საქართველოს ყოფილ გენერალურ პროკურორს, ოთარ ფარცხალაძეს, აშშ-მ სანქციები დაუწესა

სანქციები ოთარ ფარცხალაძეს

საქართველოს ყოფილ გენერალურ პროკურორს, ოთარ ფარცხალაძეს ამერიკის შეერთებულმა შტატებმა სანქციები დაუწესა. სანქციების დაწესება ოთარ ფარცხალაძის ბიზნესსაქმიანობას და რუსულ “ეფესბესთან” თანამშრომლობას უკავშირდება. პაკეტის ოფიციალურად გამოცხადებამდე, მედიაში გავრცელდა ინფორმაცია, რომ სანქცირებულთა შორის იყო “ქართველი-რუსი ოლიგარქი”.

აშშ-ის სახელმწიფო დეპარტამენტის ინფორმაციით, რუსეთის უშიშროების ფედერალური სამსახური [“ეფესბე”] ოთარ ფარცხალაძესთან მუშაობდა, რათა მას გავლენა მოეხდინა ქართულ საზოგადოებასა და პოლიტიკაზე რუსეთის სასარგებლოდ.

გარდა ამისა, აშშ-ს სახელმწიფო დეპარტამენტის განცხადებაში ნათქვამია, რომ ფარცხალაძის გარდა, სანქციები დაუწესდა რუსეთის დაზვერვის სამსახურის ოფიცერს, ალექსანდრ ონიშჩენკოს. რომელიც, სავარაუდოდ, “თავის თანამზრახველ ფარცხალაძეს რუსული პასპორტის და, შესაძლოა, რუსეთის მოქალაქეობის მოპოვებაში” დაეხმარა. 

“სანქციების სამიზნეა რუსი ოლიგარქი, რომელსაც სახელმწიფო დეპარტამენტის თქმით, რუსეთის თავდაცვის მინისტრ სერგეი შოიგუსთან პირადი კავშირები აქვს და ჩართულია ორგანიზებულ კრიმინალში, ასევე რუსეთის სადაზვერვო სამსახურის ოფიცერი და ქართველ-რუსი ოლიგარქი. სახელმწიფო დეპარტამენტში თქვეს, რომ რუსეთის ფედერალური უსაფრთხოების სამსახური მუშაობდა ოლიგარქთან, რათა ქართულ საზოგადოებასა და პოლიტიკაში რუსეთის სასარგებლოდ გავლენები გაეზარდა”. – ნათქვამია Associated Press-ის სტატიაში.

აშშ-ს უწყება აღნიშნავს, რომ ფარცხალაძე ქართულ-რუსი ოლიგარქია და იგი რუსეთის ფედერაციის ეკონომიკის მენეჯმენტის საკონსულტაციო სექტორში მუშაობდა. 

AP ასევე წერს, რომ აშშ რუსეთიდან, თურქეთიდან, არაბთა გაერთიანებულ საამიროებიდან და საქართველოდან 150-ზე მეტ ბიზნესსა და ინდივიდს ასანქცირებს, რათა კრემლის ტექნოლოგიებზე, ფულსა და ფინანსურ არხებზე წვდომა აღკვეთოს უკრაინის წინააღმდეგ ომის საწარმოებლად.

დაწესებული სანქციები გულისხმობს შემდეგ შეზღუდვებს:

