"ქართულმა ოცნებამ" ყოფილი სამხრეთ ოსეთის ავტონომიური ოლქის ტერიტორიაზე შექმნილი ადმინისტრაცია გააუქმა
სამხრეთ ოსეთის ავტონომიური ოლქი
“ქართული ოცნების” პარლამენტმა ყოფილი სამხრეთ ოსეთის ავტონომიური ოლქის ტერიტორიაზე შექმნილი დროებითი ადმინისტრაციულ-ტერიტორიული ერთეულის გაუქმებისა და ადმინისტრაციის ლიკვიდაციის ინიციატივა მესამე, საბოლოო მოსმენით დაამტკიცა. გადაწყვეტილება 83 ხმით, ერთხმად მიიღეს.
პარლამენტის მიერ მიღებული გადაწყვეტილებით, ძალადაკარგულად ცხადდება ორი კანონი: “ყოფილ სამხრეთ ოსეთის ავტონომიურ ოლქში კონფლიქტის მშვიდობიანი მოგვარებისათვის სათანადო პირობების შექმნის შესახებ“ და “ყოფილ სამხრეთ ოსეთის ავტონომიურ ოლქში კონფლიქტის შედეგად საქართველოს ტერიტორიაზე დაზარალებულთა ქონებრივი რესტიტუციისა და კომპენსაციის შესახებ“.
“ყოველგვარი გადაჭარბების გარეშე შეიძლება ითქვას, რომ ეს არის ისტორიული გადაწყვეტილება იმის გათვალისწინებით, რომ გვაქვს შესაძლებლობა წერტილი დავუსვათ “ნაცმოძრაობის“ რეჟიმის იმ მოღალატეობრივ ეპოპეას, რაც მათ ხსენებული საკითხის ირგვლივ 2005-2008 და მომდევნო წლებში დაატრიალეს. გრძელდებოდა ანტისახელმწიფოებრივი პოლიტიკა.
თავის დროზე, ამ ადმინისტრაციულ ტერიტორიული ერთეულის შექმნით ის ხაზი გააგრძელეს, რაც თავის დროზე – 1920-იან წლებში საქართველოში ბოლშევიკებმა შემოიტანეს. ჩვენ იმ სამართლებრივ სტატუს-კვოს უნდა დავუბრუნდეთ, რაც 1990 წელს საქართველოს რესპუბლიკის უმაღლესმა საბჭომ და მისმა ხელმძღვანელმა ზვიად გამსახურდიამ მიიღო, როცა ავტონომიური ოლქი გაუქმდა“, – განაცხადა “ქართული ოცნების“ დეპუტატმა თორნიკე ჭეიშვილმა, რომელიც აღნიშნულ საკანონმდებლო პაკეტზე მომხსენებელი იყო.
კანონპროექტის მიხედვით, დროებითი ადმინისტრაცია 2026 წლის 1 იანვრიდან იქნება ლიკვიდირებული.
ყოფილი სამხრეთ ოსეთის ავტონომიური ოლქის ტერიტორიაზე დროებითი ადმინისტრაციულ-ტერიტორიული ერთეულის ადმინისტრაციის შექმნის ბრძანებულება იმჟამინდელმა პრეზიდენტმა, მიხეილ სააკაშვილმა 2007 წლის 8 მაისს გამოსცა.
ადმინისტრაციულ-ტერიტორიული ერთეული ამ დრომდე ფუნქციონირებდა. ამჟამად მას თამაზ ბესტაევი ხელმძღვანელობს, ადმინისტრაციის საქმიანობა ფინანსდება საქართველოს სახელმწიფო ბიუჯეტიდან.
“ქართული ოცნების” პარლამენტის თავმჯდომარის, შალვა პაპუაშვილის თქმით, 2007 წლის ივნისში, “კონსტიტუციის დარღვევით” შეიქმნა დროებითი ადმინისტრაციულ-ტერიტორიული ერთეულის ადმინისტრაცია, რომელიც დაფუძნდა იმავე არაკონსტიტუციური ალტერნატიული მთავრობის ბაზაზე.
“2006 წლის ნოემბერში, “ნაციონალური მოძრაობის“ ხელისუფლების ორგანიზებით, ცხინვალის რეგიონში ჩატარდა არაკონსტიტუციური არჩევნები, რომლის შედეგადაც გამოცხადდა ე.წ. სამხრეთ ოსეთის პრეზიდენტი და ჩამოყალიბდა ე.წ. სამხრეთ ოსეთის ალტერნატიული მთავრობა. ამ ნაბიჯით იმჟამინდელმა ხელისუფლებამ სეპარატისტულ პროცესებს ირიბი ლეგიტიმაცია მიანიჭა, რაც საქართველოს სახელმწიფო ინტერესების აშკარა და მძიმე ღალატი იყო
ამ გადაწყვეტილებით, ხელოვნურად აღდგა 1990 წელს გაუქმებული სამხრეთ ოსეთის ავტონომიური ოლქის ადმინისტრაციული საზღვრები, რაც შემდგომში იქცა ერთ-ერთ ხელშემწყობ გარემოებად 2008 წლის რუსული სამხედრო აგრესიისა და საქართველოს ისტორიული რეგიონის – სამაჩაბლოს – ოკუპაციისთვის.
იმ ფონზე, როცა საქართველო წლებია მუშაობს არაღიარების პოლიტიკის გაძლიერებაზე, “ნაციონალური მოძრაობის“ რეჟიმის მიერ “სამხრეთ ოსეთის“ ტერმინის თუნდაც ირიბი გამოყენება იმთავითვე იყო კონსტიტუციის და ეროვნული ინტერესების ღალატი. არავითარი “სამხრეთ ოსეთი“ ქართულ სამართლებრივ თუ პოლიტიკურ სივრცეში არ არსებობს.” – განაცხადა პაპუაშვილმა.
