სამი დეპუტატი ცხინვალიდან "ქართულ ლობს“ რუსეთის მოქალაქეობის ჩამორთმევაში ადანაშაულებს
სამხრეთ ოსეთის დეპუტატებს რუსეთის მოქალაქეობა ჩამოერთვათ
ცხინვალში ღვივდება კონფლიქტი ალან გაგლოევსა და მის ყოფილ მხარდამჭერებს შორის საპარლამენტო ოპოზიციიდან. პარლამენტის სამი წევრი, დავით სანაკოევი, გარი მულდაროვი და ჯამბულატ მედოევი – რომლებიც მხარს უჭერდნენ გაგლოევს 2022 წლის საპრეზიდენტო არჩევნებში – ახლა მას რუსეთის მოქალაქეობის ჩამორთმევაში ადანაშაულებენ.
მათი თქმით, ეს მას შემდეგ მოხდა, რაც დეპუტატებმა წამოაყენეს ინიციატივა “საქართველოსთან საზღვრების 1922 წლის ფორმატში დაბრუნების შესახებ“ და აცხადებენ, რომ სამხრეთ ოსეთში პროქართული ძალები ძლიერდებიან.
ვინაიდან სამხრეთ ოსეთი ნაწილობრივ აღიარებული რესპუბლიკაა, მის პასპორტს პრაქტიკულად არ აქვს საერთაშორისო მოქმედების ვადა. ამიტომ, ცხინვალის რეგიონის მოსახლეობის უმრავლესობას მეორე, რუსეთის მოქალაქეობა აქვს, მისი დაკარგვა კი ნიშნავს მრავალი პრივილეგიის დაკარგვას, მათ შორის მსოფლიოში გადაადგილების შესაძლებლობის.
რუკა, რომელმაც კონფლიქტი გამოიწვია
დავით სანაკოევს, გარი მულდაროვს და ჯამბოლატ მედოევს რუსეთის მოქალაქეობა 2024 წლის თებერვლის დასაწყისში, რუსეთის უშიშროების ფედერალური სამსახურის გადაწყვეტილებით ჩამოართვეს.
თავად დეპუტატების თქმით, რეალური მიზეზი იყო მათი „ინიციატივა საქართველოსთან სამხრეთ ოსეთის საზღვრის გადახედვის საკითხზე“: მათ შესთავაზეს ხელისუფლებას 1922 წელს შექმნილი ჩარჩოს დაბრუნება.
1922 წელს სამხრეთ ოსეთის ავტონომიური ოლქი საქართველოს სსრ-ის შემადგენლობაში შეიქმნა. თუმცა საბჭოთა კავშირის არსებობის პერიოდში რამდენჯერმე გადაიხედა ამ ავტონომიის ადმინისტრაციული საზღვრები.
2008 წელს რუსეთმა ცნო სამხრეთ ოსეთის (საქართველოსგან) დამოუკიდებლობა 1990 წლის საზღვრებში, რაც მის ტერიტორიას 1922 წელთან შედარებით ოდნავ მცირეს ხდის. სამხრეთ ოსეთის ზოგიერთი პოლიტიკოსი, მათ შორის ხსენებული დეპუტატები, მიიჩნევენ, რომ ეს ხაზი ისე უნდა გაივლოს, როგორც ეს იყო 1922 წელს.
რუსული მხარე მიიჩნევს, რომ არსებულ პირობებში უმჯობესია ცხინვალმა თავი შეიკავოს შემდგომი ტერიტორიული დავებისგან.
საქართველო, საერთაშორისო საზოგადოება და კანონმდებლობა არ ცნობს ამ საზღვარს და სამხრეთ ოსეთს საქართველოს ტერიტორიის ნაწილად მიიჩნევს.
დეპუტატები სანაკოევი, მულდაროვი და მედოევი აცხადებენ, რომ მათი წინადადება რუსეთში აღიქმებოდა, როგორც „მოქმედებები, რომლებიც იწვევს დაძაბულობის გაზრდას რუსეთის საზღვართან“, მაგრამ კონკრეტულად რა ქმედებები იყო ეს, არ დაზუსტებულა.
დეპუტატების თქმით, რუსეთი ცდილობს თავი აარიდოს საქართველოსთან ვითარების გამწვავებას.
მოვლენები 28 მარტს განვითარდა, როდესაც დეპუტატები რუსეთის ტერიტორიაზე 2008 წლიდან აღიარებული სამხრეთ ოსეთის მოქალაქეების პასპორტებითაც კი არ შეუშვეს.
