"სანამ სტრასბურგი სააკაშვილის საქმეს განიხილავს, ის უნდა გათავისუფლდეს" - ევროპარლამენტარების წერილი
ციხეში მყოფი საქართველოს ყოფილი პრეზიდენტის, მიხეილ სააკაშვილის პატიმრობასთან დაკავშირებით ექვსი ევროპარლამენტარი განცხადებას ავრცელებს, სადავ აღნიშნავენ, რომ სააკაშვილი უნდა გათავისუფლდეს, სანამ მის საქმეს ადამიანის უფლებათა ევროპული სასამართლო განიხილავს.
განცხადებას ხელს ანდრიუს კუბილიუსი, რასა იუკნევიჩიენე, რიჰო ტერასი, მირიამ ლექსმანი და სანდრა კალნიეტე აწერენ.
წერილში ვკითხულობთ, რომ საქართველომ, როგორც ევროკავშირთან ასოცირებულმა ქვეყანამ, თავის თავზე აიღო პასუხისმგებლობა დაეცვა ევროპული ღირებულებები და პრინციპები, სწორედ აქედან გამომდინარე, საქართველოს ევროპელი პარტნიორები მოელიან მთავრობისგან და მმართველი პარტიისგან ამ პრინციპებისა და სტანდარტების სრულად დანერგვასა და ერთგულებას:
“ახალგაზრდა დემოკრატიებში, რომლებიც ჯერ კიდევ ებრძვიან პოსტოტალიტარულ პოსტსაბჭოურ ჩვევებს, მაგალითად უკრაინაში იანუკოვიჩის პერიოდი, ყოფილი პრეზიდენტის ან პრემიერმინისტრის დაკავება მსგავს ევროპულ ქვეყანაში დაუყოვნებლივ უგზავნის სიგნალს მსოფლიოს, რომ ამ ქვეყანაში დემოკრატია და კანონის უზენაესობა შესაძლოა უარესდებოდეს.“
ევროპარლამენტარების თქმით, საქართველოში ყოფილი პრეზიდენტის ციხეში ყოფნა, აჩენს კითხვებს პოლიტიკური ხასიათის დევნაზე. ისინი ხაზს უსვამენ იმას, რომ პრემიერ-მინისტრ ღარიბაშვილის საჯარო განცხადებები მხოლოდ ადასტურებს სააკაშვილის საქმეების პოლიტიკურ მოტივებს და აბსოლუტურად მიუღებელია ევროპული ტიპის მართლმსაჯულებისთვის, რადგან ის ძირს უთხრის ხალხის მიერ საქართველოს ევროპულ გზის არჩევანს.
ასევე, წერილის ხელმომწერთა განმარტებით, საქართველოს ევროპული მომავალი საფრთხის წინაშეა. მთავრობასა და “ქართულ ოცნებას” კი ამ სიტუაციასა და მის მოგვარებაზე მთავარი პასუხისმგებლობა აკისრია:
“ისინი დგანან არჩევანის წინაშე – გააგრძელოს უარყოფითი შედეგების გაუარესება, პოლარიზაციისა და უნდობლობის გაღვივება, სანამ სააკაშვილი ციხეში რჩება, ან დააბრუნონ თავიანთი ყურადღება მცდელობაზე, რათა დაცული იქნეს ევროპული მისწრაფებებისთვის მნიშვნელოვანი კანონის უზენაესობა და ევროპული ტიპის სამართლებრივი სტანდარტები.”
ისინი აღნიშნავენ იმასაც, რომ მიხეილ სააკაშვილის საქმე ადამიანის უფლებათა ევროპულ სასამართლოში გადაცემული და სწორედ ეს არის ის გზა, რომ ევროპული სამართალი შემოვიდეს საქართველოს მომავლისთვის უმნიშვნელოვანეს საქმეში.
“ევროკავშირი ახლოდან დააკვირდება მის განხილვებსა და დასკვნების საპასუხო ქმედებებს. სანამ ადამიანის უფლებათა ევროპული სასამართლო ამ საქმეს განიხილავს, ბატონი სააკაშვილი ციხიდან უნდა გათავისუფლდეს”, – წერია ევროპარლამენტარების განცხადებაში.
● რატომ ჩამოვიდა სააკაშვილი და იქნება თუ არა ქართული მაიდანი – გია ნოდიას თვალსაზრისი
● ტრუსკავეციდან “უმაღლესი დონის” სპეცოპერაციამდე. მიხეილ სააკაშვილი ციხეშია – რა იქნება შემდეგ?
