"ყველაფერი არის შეჩერებული და არა გაჩერებული, შეჩერება არის არჩევნებამდე" - სალომე ზურაბიშვილის პრესკონფერენცია
სალომე ზურაბიშვილის პრესკონფერენცია
ყველაფერი არის შეჩერებული და არა გაჩერებული, შეჩერება არის არჩევნებამდე, – ამის შესახებ საქართველოს პრეზიდენტმა, სალომე ზურაბიშვილმა მედიებთან გამართულ პრესკონფერენციაზე განაცხადა. ასევე, სალომე ზურაბიშვილი „ქართული ოცნების“ საპატიო თავმჯდომარეს, ბიძინა ივანიშვილს დებატებში იწვევს. მისი თქმით, ბიძინა ივანიშვილმა უნდა ახსნა თავისი ზოგიერთი პოზიცია, თუ რას “რას ერჩის” ქვეყანას.
მთავარი, რაც თქვა საქართველოს პრეზიდენტმა:
ბიძინა ივანიშვილზე
“ვერავინ ვერ გავიგეთ რეალურად სად არის, რა უნდა, რატომ უნდა და რას უკეთებს ამ ქვეყანას. მე მზად ვარ და დებატებში ვიწვევ. მე პირადად არ შემხვდება. დებატში მოვიდეს, რადგან თვლის თავს და ითვლება, რომ ის არის მთავარი მმართველი. სახელმწიფოს პირველი პირი მე ვარ, მაშინ მოვიდეს და დებატებში გავარჩიოთ.
მე არაფერი მაინტერესებს, ფაქტებს ვუყურებ და ვხედავ, საით მიდის ქვეყანა, მაგრამ საზოგადოებისთვის ვალდებულია, რომ ახნას ზოგიერთი პოზიცია. ახსნას ზოგიერთი პოზიცია, რატომ გაუშვა ორჯერ კორუმპირებული პრემიერი და ვიცით, რომ ნაწილობრივ კორუფციის გამო.. მერე აბრუნებს, მერე კიდევ ახალ თანამდებობაზე სვავს, მერე იბარებს და ნიშნავს ყველაზე არაპოპულარულ ადამიანს როგორც პრემიერად.
რას ერჩის ამ ქვეყანას, ხომ უნდა გვითხრას არჩევნებამდე მაინც, ასე რომ, ერთი კაი დებატი მგონი, გველოდება.
ბატონმა ივანიშვილმა თავის საზოგადოებას არაფერი უთხრა და არაფერი ახნა, რატომ გადაახვევინა კურსიდან, იმ მთავრობას, რომელიც ვიცით, რომ არის მხოლოდ და მხოლოდ შემსრულებელი, ასეთი ზიანი მიაყენა ქვეყანას, ქვეყანა იზოლაციაში ჩააყენა, ეს ქვეყანა დაასუსტა – გაერთიანებული ქვეყანა.
სტატუსის მიღების დღეები ხომ არ დაგვავიწყდა? – რა ბედნიერება იყო ხალხში და ყველა ყველას ულოცავდა. ეს ყველაფერი გათელა იმისთვის, რომ უაზრო და არასაჭირო კანონი შემოატანა, რატომ? ვინმეს უთხრა?
ჩვენ მისგან ორი დიდი სიტყვა ვიცით, რომელიც ალბათ, მისი დაწერილიც არ არის, ორი დიდი სიტყვა, რომელიც მტრულად არის განწყობილი, ჯერ ერთი ჩვენი პარტნიორების მიმართ და მეორეც ერთი საზოგადოების მიმართ. ის საზოგადოებას რევანშს ჰპირდება, პირდაპირ რეპრესიებს.
აშშ-ის მიერ შეწყვეტილ დახმარებაზე
„არ მიკვირს ამერიკის რეაგირება, განცხადებები. სხვანაირად როგორ უნდა იყოს, როდესაც 30 წლის და მეტი ხნის განმავლობაში ეხმარები ქვეყანას სახელმწიფოს მშენებლობაში, არა მხოლოდ მატერიალურად, არამედ ყველა ძალისხმევით, რომ დადგეს ფეხზე როგორ დამოუკიდებელი, ეკონომიკურად მდგრადი სახელმწიფო და უცებ, გაუგებრად და ახსნის გარეშე გეძახიან მტერს, გაბრალებენ რაღაცებს, შემოდის გაუგებარი, გაუგონარი კონსპირაციის თეორიები.
რანაირად უნდა რეაგირებდეს ამერიკა? ცხადია, მათი მკაფიო და მკაცრი რეაგირება მოსალოდნელი იყო. არ ვიცი, ხელისუფლებას უკვირს თუ არა. ალბათ, არ უნდა უკვირდეს.
