შემოსავლების სამსახური ამტკიცებს, რომ 15 000 ტონა რუსული დიზელი ბათუმში სანქცირებული არ არის
სანქცირებული ტვირთები
ფინანსთა სამინისტროს შემოსავლების სამსახური ადასტურებს, რომ საქართველოში გემით რუსული საწვავი შემოიტანეს, თუმცა აცხადებს, რომ არც ეს გემი და არც ტვირთი საერთაშორისო სანქციების ქვეშ არ არის.
თავდაპირველად ინფორმაცია, რომ გემმა საქართველოში რუსული საწვავი შემოიტანა, “ნაციონალური მოძრაობის” პოლიტსაბჭოს თავმჯდომარემ, ლევან ხაბეიშვილმა გაავრცელა. მისი მტკიცებით, ბათუმის პორტში დგას ნავთობტანკერი – “Capibara”, რომელიც დატვირთულია 15 000 ტონა “Газпром нефть”-ის სანქცირებული დიზელით. მომწოდებელი შუამავალი ოფშორული კომპანია “BONEX”-ია. ხაბეიშვილის თქმით, ამ სქემით და ერთი გემით, ივანიშვილი მინიმუმ, 5 მილიონ ლარს მოიგებს.
რას ამბობს შემოსავლების სამსახური
“შემოსავლების სამსახური განმარტავს, რომ მიმდინარე წლის 3 აგვისტოს ბათუმის საზღვაო ნავსადგურში შემოვიდა ინდონეზიის დროშის ქვეშ მცურავი გემი – ,,CAPIBARA”, რომელზეც დატვირთული იყო ერთ-ერთი რუსული კომპანიიდან ქართული კომპანიისთვის (უწყება თავს იკავებს კომპანიების სახელწოდებების დასახელებისგან და საგადასახადო საიდუმლოების შემცველი ინფორმაციის გავრცელებისგან) გამოგზავნილი, იმპორტის საბაჟო პროცედურებში მოქცევისთვის განკუთვნილი 15 000 ტონა დიზელის საწვავი.
საქართველოს ეკონომიკისა და მდგრადი განვითარების სამინისტროს საზღვაო ტრანსპორტის სააგენტოს მიერ განხორციელებული სკრინინგის შედეგად დადასტურებულია, რომ გემსა და გემის მფლობელ კომპანიაზე არ ვრცელდება საერთაშორისო სანქციები. ამასთან, შემოსავლების სამსახურის მიერ გადამოწმების შედეგად დადგინდა, რომ საერთაშორისო სანქციები არც ტვირთზე ვრცელდება, ვინაიდან საქონლის ფასი არ აღემატება სანქციებით დაწესებული ფასის ზედა ზღვარს. ინფორმაცია ხელმისაწვდომია ღია წყაროებით.
აღნიშნულიდან გამომდინარე, საბაჟო კონტროლის პროცედურების დასრულების შემდეგ ტვირთი დაიცალა და კანონმდებლობის შესაბამისად მოექცა იმპორტის პროცედურაში.” – ნათქვამია შემოსავლების სამსახურის განცხადებაში.
რას პასუხობს ლევან ხაბეიშვილი
ლევან ხაბეიშვილი შემოსავლების სამსახურს პასუხობს და დოკუმენტს აქვეყნებს. მისი თქმით, ეს ოფშორული კომპანია ყიდულობს საწვავს სანქცირებული, რუსული კომპანიიდან.
“საქართველოში შემოდის ოფშორული კომპანიის სახელით და ეს ოფშორული კომპანია ყიდულობს სანქცირებული, რუსული კომპანიიდან.
ცხადია, მე თუ მოვიპოვე დოკუმენტი, ასევე უმარტივესად შეუძლია ანრი ოხანაშვილს გაარკვიოს. მაგრამ… მაგრამ, მერე 5 მილიონს ერთი გემიდან ვინ გადაკეცავს?!
ეს არის კრიმინალურ-კორუფციული და სისხლიანი ფული!!! აბსოლუტურად ყველა დოკუმენტის მოძიება შესაძლებელია და შემოსავლების სამსახურმა დაადასტურა ოხანაშვილ-ივანიშვილის ახალი აწყობილი სისხლიანი სქემა!” – წერს ხაბეიშვილი.
