"ვიზალიბერალიზაცია, ვაჭრობა, უსაფრთხოება" - ანტიდემოკრატიული კურსის ცვლილების შემთხვევაში, საქართველო აშშ-სგან მსხვილ პაკეტს მიიღებს

საქართველო აშშ-სგან მსხვილ პაკეტს მიიღებს

ანტიდემოკრატიულ კურსზე უარის თქმის შემთხვევაში, აშშ საქართველოსთვის მნიშვნელოვანი სამხედრო, სავაჭრო პაკეტის გადაცემასა და სავიზო რეჟიმის ლიბერალიზაციას განიხილავს. გამოცემა Politico-ს ცნობით, ამის შესახებ ნათქვამია ამერიკელი კონგრესმენის, ჯო უილსონის მიერ შემუშავებულ კანონპროექტში, რომელიც გამოცემამ მოიპოვა.

კანონპროექტის სახელია MEGOBARI (Mobilizing and Enhancing Georgia’s Options for Building Accountability, Resilience, and Independence Act – საქართველოში ანგარიშვალდებულების, სიმტკიცისა და დამოუკიდებლობის აშენების მიზნით შესაძლებლობების მობილიზაციისა და გაფართოების აქტი).

▇ კანონპროექტის თანახმად ვაშინგტონს შეუძლია ხელი მოაწეროს საქართველოს ეკონომიკური და უსაფრთხოების მხარდაჭერის ყოვლისმომცველ პაკეტს, თუ მისი ხელისუფლება მიატოვებს მზარდ ანტიდასავლურ რიტორიკას და ადამიანის უფლებათა კუთხით უკან აღარ დაიხევს.

▇ აშშ დაიწყებს მოლაპარაკებებს საქართველოსთან “სანდო შეღავათიანი სავაჭრო რეჟიმის“ გასახსნელად, თუ საკვანძო პოლიტიკური კრიტერიუმები დაცული იქნება.

▇ სავაჭრო რეჟიმის გაუმჯობესების გარდა, კანონპროექტი საქართველოს მოქალაქეებისთვის სავიზო რეჟიმის ლიბერალიზაციას განიხილავს. 

▇ კანონპროექტი ასევე ავალდებულებს ოფიციალურ პირებს შეიმუშაონ საქართველოსთვის სამხედრო მხარდაჭერის პაკეტი, რომელიც მოიცავს “უსაფრთხოებისა და თავდაცვითი აღჭურვილობის უზრუნველყოფას, რომელიც იდეალურად შეეფერება რუსეთის აგრესიისგან ტერიტორიული თავდაცვისთვის და თანმხლები წვრთნების, ტექნიკური უზრუნველყოფისა და ოპერაციების მხარდაჭერის ელემენტებს”.

გამოცემა აღნიშნავს, რომ კანონპროექტის დრაფტი, რომელსაც Politico გაეცნო, მმართველ პარტიას აფრთხილებს და აღნიშნავს, რომ ქართული ოცნება “მზარდად და სამწუხაროდ დაკავებულია რუსეთის ფედერაციასთან პოლიტიკის შეთანხმებით”.

ამავდროულად, კანონპროექტში ხაზგასმულია, რომ თბილისი “ღიად თავს ესხმის აშშ-ს და სხვა დასავლური დემოკრატიის ხელშემწყობ ორგანიზაციებს, ისევე როგორც ადგილობრივ და საერთაშორისო სამოქალაქო საზოგადოებას, პარალელურად კი აძლიერებს კავშირებს რუსეთთან და ჩინეთთან”.

Politico: კონგრესში "ქართული ოცნების" დეპუტატების სანქცირების კანონპროექტს დღეს წარადგენენ

“სანქციები ასევე შეეხება სამართალდამცველებსა და უსაფრთხოების სამსახურის წარმომადგენლებს”

რა შემთხვევაში ამოქმედდება კანონპროექტი?

პროგრამა ამოქმედდება მხოლოდ იმ შემთხვევაში, თუ აშშ დაადასტურებს, რომ “საქართველომ აჩვენა მნიშვნელოვანი და მდგრადი პროგრესი თავისი დემოკრატიის აღორძინების მიმართულებით, რაც დასტურდება მინიმუმ არსებითად სამართლიანი და თავისუფალი არჩევნებით და დაბალანსებული წინასაარჩევნო გარემოთი”.

POLITICO წერს, რომ ეს სტიმულები მისცემს სამხრეთ კავკასიის ქვეყანას ბიძგებს იმისკენ, რომ გარანტირებულად ჩატარდეს თავისუფალი არჩევნები, მთავრობის “კრემლის სტილში” მიღებული “აგენტების კანონპროექტის” გაწვევის შემდეგ.

● “ჩვენ ძალიან მძიმე ფაზაში შევდივართ” – ანალიტიკოსები ო’ბრაიენის ვიზიტს აფასებენ
● რუსული კანონი საბოლოო ვერსიით, ფიზიკურ პირებსაც შეეხება

დღეს Politico-მ წყაროზე დაყრდნობით გამოაქვეყნა სტატია, რომელშიც ვკითხულობთ, რომ აშშ-ს კონგრესში წარადგენენ კანონპროექტს, რომელიც საქართველოს ხელისუფლების იმ წარმომადგენლებისთვის აქტივების გაყინვას და სავიზო აკრძალვებს ითვალისწინებს, რომლებმაც “რუსული სტილის უცხოური აგენტების კანონს” მხარი დაუჭირეს.

გამოცემის მიხედვით, კანონპროექტის დრაფტი, რომელსაც Politico-ს წყარო გაეცნო, მმართველ პარტიას აფრთხილებს, რომ ქართული ოცნება “მზარდად და სამწუხაროდ დაკავებულია რუსეთის ფედერაციასთან პოლიტიკის შეთანხმებით”.

აშშ-ს სახელმწიფო მდივნის თანაშემწე ჯიმ ო’ბრაიენი 14-15 მაისს თბილისში იმყოფებოდა. ო’ბრაიენმა, საქართველოს პრემიერმინისტრთან, ოპოზიციასა და სამოქალაქო საზოგადოებასთან შეხვედრების შემდეგ ბრიფინგი გამართა და განაცხადა, რომ რუსული კანონი ევროკავშირის სტანდარტებთან შეუსაბამოა. ო’ბრაიენმა ასევე ისაუბრა შესაძლო სანქციებზეც საქართველოს მაღალი თანამდებობის პირების მიმართ.