სამაშველო სამუშაოები და მომხდარის ვერსიები - ახალი დეტალები ერევანში მომხდარ აფეთქებაზე
ახალი დეტალები ერევანში მომხდარ აფეთქებაზე
ერევანში, სავაჭრო ცენტრ “სურმალუში”, სამძებრო-სამაშველო სამუშაოებში 935 მაშველი მონაწილეობდა. 14 აგვისტოდან, აფეთქებიდან დღემდე მაშველებმა ნანგრევებიდან 26 ადამიანი ამოიყვანეს. მათგან 10 ცოცხალია.
18 აგვისტოს, მთავრობის სხდომაზე, აფეთქებისა და სამაშველო სამუშაოების შესახებ უახლესი მონაცემებ გახდა ცნობილი.
საზოგადოებრივი ორგანიზაცია „ინფორმირებული და დაცული მომხმარებლის“ ხელმძღვანელის ბაბკენ პიპოიანის განცხადებით, სამაშველო სამუშაოები „სამოყვარულო დონეზე“ მიმდინარეობდა. კერძოდ, მოხალისეები დამცავი ტანსაცმლის გარეშე მუშაობდნენ. საბედნიეროდ, არცერთი მათგანი არ დაშავებულა.
14 აგვისტოს ერევანში, “სურმალუს” სავაჭრო ცენტრში, აფეთქება მოხდა, რამაც ხანძარი გამოიწვია. ნაპოვნია 16 გარდაცვლილის ცხედარი. ორი ადამიანი ამ დრომდე დაკარგულად ითვლება. სამედიცინო დაწესებულებებს 62-მა ადამიანმა მიმართა. მათგან ოთხი მკურნალობას აგრძელებს.
ხანძარი 16 აგვისტოს, საღამოს ჩააქრეს. სამძებრო სამუშაოები ისევ გრძელდება. დაღუპულთა ხსოვნის პატივსაცემად, სომხეთსა და მთიან ყარაბაღში, 17 და 18 აგვისტო გლოვის დღეებადაა გამოცხადებული.
სომხეთის პრემიერ-მინისტრის ნიკოლ ფაშინიანის თქმით, ორი წლის წინ, ბეირუთში მომხდარი აფეთქების შემდეგ, მან „შესაბამის უწყებებს დაავალა განსაკუთრებული ყურადღება მიექციათ“ ფეთქებადი მასალების შენახვისთვის. თუმცა, ჯერ უცნობია, რა გააკეთეს ამის შემდეგ.
დეტალები მთავრობის სხდომიდან სამძებრო სამუშაოების შედეგებისა და დაზარალებულებისთვის გაწეული სამედიცინო დახმარების შესახებ. ასევე ექსპერტის კომენტარი.
“დავავალე ასაფეთქებელი ნივთიერებების შენახვის შესახებ ინფორმაცია შეეგროვებინათ”
„2020 წლის აგვისტოში, ბეირუთში მომხდარი აფეთქების შემდეგ, შესაბამის განყოფილებებს დავავალე ყველა იმ ობიექტის შესახებ, რომელთა საქმეც ასაფეთქებელ ნივთიერებებს უკავშირდება, ინფორმაცია შეეგროვებინათ. ასევე, იმ ობიექტების შესახებ, სადაც შესაძლოა დიდი რაოდენობით ასაფეთქებელი მასალა იყოს განთავსებული“, – განაცხადა ფაშინიანმა.
მისი თქმით, “სურმალუში” მომხდარის შემდეგ, ის დაინტერესდა, რა ბედი ეწია მის დავალებას. თუმცა ინფორმაცია ჯერ შეგროვების პროცესშია.
„სახელმწიფო კონტროლის სამსახურს უნდა დავავალო, ჩაატაროს კონკრეტული გამოძიება და მომზადოს ანგარიში, როგორ შესრულდა ჩემი ბრძანება“, – განაცხადა პრემიერმა.
მკურნალობა იყო და იქნება უფასო
ჯანდაცვის მინისტრის ანაჰიტ ავანესიანის განცხადებით, სამედიცინო დაწესებულებებში მიყვანილი 62 ადამიანიდან მხოლოდ ოთხი აგრძელებს მკურნალობას. მათი ჯანმრთელობის მდგომარეობა დამაკმაყოფილებელია.
მინისტრის თქმით, ყველა დაზარალებულის მკურნალობას სახელმწიფო აფინანსებდა. ეს ასეც გაგრძელდება. ეს ეხება ქირურგიულ ჩარევებსაც.
„თუ მომავალში მკურნალობის გაგრძელების აუცილებლობა გაჩნდება, მაშინ ისიც სრულიად უფასო იქნება“, – აცხადებს ანაჰიტ ავანესიანი.
