ცხინვალი: სკანდალი სპეცსამსახურებში "თვითმარქვიას" გარშემო
სამხრეთ ოსეთში მოულოდნელად ყურადღების ცენტრში ადგილობრივი სპეცსამსახურის მაღალჩინოსანი, მოსკოვიდან მოწვეული რუსეთის მოქალაქე მოექცა. ამის მიზეზი გახდა საეჭვო ფაქტები მის ბიოგრაფიაში, რომლებიც უცხოური წყაროს წყალობით გახდა ცნობილი. კერძოდ, მისი არარსებული სამხედრო დამსახურებები და ყალბი ჯილდოები. ხელისუფლება ამ სკანდალურ დანიშვნაზე კომენტარს არ აკეთებს.
ალექსეი მაქსიმოვის შესახებ, რომელიც სკანდალის გმირი გახდა, ძალიან ცოტა რამეა ცნობილი. არაოფიციალური ინფორმაციით, მაქსიმოვი სამხრეთ ოსეთში საგარეო დაზვერვის სამსახურის უფროსმა ალექსეი ვარზიევმა 2019 წელს მიიწვია.
როგორც აბმობენ, მან ერთ დღეში რესპუბლიკის მოქალაქეობის და პოლკოვნიკის წოდების მიღება მოახერხა და სამსახურის უფროსის მრჩევლის თანამდებობაზე დაინიშნა. შემდგომში მან დაიკავა სამსახურის უფროსის მოადგილის თანამდებობა. ოსური წყაროების ცნობით, მაქსიმოვი ახლა მოსკოვშია მივლინებული, სადაც საკუთარ ავს სამხრეთ ოსეთის დაზვერვის სამსახურის წარმომადგენლად წარადგენს.
მაქსიმოვი პირველად საჯაროდ აფხაზეთის პრეზიდენტის ასლან ბჟანიას სამხრეთ ოსეთში ოფიციალური ვიზიტის დროს, მიმდინარე წლის აგვისტოში გამოჩნდა. სწორედ მაშინ ვიდეოკამერებმა დაზვერვის ახალი მაღალჩინოსანი აფხაზეთისა და სამხრეთ ოსეთის წარმომადგენელთა წინა როგებში დააფიქსირეს.
მაქსიმოვის ამბავი საზოგადოებისთვის ცნობილი არ იყო, სანამ სამხრეთ ოსეთის სპეცსამსახურებში ასეთი საეჭვო ფიგურის შესახებ ინფორმაცია უცხოურ წყაროებში არ გამოჩნდა.
- უსაფრთხოების სამსახურის ანგარიში: უცხო ქვეყნის სპეცსამსახურები შიდა პროცესებში ჩარევას ცდილობდნენ
- “ღამურების სკანდალი” – სამხრეთ ოსეთში აცხადებენ, რომ საქართველოსა და აშშ-ს შეთქმულება გამოავლინეს
კერძოდ, სამხრეთ ოსეთში ყურადღება მიაქციეს გამოძიებას, რომელიც ბლოგ alterminfo.blogspot.com-ზე გამოქვეყნდა ხორვატულ ენაზე და შემდგომ ჩრდილოეთ ოსეთის ყოველკვირეულ გამოცემა „სვობოდნი ვზგლიადში“ მოხვდა, საიდანაც ტელერგამ-არხებზე გავრცელდა.
საეჭვო ბიოგრაფია
სტატიაში ნათქვამია, რომ მაქსიმოვი ალექსეი სერგეის ძე, მისი ოფიციალური ბიოგრაფიის თანახმად, 1991-93 წლებში, “იუგოსლავიაში გაეროს სამშვიდობო ძალების რუსეთის კონტინგენტის შემადგენლობაში” მსახურობდა. თუმცა, ასეთი კონტიგენტი იმ დროს არ არსებობდა – პირველი რუსული ქვედანაყოფები ბოსნიაში საერთაშორისო სამშვიდობო ძალების შემადგენლობაში მხოლოდ 1996 წელს გამოჩნდა.