• ყველა სახის საკუთრება და საკუთრების წილი, რომელიც სანქცირებულ პირს შეერთებულ შტატებში აქვს, ან თუ მისი ეს ქონება ეკუთვნის ან აკონტროლებს აშშ-ს მოქალაქე, იქნება დაბლოკილი და შეუძლებელი იქნება მისი გადაცემა, გადახდა, ექსპორტი, გამოტანა და ნებისმიერი სახის ფინანსური ტრანზაქცია.
• შეზღუდვები სანქცირებული პირის მიმართ, ან მის სასარგებლოდ, კრძალავს აშშ-დან ნებისმიერი სახის კონტრიბუციისა თუ თანხების, საქონლის გაღებასა და მომსახურების გაწევას. ასევე, იკრძალება ამავე პირისგან ნებისმიერი სახის კონტრიბუციისა თუ ფინანსების, საქონლისა და სამსახურის მიღება.
• ქონებასა და ფინანსების მიმოქცევაზე დაწესებული შეზღუდვების გარდა, სანქციები გულისხმობს აშშ-ს ტერიტორიაზე ჩასვლის აკრძალვასაც, რადგან დასანქცირებული პირები მოიაზრებიან აშშ-ს ინტერესების დამაზიანებელ პირებად. გამონაკლისი დაიშვება იმ შემთხვევაში, თუ აშშ-ს სახელმწიფო მდივანი, ან საშინაო უსაფრთხოების მდივანი დაადგენს, რომ მსგავსი ადამიანის ქვეყანაში შესვლა აშშ-ს ინტერესებთან წინააღმდეგობაში არ იქნება.
• სანქციების ფარგლებში იკრძალება დაწესებული შეზღუდვების დარღვევა და მათთვის გვერდის ავლა.

● როგორ მივიდა საქართველოს სასამართლო სისტემა დასავლურ სანქციებამდე
● თეა წულუკიანი: მინდა მკაცრად, ხმამაღლა და პრინციპულად დავგმო აშშ-ს გადაწყვეტილება
● სახელმწიფო დეპარტამენტი: გვაქვს სანდო ინფორმაცია, რომ მოსამართლეები ჩართულები იყვნენ კორუფციაში

ვინ არის “ქართველი-რუსი ოლიგარქი” ოთარ ფარცხალაძე?

ოთარ ფარცხალაძე — საქართველოს გენერალური პროკურორი 2013 წლის 7 ნოემბრიდან 30 დეკემბრამდე. 2008 წლამდე მუშაობდა შინაგან საქმეთა სამინისტროში, სხვადასხვა საპასუხისმგებლო თანამდებობებზე, გარდა ამისა, იყო საქართველოს პარლამენტის ენერგეტიკის დროებითი საგამოძიებო კომისიის წევრი. 2013 წლის 7 ნოემბერს საქართველოს მთავარ პროკურორად დაინიშნა, მაგრამ ამავე წლის 30 დეკემბერს გადადგა.

ფარცხალაძემ პოსტზე მხოლოდ 47 დღე იმუშავა და არაერთ სკანდალშიც გაეხვა. ერთ-ერთი სკანდალი მის დიპლომს ეხებოდა, რომლის მიღებაც ამ უკანასკნელმა 19 წლის ასაკში შეძლო; გარდა ამისა, მთავარი პროკურორი ფარცხალაძე ზეწოლაში დაადანაშაულა პატიმრობაში მყოფმა ვანო მერაბიშვილმა. სასჯელაღსრულების სამინისტრომ ეს ფაქტი არ დაადასტურა, ქვეყანამ ბრალდება არ გამოიძია, რის გამოც ადამიანის უფლებათა ევროპულმა სასამართლომ შესაბამისი გადაწყვეტილებაც გამოიტანა საქმეზე “მერაბიშვილი  საქართველოს წინააღმდეგ”.

სკანდალი, რის შემდეგაც ფარცხალაძე გადადგა, უკავშირდებოდა წარსულში მის ნასამართლეობას გერმანიაში {გავრცელებული ცნობით ბოტასების ქურდობისთვის}. ნასამართლეობის ფაქტი ფარცხალაძემაც დაადასტურა, თუმცა მან თქვა, რომ გერმანიის მართლმსაჯულება არა ქურდობას, არამედ პოლიციისადმი წინააღმდეგობის გაწევას ედავებოდა.

ოთარ ფარცხალაძემ მთავარი პროკურორის თანამდებობიდან ბიზნესში გადაინაცვლა. იგი ასევე ყოფილ პრემიერმინისტრ ბიძინა ივანიშვილის ოჯახთან დაახლოებული პირია.