მათზე გაცემულ დოკუმენტში ნათქვამია, რომ დეპუტატებს რუსეთში შესვლა 2049 წლის 18 მარტამდე ეკრძალებათ. დოკუმენტში კონკრეტულად წერია, რომ გვარის, სახელის და სხვა პერსონალური მონაცემების შეცვლითაც კი, რუსეთში შესვლის უფლებას ვერ მიიღებენ.
როგორც დეპუატებს განემარტათ, რუსეთის ტერიტორიაზე შესვლა შეიძლება აიკრძალოს “თუ ეს აუცილებელია სახელმწიფოს თავდაცვისუნარიანობის, უსაფრთხოების ან საზოგადოებრივი წესრიგის უზრუნველსაყოფად.”
- „მოსკოველი კურატორები მოითხოვენ, რომ სამხრეთ ოსეთმა არ გააღიზიანოს თბილისი“. მოსაზრება ცხინვალიდან
- ცხინვალი: რატომ არ გაუადვილებს ფერმერებს ცხოვრებას „გამარტივებული წვდომა“
- რუსმა სამხედროებმა გორის მუნიციპალიტეტში საქართველოს მოქალაქე მოკლეს. თბილისი საერთაშორისო რეაგირებას ითხოვს
დავიწყებული დღის წესრიგი
წარსულში, როგორც ოპოზიციონერი, ეს სამივე დეპუტატი, ალან გაგლოევთან ერთად, მკაცრად აკრიტიკებდა სამხრეთ ოსეთის მაშინდელ პრეზიდენტს ანატოლი ბიბილოვს „სოფელი წნელისა და 200 კვ.მ სამხრეთ ოსეთის მიწის საქართველოსთვის დათმობისთვის.
ეს ბრალდებები სხვა ფაქტორებთან ერთად დაეხმარა გაგლოევს ბიბილოვზე გამარჯვებაში და პრეზიდენტი გახდა. თუმცა, პრეზიდენტის სავარძელში ჩაჯდომის შემდეგ გაგლოევი არ ჩქარობს ამ კვადრატული კილომეტრის დაბრუნებას. უფრო მეტიც, მან დღის წესრიგიდან ამოიღო „გაყიდული ტერიტორიების“ თემა და საერთოდ აკრძალა საქართველოსთან ტერიტორიული დავების ხსენება.
ამით უკმაყოფილო ყოფილმა თანამებრძოლებმა მას წინასაარჩევნო დაპირებები შეახსენეს.
ვინ არის დამნაშავე: „ქართული ლობი“ თუ გაგლოევი?
დავით სანაკოევმა, უპირველეს ყოვლისა, „პროქართულ ლობი სამხრეთ ოსეთში“ დაადანაშაულა.
„ამას ვუკავშირებ რუსეთ-საქართველოს შორის ურთიერთობების დათბობას და სამხრეთ ოსეთში პროქართული ლობის მუშაობას. მე და ჩემი კოლეგები ყველა კანონიერი საშუალებით და საჯაროდ დავიცავთ ჩვენს უფლებებს“, – ამბობს სანაკოევი.
სამმა დეპუტატმა უკვე სცადა რუსეთის სასამართლოში მოქალაქეობის ჩამორთმევის შესახებ გადაწყვეტილების გასაჩივრება, მაგრამ მათ უარი ეთქვათ საქმის განხილვაზე.
„ამას მივაწერ იმას, რომ სასამართლოს უბრალოდ არ სურს მონაწილეობა მიიღოს საქმეში, რომელმაც უკვე მიიღო პოლიტიკური სკანდალის ხასიათი და მიიპყრო ფედერალური მედიის ყურადღება“, – ამბობს სანაკოევი.
ამასთან, სანაკოევი, მულდაროვი და მედოევი დარწმუნებულნი არიან, რომ ამ ყველაფრის უკან პრეზიდენტი ალან გაგლოევი დგას. რომ ის არის ის, ვინც “ხლართავს” ინტრიგებს, ეწევა დეზინფორმაციას და მათ საქმიანობას „ანტირუსულად“ წარმოაჩენს, რათა 2024 წლის 9 ივნისს დაგეგმილი საპარლამენტო არჩევნების წინ კონკურენტები მოიცილოს.
სანაკოევი სასამართლოს გზით მოქალაქეობის აღდგენის იმედს არ კარგავს. ასევე, დეპუტატებმა კიდევ ერთხელ მოითხოვეს პასუხი ალან გაგლოევისგან, თუმცა ამას მხოლოდ შეხლა-შემოხლა და ურთიერთბრალდებები მოჰყვა პარლამენტში.
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