გარდა ამისა, იგივე სახელის და გვარის მქონე პიროვნება – მაქსიმოვი ალექსეი სერგეის ძე, 1973 წელს დაბადებული ქალაქ ლენინგრადში, გვევლინება სამხედრო -პოლიტიკური კვლევების ცენტრის ექსპერტად, ეკონომიკის მეცნიერებათა კანდიდატად და “უსაფრთხოების, თავდაცვის და მართლწესრიგის აკადემიის” წევრ-კორესპონდენტად.
ეს ორგანიზაცია, რომელიც 2000 წლიდან 2008 წლამდე მოქმედებდა, რუსეთის უზენაესი სასამართლოს გადაწყვეტილებით იქნა ლიკვიდირებული. ამ გადაწყვეტილების მიზეზი ის იყო, რომ ორგანიზაციამ დააწესა სახელმწიფო ჯილდოების იდენტური 73 სახის ჯილდო, მათ შორის ორდენები და მედლები, ასევე დაადგინა აკადემიური ხარისხები, შემოიღო სამხედრო ფორმების მსგავსი ფორმები, ასევე სამხედრო წოდებები. ეს, პროკურატურის განცხადებით, რომელმაც სარჩელი შეიტანა, “… ქმნის პირობებს კორუფციის გამოვლინებებისთვის და დისკრედიტაციას უწევს სახელმწიფო ხელისუფლებას”.
ანუ, აქ რუსეთის პროკურატურა აკადემიური ხარისხებისა და ჯილდოების შესაძლო გაყიდვაზე მიანიშნებს.
გამოძიების ავტორები წერენ, რომ კიდევ ერთი მსგავსი ორგანიზაცია, რომელთანაც დაკავშირებულია მაქსიმოვი, “ინფორმატიზაციის საერთაშორისო აკადემიაა”, რომელიც ამჟამადაც აქტიურად საქმიანობს. ამ ორგანიზაციის გვერდზე კვლავ განთავსებულია მაქსიმოვის ფოტო, რომელზეც იგი აკადემიის პრეზიდენტისგან ჯილდოს იღებს.
ეს ორგანიზაცია რუსეთში არაერთხელ გაუკრიტიკებიათ “ცრუმეცნიერების გავრცელებისა” და დიპლომებითა და აკადემიური ხარისხით ვაჭრობის გამო და დესტრუქციულ ტოტალიტარულ სექტებს შორისაც კი მოიხსენიებდნენ.
თუმცა, ამან ხელი არ შეუშალა “ინფორმატიზაციის აკადემიას” და პირადად მაქსიმოვს მონაწილეობა მიეღოთ 2014 წელს “ამარანტის” პროექტში ავღანეთში. პროექტის მიზანი, რომელიც “აკადემიასთან” ერთად ფონდმა ЕВРАЗИС -მა და ტიმირიაზევის სახელობის სასოფლო -სამეურნეო აკადემიამ განაცორციელეს, იყო ექსპერიმენტი, რომელიც ოპიუმის ყაყაჩოს არატრადიციული სასოფლო -სამეურნეო კულტურით, ამარანტით ჩანაცვლებას ითვალისწინებდა.
ოფიციალური ინფორმაციის თანახმად, ამ პროექტში მონაწილეობა მიიღეს “აგრარიებმა სამხრეთ ოსეთიდან”. მაგრამ ამ დრომდე არც ამ პროექტის და არც “აგრარიების” შესახებ სამხრეთ ოსეთში არავის გაუგია.
“თუ დაინიშნა, ესე იგი იყო მიზეზები”
როგორ მოხდა, რომ ასეთი საეჭვო ბიოგრაფიის მქონე პირმა შეძლო მაღალი თანამდებობის დაკავება სამხრეთ ოსეთის ასეთ დახურულ ორგანიზაციაში?
