აშშ-მ ბიძინა ივანიშვილს ფინანსური სანქციები დაუწესა
სანქციები ბიძინა ივანიშვილს
აშშ-მა ბიძინა ივანიშვილს ფინანსური სანქციები დაუწესა. მისი სახელი OFAC-ის სიაში თბილისის დროით 20:00-ზე გამოჩნდა. OFAC-ის სიის თანახმად, ივანიშვილის სანქცირება რუსეთის წინააღმდეგ დაწესებული სანქციების პაკეტის ნაწილია.
როგორც ცნობილია, ივანიშვილის მთელი ქონება, რომელიც შეერთებულ შტატებში და აშშ-ის მოქალაქეების მფლობელობაში ან კონტროლშია, დაიბლოკება.
● სანქციების გადაწყვეტილებაში აღნიშნულია, რომ ფინანსური სანქციები შეეხება ნებისმიერ კომპანიას, რომელშიც ის 50%-ზე მეტს ფლობს.
● ამასთან, OFAC-ის თანახმად, ტრანზაქციების შეჩერება ეხება მათ შორის სინგაპურის დავაში მოგებული დავის ფარგლებში მისთვის მიკუთვნებული კომპენსაციის ჩარიცხვას. აღნიშნულთან მიმართებით ნათქვამია, რომ ივანიშვილს აღნიშნული თანხის მიღება შეეძლება მხოლოდ მაშინ თუკი OFAC-ი შესაბამის თანხმობას გასცემს.
● აკრძალვები ეხება ტრანზაქციებს დაკავშირებულს რუსეთის ცენტრალურ ბანკთან, რუსეთის ეროვნული სიმდიდრის ფონდთან და რუსეთის ფინანსთა სამინისტროსთან. ამასთან, აკრძალვა ეხება ნებისმიერ ტრანზაქციას, რაც დაკავშირებულია სინგაპურის სააპელაციო სასამართლოს საქმესთან კრედიტ სუისი ბიძინა ივანიშვილის და სხვების წინააღმდეგ და სხვა დაკავშირებულ სამართალწარმოებასთან.
● ასევე, აკრძალვა ეხება ნებისმიერი გადაწყვეტილების, ბრძანების, გადაწყვეტილების ან მორიგების შეთანხმების აღსრულებას, რომელიც წარმოიქმნება ასეთი სამართალწარმოებიდან. ასევე, ეხება ნებისმიერი განაჩენის, ბრძანების, ჯილდოს ან შეთანხმების აღსრულებას, რომლებიც აღნიშნული პროცესებიდან წარმოიშვა.
“მთელი ქონება, რომელიც განთავსებულია შეერთებულ შტატებში, ან აშშ-ის პირების მფლობელობაში ან კონტროლში, დაიბლოკება (ანუ გაიყინება).
ბიძინა ივანიშვილის ხელმძღვანელობით, ქართულმა ოცნებამ წინ წასწია კრემლის ინტერესები საქართველოს ევრო-ატლანტიკური ტრაექტორიის რელსებიდან გადაყვანით, რაც პირდაპირ ეწინააღმდეგება იმას, რასაც ითვალისწინებს საქართველოს კონსტიტუცია და ქართველი ხალხი”, – წერს სახაზინო დეპარტამენტი.
“აშშ ასანქცირებს ბიძინა გრიგორის ძე ივანიშვილს, “ქართული ოცნების” დამფუძნებელსა და საპატიო თავმჯდომარეს. მისმა ქმედებებმა შესაძლო გახადა ადამიანის უფლებების დარღვევები და ძირი გამოუთხარა ქართველი ხალხის დემოკრატიულ და ევროპულ მომავალს რუსეთის ფედერაციის სასარგებლოდ”. – წერს აშშ-ს სახდეპის სპიკერი, მეთიუ მილერი.
ამასთან, ივანიშვილის წინააღმდეგ ფინანსურ სანქციებს აშშ-ის სახელმწიფო დეპარტამენტიც ეხმაურება და აღნიშნავს, რომ ოლიგარქისა და ქართული ოცნების ქმედებებმა გაანადგურა დემოკრატიული ინსტიტუტები, ხელი შეუწყო ადამიანის უფლებების დარღვევასა და შეზღუდა ფუნდამენტური თავისუფლებები.
“შეერთებული შტატები სანქიებს უწესებს საქართველოს მმართველი პარტიის, ქართული ოცნების, დამფუძნებელსა და საპატიო თავმჯდომარეს, ბიძინა გრიგორის ძე ივანიშვილს რუსეთის ფედერაციის საკეთილდღეოდ საქართველოს დემოკრატიული და ევროატლანტიკური მომავლის ძირის გამოთხრისთვის. ივანიშვილისა და ქართული ოცნების ქმედებებმა გაანადგურა დემოკრატიული ინსტიტუტები, ხელი შეუწყო ადამიანის უფლებების დარღვევას და შეზღუდა ფუნდამენტური თავისუფლებების განხორციელება საქართველოში.