მაშველები ეპიცენტრს მიუახლოვდნენ
საგანგებო სიტუაციების მინისტრმა არმენ ფამბუხჩიანმა განაცხადა, რომ ამ დროისთვის ნანგრევებიდან 16 დაღუპული ამოიყვანეს. ხანძრის გაჩენიდან პირველი ორი საათის განმავლობაში მაშველებმა ათი გადარჩენილი იპოვეს.
„სამუშაოებში 935 მაშველი იყო ჩართული, მათგან, 350 პირველ დღეს. მათთან ერთად მუშაობდა 382 მოხალისე, 201 წითელი ჯვრის მაშველი და ფსიქოლოგი“, – განაცხადა მინისტრმა.
მისივე თქმით, ერთ-ერთი გარდაცვლილის ვინაობა ჯერ დადგენილი არ არის. ორი ამ დრომდე დაკარგულად ითვლება.
„ვვარაუდობთ, რომ დაუდგენელი გარდაცვლილი არის ერთ-ერთი მათგანი, ვინც დაკარგულად ითვლება”.
დაკარგულის ძებნა გრძელდება. მაშველებმა უკვე იციან, ვის ეძებენ. მამაკაცი აფეთქების ეპიცენტრში იმყოფებოდა. საგანგებო სიტუაციების სამინისტროში ფიქრობენ, რომ მისი პოვნა ადვილი არ იქნება.
„ტერიტორიის თითქმის 90 პროცენტი გაწმენდილია. ახლა სამუშაოები ეპიცენტრის ადგილას იწყება. სამუშაოები რთულია. ვცდილობთ მაშველებს უსაფრთხო პირობები შევუქმნათ“, – განაცხადა მინისტრმა.
იგი ირწმუნება, რომ ამ ხნის განმავლობაში არანაირი პრობლემა არ ჰქონიათ, არც ადამიანურ რესურსებთან და არც აღჭურვილობასთან დაკავშირებით.
“ტერორისტული თავდასხმის ან განზრახ ჩადენილი დანაშაულის მტკიცებულება არ არსებობს”
ფაშინიანმა საგამოძიებო კომიტეტის თავმჯდომარეს ჰკითხა, განიხილება თუ არა ტერორისტული აქტის ან განზრახ დანაშაულის ვერსიები, არის თუ არა მათ დამადასტურებელი ან გამომრიცხავი გარემოებები.
საგამოძიებო კომიტეტმა სისხლის სამართლის საქმე ორი მუხლით აღძრა:
– აალებადი ნივთიერებების შენახვის წესების დარღვევა, რამაც გამოიწვია გაუფრთხილებლობით ადამიანის სიკვდილი
– სახანძრო უსაფრთხოების წესების დარღვევა, რამაც გამოიწვია გაუფრთხილებლობით ადამიანის სიკვდილი.
„ამ დროისთვის, სისხლის სამართლის საქმეში არ არსებობს ფაქტობრივი მტკიცებულება, რომელიც მიუთითებს ტერორისტულ აქტზე, ან განზრახ ჩადენილ დანაშაულზე”, – განაცხადა საგამოძიებო კომიტეტის ხელმძღვანელმა არგიშტი ქირამიანმა.
მისი თქმით, ამჟამად არსებული მტკიცებულებები გაუფრთხილებლობით ჩადენილ დანაშაულზე მიუთითებს.
კომენტარი
ინფორმირებული და დაცული მომხმარებლების საზოგადოებრივი ორგანიზაციის ხელმძღვანელი ბაბკენ პიპოიანი მიიჩნევს, რომ სამძებრო-სამაშველო სამუშაოები სამოყვარულო დონეზე ჩატარდა.
„არ არის აუცილებელი, მოხალისეს თავზე ქვა დაეცეს და ადგილზე მოკვდეს, იმის გასაგებად, რომ სამძებრო-სამაშველო სამუშაოები ასე არ ტარდება.
ექსპერტის თქმით, მოხალისეები დამცავი ტანსაცმლის, სათვალეების, ჩაფხუტებისა და ნიღბების გარეშე მუშაობდნენ.
მისივე თქმით, ერთ-ერთ ვიდეოში ჩანს, როგორ ართმევს სამოქალაქო ტანსაცმელში გამოწყობილ მამაკაცი მეხანძრეს პროფესიონალურ მოწყობილობას და ასრულებს სამუშაოებს. იგი ვარაუდობს, რომ შეიძლებოდა ამას სერიოზული საფრთხე მოჰყოლოდა. კარგია, რომ ასეთი შედეგები თავიდან აიცილეს.
ბაბკენ პიპოიანი სავაჭრო ცენტრში მომუშავე ბიზნესმენების დახმარებასაც შეეხო, რომლებიც აფეთქებისა და ხანძრის შედეგად დაზარალდნენ. იგი მიიჩნევს, რომ მთავრობამ მათ ზარალი უნდა აუნაზღაუროს. ასევე, დახმარება უნდა გაუწიოს დაღუპულთა ოჯახებს.
ახალი დეტალები ერევანში მომხდარ აფეთქებაზე