JAMnews– მა ხელისუფლებისგან ოფიციალური კომენტარი მოითხოვა.
”მაქსიმოვი მოსკოვიდან მოიწვიეს და, ალბათ, ამის მოტივები სერიოზული იყო”, – აღნიშნა წყარომ სამხრეთ ოსეთის პრეზიდენტის ადმინისტრაციიდან. ადმინისტრაციამ სხვა კომენტარებისგან თავი შეიკავა.
ტელეგრამ-არხის “აფხაზია-ცენტრის” ინფორმაციით, მაქსიმოვი არა მხოლოდ დაინიშნა თანამდებობაზე სამხრეთ ოსეთის სპეცსამსახურში, არამედ სახელმწიფო დაცვის სამსახურში მისი მეგობარი ანდრეი ზახარჩენკოც დაანიშნინა.
მოსაზრება: “ხელისუფლებამ დასკვნები უნდა გამოიტანოს “
აქ ძალიან ბევრი კონსპიროლოგიაა სპეცსამსახურის თანამშრიმლისთვისაც კი – ასე აფასებს სამხრეთ ოსეთის პარლამენტის მეოთხე მოწვევის დეპუტატი როლანდ ქელეხსაევი მაქსიმოვის ბიოგრაფიისა და მისი დანიშვნის დეტალებს. მისი აზრით, სამხრეთ ოსეთის ძალოვან სტრუქტურებში “ასეთი პროცესები მიუღებელია”.
ქელეხსაევის თქმით, იგი სამხრეთ ოსეთში სამუშაოდ რუსი სპეციალისტების მოწვევას ყოველთვის მხარს უჭერდა.
“ჩამოვიდნენ მშვენიერი ადამიანები, რუსი სპეციალისტები, რომელთაც მიმართ სამხრეთ ოსეთის ხალხი მადლიერია და ღრმა პატივისცემით იხსენებს, ” – ამბობს ქელეხსაევი.
თუმცა, მისი თქმით, ყოფილა არცთუ მთლად წარმატებული მაგალითებიც, როდესაც “ზოგიერთი ჩამოსული მოხელე რესპუბლიკას პირადი გამდიდრებისთვის იყენებდა“.
რაც შეეხება ბატონი მაქსიმოვის ფიგურას, როლანდ ქელეხსაევი მიიჩნევს, რომ მისი დანიშვნა დაზვერვაში წარუმატებელი და საკამათოა, ამ ადამიანის საეჭვო და სკანდალური რეპუტაციის გათვალისწინებით:
”როგორც მე მესმის, ამ ადამიანის მიმართ არის კითხვები თავად რუსეთში და საჭირო იქნება ყველა რისკის, ყველა დადებითი და უარყოფითი მხარის აწონ-დაწონვა. არ ვიცი, როგორ შეეძლოთ ეს ადამიანი დაზვერვის სამსახურში მიეღოთ”.
მან აღნიშნა, რომ დაზვერვის სამსახური არის სტრუქტურა უშუალოდ პრეზიდენტის დაქვემდებარებაში.
”შეიძლება ისე მოხდა, რომ პრეზიდენტი არასწორად იყო ინფორმირებული, ალბათ უთხრეს, რომ ეს ოფიცერი რუსეთიდანაა და რუსი სამხედროების მაღალმა ავტორიტეტმა ავტომატურად მის სასარგებლოდ იმოქმედა… ახლა კი, ამ სკანდალის შემდეგ, სახელმწიფოს მეთაურმა უნდა გადახედოს სამსახურის ხელმძღვანელის ალექსეი ვარზიევის პოლიტიკას და გამოიტანოს დასკვნები ამ სიტუაციიდან, ” – დარწმუნებულია როლანდ ქელეხსაევი.
ფოტო: Anton Maksimov juvnsky, unsplash.com
სტატია მომზადებულია ცხინვალის რედაქციის მიერ და პროექტის პირობების თანახმად, დაბეჭდილია უცვლელად.ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