19 ოქტომბერს გავრცელდა მიხეილ სააკაშვილის მხარდამჭერი კიდევ ერთი წერილი, რომელიც, ევროპარლამენტარ ანა ფოტიგას ინიციატივით შედგა და რომელსაც 72 ხელმომწერი ჰყავს. ევროპარლამენტარებთან ერთად, ხელმომწერებს შორის არიან ლიეტუვის სეიმის წევრები, ყოფილი პრეზიდენტები, ცნობილი პოლიტიკური და საზოგადო მოღვაწეები.
ხელმომწერები აცხადებენ, რომ სააკაშვილის პატიმრობა უნდა შეწყდეს მანამ, სანამ ის არ წარდგება სამართლიანი სასამართლო პროცესის წინაშე.
ევროპარლამენტარების თქმით, სააკაშვილის დაპატიმრება ემსახურება მხოლოდ პოლიტიკური კრიზისის გაღრმავებას, რომელსაც საქართველო აწყდება წლების განმავლობაში უკიდურესი პოლარიზაციის შედეგად, რაც გამოწვეულია თავისუფალი პრესის კონტროლის, ჟურნალისტების, ოპოზიციური პოლიტიკოსების, აქტივისტების და თვით უცხოელი დიპლომატების დაშინებისა და ფარული თვალთვალის მცდელობებით. ასევე, მართვაში პოლიტიკური ოპოზიციისთვის სივრცისა და რესურსების შეზღუდვით.
● თავისუფლება მიშას: რას ფიქრობენ ექსპერტები ბოლო ცხრა წლის ყველაზე ხალხმრავალ აქციაზე
● უკრაინული მიშა
● ხუთი ნიშანი, რომელიც მიუთითებს, რომ საქართველოში თვითმმართველობა არ არის
საქართველოს მესამე პრეზიდენტი მიხეილ სააკაშვილი პროტესტის ნიშნად უკვე 20-ე დღეა, შიმშილობს. პირადი ექიმის ინფორმაციით, მისი მდგომარეობა დამძიმებულია. გუშინ მასთან იუსტიციისა და ჯანდაცვის სამინისტროს სპეციალური ჯგუფი იმყოფებოდა, რომლებმაც განაცხადეს, რომ თუ სააკაშვილის სურვილი იქნება, ის გადაყვანილი იქნება კლინიკა “ვივამედში.”
დღეს კი მესამე პრეზიდენტი ექიმების მხრიდან მედიკამენტოზურ ჩარევაზე დათანხმდა.
“სანამ დაპატიმრებული ვარ, საკვებს არ მივიღებ არცერთი ფორმით და მზად ვარ სიკვდილისთვისაც. ამავე დროს მინდა ბოლომდე შემრჩეს საღი აზროვნება და შრომისუნარიანობა, ამიტომ თანახმა ვარ ექიმების მხრიდან მედიკამენტოზურ ჩარევაზე, რომელიც სწორად დამეხმარება გონზე ყოფნაში და თუნდაც ძალიან შეზღუდულად, მაგრამ მაინც მიმდინარე მოვლენებში მონაწილეობის მიღებაში, რათა სადამდეც შემეძლება, გამოვადგე საქართველოს. ახლა საზოგადოება ძალიან მობილიზებულია მიუხედავად ჩემი პირადი მდგომარეობისა, როგორც არასდროს, ოპტიმისტურად ვარ განწყობილი”, – წერს მიხეილ სააკაშვილი წერილში, რომელიც მისმა ადვოკატმა, დიმიტრი საძაგლიშვილმა გაასაჯაროვა.
სააკაშვილი თბილისში 1 ოქტომბერს დააკავეს, მას შემდეგ, რაც იგი ფარულად დაბრუნდა სამშობლოში.
მესამე პრეზიდენტის წინააღმდეგ საქართველოში რამდენიმე სისხლის სამართლის საქმეა აღძრული, ერთ საქმეზე იგი უკვე გასამართლებულია და ექვსი წლით თავისუფლების აღკვეთა აქვს მისჯილი. ძებნილის სტატუსის მქონე ექს-პრეზიდენტი დაკავებისთანავე რუსთავის 1212 საპყრობილეში გადაიყვანეს. იმავე საღამოს მან შიმშილობა დაიწყო.