გარდა ამისა, შეაფერხა საქართველოს ევროატლანტიკური მომავალი – მომავალი, რომელიც ქართველ ხალხს უსაზღვროდ სურს. შედეგად, საქართველო დაუცველი გახდა რუსეთის წინაშე, რომელიც აგრძელებს საქართველოს ტერიტორიის 20 პროცენტზე მეტის ოკუპაციას.
ჩვენ კატეგორიულად ვგმობთ ქართული ოცნების ქმედებებს ივანიშვილის ხელმძღვანელობით, მათ შორის საქართველოს მოქალაქეების, მომიტინგეების, მედიის წევრების, უფლებადამცველებისა და ოპოზიციის წარმომადგენლებზე მიმდინარე ძალადობრივი რეპრესიების ჩათვლით.” – ვკითხულობთ აშშ-ის სახელმწიფო დეპარტამენტის განცხადებაში.
გადაწყვეტილება მიღებულია პრეზიდენტ ჯო ბაიდენის 2021 წელს მიღებული 14024-ე განკარგულების საფუძველზე.
ეს არის განკარგულება, რომელიც აშშ-ის პრეზიდენტმა ჯო ბაიდენმა 2021 წლის 15 აპრილს გამოსცა რუსეთის ფედერაციის საზიანო ქმედებების საპასუხოდ.
14024 აღმასრულებელი განკარგულების საფუძველზე, რომლის ქვეშაც ივანიშვილის სანქცირება მოექცევა, პირის ქონება და ინტერესები აშშ-ის იურისდიქციაში იყინება, ხოლო ამერიკულ კომპანიებსა და მოქალაქეებს ეკრძალებათ მასთან ფინანსური ან კომერციული ურთიერთობა. შედეგად, ხდება პირის იზოლაცია არა მხოლოდ ამერიკული, არამედ ხშირად გლობალური ფინანსური სისტემებიდან, რადგან საერთაშორისო ინსტიტუტები და კომპანიები ხშირად ემორჩილებიან სანქციებს მეორადი სანქციების თავიდან აცილების მიზნით.
სანქციების ისტორია მოკლედ
ისტორიაში პირველად, საქართველოში, დასავლელი პარტნიორებისგან – ამერიკის შეერთებული შტატების, ევროკავშირის წევრი ქვეყნების მხრიდან, ათობით ადამიანია დასანქცირებული.
სანქცირებულთა შორის არიან მაღალი თანამდებობის პირები, მოსამართლეები, პარლამენტის დეპუტატები, ბიზნესმენები, კერძო პირები და “ქართული ოცნების” სხვა წევრები.
სანქციები მრავალფეროვანია.
110-ზე მეტ ადამიანს აქვს ამერიკის შეერთებული შტატების სავიზო შეზღუდვა. ეს შეზღუდვა ეხება დასანქცირებული ადამიანების ოჯახის წევრებსაც. შესაბამისად, იმ პირთა რიცხვი, რომლებიც ვერ შეძლებენ ამერიკის შეერთებულ შტატებში მოგზაურობას, რამდენიმე ასეულია.
ასობით ადამიანი (ზუსტი სია არ არსებობს) ვისაც აქვს დიპლომატიური პასპორტები, სანქციები დაუწესა ევროკავშირმა – ისინი ვეღარ შეძლებენ დიპლომატიური პასპორტებით უვიზოდ მოგზაურობას.
6 ადამიანია ე.წ. მაგნისტკის სიაში – ეს არის მკაცრი ფინანსური სანქცია, რომელიც დასანქცირებული პირების მთელი ქონების, წილების და ფინანსების გაყინვას გულისხმობს. ამ ექვს ადამიანს შორის 4 მაღალი თანამდებობის მქონე პირი;
40-ზე მეტი პირი დასანქცირებულია ბალტიის ქვეყნების მიერ;
19 პირს დაუწესა პერსონალური სანქციები უკრაინამ
არაერთი ჩინოვნიკი ერთდროულად რამდენიმე სანქციების პაკეტშია. მაგალითად, შინაგან საქმეთა მინისტრი, ვიცე პრემიერი ვახტანგ გომელაური. ის მოხვდა ყველა ქვეყნის სანქციებში, არის მაგნიტსკის სიაშიც.
დასავლელი პარტნიორები ქართველი მაღალჩინოსნების მიმართ სანქციებს აწესებენ დემოკრატიისთვის ხელშეშლის, ადამიანის უფლებების დარღვევის, დეზინფორმაციის გავრცელების, კორუფციისა და დემონსტრანტებისა და ჟურნალისტების მიმართ სასტიკი რეპრესიების გამო.
