საქართველოს შსს-მ სამშობიაროებიდან ჩვილების სავარაუდოდ გაყიდვის ფაქტებზე გამოძიება დაიწყო

სამშობიაროებიდან ჩვილების სავარაუდოდ გაყიდვის ფაქტებზე გამოძიება დაიწყო

გასული საუკუნის 80-90-იან წლებში დაბადებული ჩვილების, სავარაუდოდ, უკანონო გაყიდვის ფაქტებზე შსს-მ გამოძიება დაიწყო. საქმე ეხება სოციალურ ქსელში შექმნილი ჯგუფ „ვეძებ“-ის მიერ გავრცელებულ ინფორმაციას, რომლის ადმინისტრატორი თამუნა მუსერიძე შსს-მ უკვე დაკითხა. როგორც უწყებაში განმარტავენ, მათ ასევე აქვთ ინფორმაცია 2003 წელს დაბადებული ორი ჩვილის უკანონო გაშვილების შესახებაც.

გამოძიება დაიწყო სისხლის სამართლის კოდექსის 143-ე სეკუნდა მუხლის პირველი ნაწილით, რაც გულისხმობს არასრულწლოვანით ვაჭრობას და ისჯება თავისუფლების აღკვეთით 8-დან 12 წლამდე.

როგორც მუსერიძემ “რადიო თავისუფლებას” უთხრა, სამართალდამცავებს მიაწოდა ინფორმაცია იმ ფაქტების შესახებ, რაც მას და ჯგუფის სხვა მოდერატორებს, უკანასკნელი ორი წლის განმავლობაში დაუგროვდათ.

დედა-შვილობა სკაიპით. ათასობით ემიგრანტი ქალი ვერ ხედავს, როგორ იზრდებიან მათი შვილები

ქართველი ბავშვების და დედების ეს იძულებითი განშორება უკვალოდ ვერ ჩაივლის, ამბობენ ექსპერტები

ჯგუფში „ვეძებ“, რომელიც 170 ათასზე მეტ მომხმარებელს აერთიანებს, სისტემატურად ვრცელდება ინფორმაცია წლების განმავლობაში საქართველოში არსებული სხვადასხვა სამშობიაროებიდან ჩვილების, სავარაუდოდ, უკანონო გაშვილებისა და გაყიდვის შემთხვევების შესახებ.

„შინაგან საქმეთა სამინისტრო თავად დაგვიკავშირდა. გამოთქვეს დახმარების სურვილი. მიუხედავად იმისა, რომ ძალიან ბევრი დადასტურებული ფაქტი გვაქვს, გვყავს შვილები, რომლებიც წლების წინ მკვდრად გამოაცხადეს სამშობიაროებში და შემდეგ ცოცხლები ვიპოვეთ, დნმ-ის ტესტმაც დაადასტურა მათი ბიოლოგიური კავშირი მშობლებთან, სამწუხაროდ, ამ საქმეების უმეტესობა, ხანდაზმულია და ჩვენ ახლა ვერავის დასჯას ვეღარ მოვითხოვთ. მაგრამ შინაგან საქმეთა სამინისტრო მაინც დაინტერესდა ამ ფაქტებით და გვითხრეს, რომ აუცილებლად ითანამშრომლებენ ჩვენთან. დეტალურად გამომკითხეს ინფორმაცია რამდენიმე ფაქტის შესახებ. მითხრეს, რომ კიდევ დამიკავშირდებიან, რათა სხვა დეტალებიც განვიხილოთ“, – ამბობს მუსერიძე.

როგორც თამუნა მუსერიძე განმარტავს, 2021 წლიდან – მას შემდეგ, რაც სოციალურ ქსელში ჯგუფი „ვეძებ“ შეიქმნა – მოხერხდა 500-მდე ბიოლოგიური ოჯახის დაკავშირება, რომელთა შორისაც არიან უკანონოდ გაშვილებული/გაყიდული ბავშვებიც, რომლებიც, მისი თქმით, ათწლეულების წინ სამშობიაროებში გარდაცვლილებად გამოაცხადეს, შემდეგ კი უკანონოდ გაყიდეს, მათ შორის საზღვარგარეთაც.

თამუნა მუსერიძე “რადიო თავისუფლებას” ასევე ეუბნება, რომ გაშვილებული მოქალაქეების საკმაოდ მნიშვნელოვანი ნაწილი, რომელიც სახელმწიფო ზრუნვისა და ტრეფიკინგის მსხვერპლთა სააგენტოში მათი პირველადი სახელისა და გვარის ინფორმაციას ითხოვს, ამ მონაცემს სააგენტოსგან ვერ იღებს, რაც, მისი თქმით, იმის მანიშნებელია, რომ ქვეყანაში ბავშვების უდიდესი ნაწილი უკანონოდაა გაშვილებული.