იცოდა ალბათ [ხელისუფლებამ], თუნდაც ივანიშვილის 29 აპრილის სიტყვის შემდეგ, რომელიც აგვირგვინებს ყველა იმ ნაბიჯებს, რომელიც მანამდე იყო მიღებული. ეს უკვე არის შეკრული კონცეფცია. ამერიკა ხომ არ არის შენი პატარა ბავშვი, რომელსაც აბურთავებ, ის არის ერთ-ერთი ყველაზე ძლიერი სახელმწიფო მსოფლიოში, შენ ასე ექცევი და გგონია იმას რეაგირებაც არ ექნება? ვწუხვარ, როგორც საქართველოს პრეზიდენტი.
ამას ვეტყვი სენატორი შაჰინს, რომელიც რამდენიმე დღეში ჩამოდის: ორი რამე არ მესმის და დანარჩენი ყველაფერი სწორია, უნდა მივიღოთ, უნდა გავიგოთ და გამოვასწოროთ სასწრაფოდ, რაც შეგვიძლია ჩვენ, საზოგადოებას.
მე არ მესმის ჩვენი ჯარისთვის ბიუჯეტის შეზღუდვა და თუ ეს მართალია, არ მესმის ლუგარის ლაბორატორიისთვის დაფინანსების შეზღუდვა. ბევრი მიმართულებაა, სადაც შეიძლება, მთავრობა დაისაჯოს და უნდა დაისაჯოს
მაგრამ, არ შეიძლება ქართული ჯარი, რომელზეც ჩვენი სახელმწიფო და თავდაცვა დგას, დაისაჯოს, მით უმეტეს, რომ ის მთლიანად შექმნილია ამერიკის მიერ. ეს არ მესმის და უთუოდ გავარკვევ.
ის, რომ წვრთნები გადაიდო, გასაგებია – არჩევნებამდე, სანამ ყველაფერი არ გაირკვევა, რაღაც ნიშნები შეიძლება მოგცენ, მაგრამ ჯარის ხელის ხლება არ შეიძლება.
იმიტომ რომ ჩვენი ჯარი სარგებლობს მოსახლეობის სრული ნდობით და ეს არის ჩვენი სახელმწიფოს ნამდვილი, შეიძლება ითქვას, ერთადერთი საყრდენი.”
ტექნიკურ მთავრობაზე და ოპოზიციაზე
“[„ქართულ ქარტიაში“] ჩაწერილია ის, რომ საარჩევნო გარემო უნდა გათავისუფლდეს და აღარ უნდა ვიყოთ იმ გარემოებაში, სადაც უკვე ბევრი წელია ვართ.
საქართველოს მოსახლეობა იტყვის ვინ შეასრულა ეს დათქმა და ვალდებულებები და ვინ არა. მე იმ მხრივ ვიქნები გარანტი, რომ ვიტყვი ვინ არ ასრულებს ამ მომენტში [ვალდებულებას]. შემდეგ არჩევნებში მოსახლეობა იტყვის ვინ უნდა, რომელ პარტიას ენდობა და არ ენდობა. ეს არის ნდობის აღდგენის მომენტი.
ასეთი შანსი პოლიტიკურ პარტიებს არ ეძლევათ, რომ ჰქონდეთ შანსი, რომ შეასრულონ ხალხის დაკვეთა და დაუბრუნონ მათ დემოკრატიის მანდატი. შემდეგ თქვან, რომ „მე შეგისრულე, გთავაზობ ნამდვილ პროგრამას, მიმართულებას და ამიერიდან მომეცი მე ხმა“. ეს იქნება ამსახველი იმის, თუ რა უნდა საზოგადოებას. ამ არჩევნებში არავინ ჩათვალოს, რომ პირადად თვითონ იღებს ხალხის მანდატს. ამ არჩევნებში იქნება ქარტია და ევროპა მიიღებს ხალხის მანდატს.
პარტიები იმისთვის არიან, რომ გემოვნება იყოს გამოხატული და ყველას ჰქონდეს მისი გამოხატვის საშუალება. ერთიანი ქოლგა, ნება, მიზანი და პარტიული მრავალფეროვნებაა ამისი მიზანი.
არ არის იმის დრო, რომ დავიწყოთ იმაზე დავა, რომ არცერთი არ იქნება პრემიერი, ვინც დღეს ფიქრობს, რომ იქნება პრემიერი, იმიტომ რომ რეალურად, არსებული პოლიტიკური პარტიების შეთანხმება რომელიმე პოლიტიკოსზე, პრემიერზე, ვფიქრობ, რომ ძალიან რთული იქნება, თუ არა შეუძლებელი
