წლის წინ მოკლეს.
პრეზიდენტმა ხელისუფლება იმის გამოც გააკრიტიკა, რომ ანტიდასავლური პოლიტიკისა და რიტორიკის ფონზე შვილებს ევროპა-ამერიკაში გზავნიან. ასევე პრეზიდენტის კრიტიკა შეეხებოდა ქვეყანაში რუსეთის საგარეო საქმეთა მინისტრის სანქცირებული შვილის შემოშვებას და ფრენებისა აღდგენას.
პრეზიდენტის გამოსვლისას, რომელიც ქვეყანას თავისუფლების მოედნიდან პირდაპირ ეთერში მიმართავდა, იქვე მყოფი ადამიანებისგან ისმოდა საპროტესტო შეძახილები. ერთერთი მათგანი, ვინც აპროტესტებდა პრეზიდენტის გამოსვლას, იყო “ქართული ოცნების” დეპუტატი ირაკლი ქადაგიშვილი. ღონისძიებას მხოლოდ ოფიციალურად მიწვეული პირები ესწრებიან.
ვრცლად პრეზიდენტის მიმართვა წაიკითხეთ აქ
საქართველოს ეროვნულმა საბჭომ, ნოე ჟორდანიას ხელმძღვანელობით რუსეთის იმპერიისგან გათავისუფლების შემდეგ დამოუკიდებლობის აქტი 1918 წლის 26 მაისს მიიღო.
საქართველოს პირველმა დამოუკიდებელმა რესპუბლიკამ არსებობა 1921 წლის თებერვალში შეწყვიტა ბოლშევიკური რუსეთის სამხედრო აგრესიისა და ოკუპაციის შედეგად. საქართველომ დამოუკიდებლობა 1991 წლის 9 აპრილს, 70 წლის შემდეგ აღიდგინა.
