სამხრეთ კავკასიაში რუსეთს თურქეთი და აზერბაიჯანი ცვლის. სად ვართ ჩვენ? - პაატა ზაქარეიშვილის კომენტარი

რუსეთს თურქეთი და აზერბაიჯანი ცვლის

პოლიტოლოგ პაატა ზაქარეიშვილის თქმით, სამხრეთ კავკასიაში რუსეთის გავლენებს თურქეთი და აზერბაიჯანი ცვლის, ხოლო საქართველო დარჩა “უკანა ეზოში”, მისი ხელისუფლება კი არა პრორუსულ, არამედ პირდაპირ “რუსულ პოლიტიკას” ატარებს. ამის შესახემ მან “ტვ პირველის” ეთერში ისაუბრა.

ზაქარეიშვილი ასევე ხაზს უსვამს, რომ ერდოღანი იმყოფებოდა აზერბაიჯანში, სადაც შეხვდა ალეიევს და სწორედ ამის მერე ჩამოვიდა აზერბაიჯანის პრეზიდენტი საქართველოში. მისი თქმით, ალიევმა საკუთარ ტვიტერზე დაწერა, რომ ამიერიდან კავკასიაში საკითხები მოგვარდება ისე, როგორც შეთანხმდებიან თურქეთი და აზერბაიჯანი.

“რასაც მე ვამბობდი სულ, ყარაბაღის ომამდე მნიშვნელოვნად უფრო ადრე, რომ საჭიროა საქართველომ ააწყოს პირდაპირი კონტაქტები თურქეთთან, ჩვენ უნდა ვყოფილიყავით უშუალო პარტნიორი თურქეთის. რატომ? იმიტომ, რომ სომხეთსა და აზერბაიჯანს შორის იყო მოუგვარებელი კონფლიქტი და ჩვენ იმდენად დავეშვით ფსკერზე, რომ კონფლიქტის მხარე აზერბაიჯანი გვთავაზობს სომხურ-ქართულ-აზერბაიჯანულ ალიანსს.” – ამბობს პოლიტოლოგი.

მისივე განმარტებით, არსებობს რაღაც ზედა “კლასი” თურქეთი-აზერბაიჯანის, და არის ქვედა კლასი – საქართველო-სომხეთის სახით, “არადა საქართველოს შეეძლო” ამ გადანაწილებაში ლიდერი ყოფილიყო:

“დღეს უკვე აშკარად ჩანს, რომ სომხეთი და აზერბაიჯანი საერთოდ იცილებენ რუსეთს სამხრეთ კავკასიიდან. სომხეთს უფრო ელაპარაკებიან – რადგან სომხეთი უფრო ხედავს თურქეთის გეოპოლიტიკურ როლს კავკასიაში – ვიდრე ჩვენ. ჩვენ ჩუმად ვართ, უკანა ეზოში ვართ. მოაგვარეს პრაღის შეხვედრაზე ურთიერთობა სომხეთთან და არც კი დაელაპარაკნენ ღარიბაშვილს. შემდეგ ჩავიდა ერდოღანი აზერბაიჯანში, გახსნა აეროპორტი, რაღაცაზე შეთანხმდნენ, რაღაც დაავალა და მისი დანაბარები ჩამოიტანა ალიევმა საქართველოში. ძალიან კარგია ნავთობი, მაგრამ საქართველო ხდება მხოლოდ დერეფანი და არანაირი პოლიტიკური, არანაირი გეოპოლიტიკური დატვირთვა აღარ აქვს. არადა შეიძლება ბევრი დატვირთვა ჰქონდეს – საქართველო არის კავკასიაშიც და საქართველო არის შავ ზღვაზეც, მაგრამ ჩვენ დღეს არავის ვახსოვართ”.

როგორც ზაქარეიშვილი აღნიშნავს, რუსეთისთვის მთავარია თურქეთი არ გაძლიერდეს.

“ორად-ორი სახელმწიფოა დღეს დედამიწის ზურგზე, რომელიც იგებს უკრაინის ომიდან, ესენია – თურქეთი და ჩინეთი. როცა ერდოღანი ლაპარაკობს უკრაინის და რუსეთის შერიგებაზე, ამით ამბობს, რომ “ეს მე ვარ მთავარი”; დიახ – თურქეთმა მოაგვარა “ხორბლის საკითხი” და შიმშილით არ ამოწყდა აფრიკა, თურქეთმა დაუბრუნა უკრაინას აზოვსტალის გმირები. ჩვენ ასეთი ქვეყანა გვყავს გვერდით და ამას არ ვიყენებთ, ჩუმად ვართ.” -დასძინა ზაქარეიშვილმა.

● აზერბაიჯანი საქართველოსთან დაახლოებას ცდილობს. ალიევის გზავნილები თბილისში ვიზიტის შემდეგ
● მეოთხე შეხვედრა ბრიუსელში: ფაშინიანი-ალიევი-მიშელი. რას გვთავაზობს ევროკავშირი?
● “აზერბაიჯანი არ ცნობს რუსეთის საოკუპაციო პოლიტიკას” – კომენტარი ბაქოდან

აზერბაიჯანის პრეზიდენტი ილჰამ ალიევი თბილისს 24 ოქტომბერს ეწვია. აზერბაიჯანის პრეზიდენტს საქართველოს პრემიერმინისტრმა, ირაკლი ღარიბაშვილმა უმასპინძლა. ალიევის ვიზიტი თბილისში ჟურნალისტებისთვისაც მოულოდნელი აღმოჩნდა. პრემიერმინისტრ ირაკლი ღარიბაშვილისა და ილჰამ ალიევის შეხვედრა თბილისთან ახლოს, შატო მუხრანში შედგა. იქვე გაიმართა შემაჯამებელი პრესკონფერენციაც.

როგორც ვიზიტის შემდეგ გამართულ ბრიფინგზე ითქვა, მთავარი თემა ენერგეტიკულ სფეროში თანამშრომლობა იყო. აზერბაიჯანი გეგმავს გაზარდოს ენერგომატარებლების ექსპორტი ევროპაში, შესაბამისად, მიწოდება გაიზრდება საქართველოს ტერიტორიაზე გამავალი მილსადენებით.

ალიევის თქმით, ბუნებრივი აირის ექსპორტისთვის გაიზრდება ბაქო-თბილისი-ჯეიჰანის მილსადენის დატვირთვა და ამუშავდება ბაქო-თბილისის ტერმინალიც, რომელსაც ამჟამად მუშაობა დროებით შეჩერებული აქვს.

საქართველოს პრემიერმა, ირაკლი ღარიბაშვილმა კი განაცხადა, რომ აზერბაიჯანი საქართველოს ყველაზე მნიშვნელოვანი სტრატეგიული პარტნიორია.