ცხინვალი: ციხეში დაახლოებით ოცმა პატიმარმა ვენები გადაიჭრა
იუსტიციის სამინისტროსა და პოლიციის თანამშრომლების მორიგი რეიდის შემდეგ, ცხინვალის ციხეში, 5 ივნისს, დაახლოებით, 20-მა პატიმარმა, პროტესტის ნიშნად ვენები გადაიჭრა. ამის შესახებ ინფორმაციას პატიმრების ახლობლები ავრცელებენ. ყველა გადაარჩინეს, არავინ გარდაცვლილა.
პატიმრები ამტკიცებენ, რომ მათ აგრესიულად ეპყრობოდნენ და მათ წინააღმდეგ ფიზიკური ძალა გამოიყენეს – აცხადებენ წყაროები ცხინვალში.
• შეიძლება თუ არა პატიმრების ცემა? ცხინვალის გამოცდილება
• სასამართლო პროცესი ცხინვალში: იუსტიციის მინისტრი ჟურნალისტის წინააღმდეგ
დაზარალებულთა ახლობლები პარლამენტის შენობასთან შეიკრიბნენ და ხელისუფლებასთან შეხვედრა მოითხოვეს. მათ პარლამენტის სპიკერი და მმართველი პარტიის, „ერთიანი ოსეთის“ ლიდერი ალან ტადტაევი, მოგვიანებით კი პრეზიდენტი ანატოლი ბიბილოვი შეხვდა.
ბიბილოვმა განაცხადა, რომ „ხელისუფლება არ გაჰყვება კრიმინალებს“. მისი თქმით, ბოლო დროს, ადგილობრივ საპატიმროებში ამოიღეს 14 ტელეფონი, სამართალდამცავი უწყებების წარმომადგენლები კი მოქმედებდნენ კანონის ფარგლებში.
რა მოხდა ციხეში – ახლობლებისა და ხელისუფლების ვერსიები
დაკავებულთა ახლობლები იუსტიციის სამინისტროსა და იზოლატორის თანამშრომლებს ძალის უკანონო გამოყენებასა და პატიმრების თვითმკვლელობამდე მიყვანაში ადანაშაულებენ.
თუმცა, პრეზიდენტი ბიბილოვი, ოფიციალურ წყაროებზე დაყრდნობით, მოვლენების სხვა ვერსიას ჰყვება.
«კამერიდან, სადაც პატიმარი კულუმბეგოვი იჯდა, ორი ტელეფონი ამოიღეს. ამის შემდეგ, ბადრაგს თავში ჩაარტყეს. ამავდროულად, პატიმრებს არავინ შეხებია, კულუმბეგოვი კი კარცერში მოათავსეს. მის წინააღმდეგ ახალი სისხლის სამართლებრივი საქმე აღიძრება და ვადა დაემატება იმ სასჯელს, რომელსაც ახლა იხდის.
ფიზიკური ძალის გამოყენების შემდეგ და არა ცემის – ისინი აიძულეს გასულიყვნენ. ერთ-ერთმა მათგანმა, ყველას საკუთარი თავისთვის ჭრილობების მიყენებისკენ მოუწოდა, რაც გააკეთეს კიდეც. არც ერთ მათგანს არ გადაუჭრია ვენა, დაუზიანდათ კაპილარები, რადგან ისინი არც აპირებდნენ საკუთარი თავისთვის სასიკვდილო ჭრილობის მიყენებას», – განაცხადა ბიბილოვმა.
მისი თქმით, წლის განმავლობაში, ციხეში შეიქმნა ყველა პირობა: გარემონტდა პატიმართა სასეირნო მოედანი, ორგანიზება გაუკეთეს სამჯერად კვებას.
არის მესამე ვერსიაც – სამხრეთ ოსეთის იუსტიციის სამინისტროდან და გენერალური პროკურატურიდან.
იქიდან ჩანს, რომ ცხინვალის გამოსასწორებელი კოლონიის ოთხმა პატიმარმა თვითმკვლელობის მცდელობის მიზნით, ვენები გადაიჭრა:
«გუშინ, ციხეში, რიგითი ოპერატიული ღონისძიებები ჩატარდა, ამოღებულია აკრძალული საგნები. ერთ-ერთმა პატიმარმა წინააღმდეგობის გაწევა სცადა და საქმეში პოლიციელების ჩართვა გახდა საჭირო. დილით, მსჯავრდებულებმა უარი განაცხადეს დღის განრიგის შესრულებაზე: არ ადგნენ, არ გამოვიდნენ დილის შემოწმებასა და საუზმეზე. თანამშრომელთა კანონიერი მოთხოვნის საპასუხოდ, ოთხმა პატიმარმა საკუთარ სხეულზე დაზიანება მიიყენა – გადაიჭრეს ხელები, მაგრამ მათ სიცოცხლეს საფრთხე არ ემუქრება».
ყველასგან სხვადასხვა მონაცემი ისმის დაზარალებულთა რაოდენობის შესახებ.
მრავალპროფილური სამედიცინო ცენტრის დირექტორის, მაირბეგ კოკოევის განცხადებით, პარასკევს დილით, მასთან რეანიმაციაში, 6 ადამიანი შეიყვანეს გამოსასწორებელი კოლონიიდან და მათ გადაუდებელი სამედიცინო დახმარება აღმოუჩინეს.
ეს პირველი მსგავსი ინციდენტი არ არის. 2019 წლის შემოდგომაზე, ცხინვალის ციხეში ბუნტი მოხდა, პატიმრები საშინელ პირობებსა და არაადამიანურ მოპყრობაზე საუბრობდნენ. მაშინ, რამდენიმე დეპუტატი იუსტიციის მინისტრის, ზალინა ლალიევასა და შს მინისტრის, იგორ ნანიევის გათავისუფლებას ითხოვდა.
თუმცა, სამხრეთ ოსეთის პრეზიდენტმა ამ მოთხოვნის შესრულებაზე უარი განაცხადა.