უკვე 2022 წელს წელს ოთარ ფარცხალაძე რუსეთის მოქალაქე გახდა. ოფიციალური დოკუმენტებით დასტურდება რომ 2022 წლის 15 თებერვალს, რუსეთის იუსტიციის სამინისტრომ “მასკოვსკი ბიზნეს ბროკერჯი” დაარეგისტრირა. კომპანიას სამი მფლობელი ჰყავს. ყველაზე მსხვილი აქციონერი და 50% წილის მფლობელი ოთარ ანზორის ძე ფარცხალაძეა. რუსეთის სახელმწიფო რეესტრის მე-60 გრაფაში პირდაპირ წერია, რომ საქართველოს ყოფილი პროკურორი რუსეთის მოქალაქეა.

რას საქმიანობს ოთარ ფარცხალაძის კომპანია რუსეთში?

ყიდის და ყიდულობს უძრავ ქონებას, ის ვაჭრობს მოსკოვის ბირჟაზე აქციებით, ობლიგაციებითა და უცხოური ვალუტით. ყიდის სამედიცინო აღჭურვილობას, აშენებს და არემონტებს საავადმყოფოებს, უცხოელ ინვესტორებს სთავაზობს, რუსეთში ბიზნესების ყიდვას.

საქართველოს ყოფილი მთავარი პროკურორის კომპანია კრემლის წინ მდებარეობს. ის ოფისს რუსეთის მოქალაქე ორ პარტნიორთან ერთად ფლობს – ნიკოლოზ კარტოზიასა და ვიქტორია ბოკერიასთან.

ამასთან, ირკვევა ისიც, რომ ოთარ ფარცხალძემ მოიპოვა უფლება ბიზნესი აკეთოს ლამის ყველა სფეროში. საქართველოს ყოფილ მთავარ პროკურორს მიენიჭა უფლება, დაკავდეს ხილისა და ბოსტნეულის, ალკოჰოლური სასმელების, თამბაქოს, შაქრის, შოკოლადისა და საკონდიტრო ნაწარმის, ასევე ჩაის, ყავის, კაკაოს საბითუმო ვაჭრობითაც.

● “სამართლებრივი და პოლიტიკური მხარე” – როგორ ხსნის იურისტი გურამ იმნაძე მოსამართლეთა დასანქცირების ფაქტს
● გია ნოდიას მოსაზრება: ამერიკა არ აპირებს, შეიწყნაროს ოცნების კურსი

ეს უკვე მეორე შემთხვევაა, როდესაც საქართველოს სტრატეგიული პარტნიორი ამერიკის შეერთებული შტატები ქართველი მოქმედი თუ ყოფილი საჯარო მოხელეების მიმართ სანქციებს აწესებს.

5 აპრილს, ამერიკის სახელმწიფო დეპარტამენტმა “მნიშვნელოვანი კორუფციული საქმიანობის გამო” მოსამართლეებს მიხელ ჩინჩალაძეს, ლევან მურუსიძეს, ირაკლი შენგელიას და  ვალერიან ცერცვაძეს, ასევე მათი ოჯახის წევრებს, სანქციები დაუწესა და შეერთებულ შტატებში შესვლა აუკრძალა. ამის შესახებ აშშ-ს სახელმწიფო მდივნის, ენტონი ბლინკენის განცხადებაშია ნათქვამი. 

ენტონი ბლინკენი აღნიშნავს, რომ მათ, როგორც სასამართლოს თავმჯდომარეებმა და იუსტიციის უმაღლესმა წევრებმა, ბოროტად გამოიყენეს საკუთარი თანამდებობები.

დამოუკიდებელი ექსპერტები და უფლებადამცველები უკვე წლებია აღნიშნავენ, რომ ლევან მურუსიძე და მიხეილ ჩინჩალაძე საქართველოში ხელმძღვანელობენ ე.წ. მოსამართლეთა მძლავრ „კლანს“, რომელიც ბლოკავს საქართველოსა და ევროკავშირს შორის კავშირების გასაძლიერებლად საჭირო რეფორმებს.