საპარლამენტო უმრავლესობის 80 დეპუტატი პრეზიდენტის წინააღმდეგ საიმპიჩმენტო განაცხადს ხელს აწერს, რომელიც საკონსტიტუციო სასამართლოში გასაგზავნ მასალას თან დაერთვება.
საპროცედურო საკითხთა და წესების კომიტეტის თავმჯდომარის, ირაკლი ქადაგიშვილის თქმით, დადგინდა პარლამენტის ოთხმოცივე წევრის ხელმოწერის ნამდვილობა საქართველოს “პრეზიდენტის იმპიჩმენტის წესით თანამდებობიდან გადაყენების” საკითხის აღძვრის უფლების განხორციელებასთან დაკავშირებულ წარდგინებაზე.
პრეზიდენტის საპარლამენტო მდივანი გიორგი მსხილაძე აცხადებს, რომ სალომე ზურაბიშვილის იმპიჩმენტთან დაკავშირებით ქართული ოცნების მხრიდან საკონსტიტუციო სასამართლოსთვის მიმართვა “ეწინააღმდეგება საქართველოს ისტორიულ არჩევანს, გახდეს ევროკავშირის წევრი”. მისივე თქმით, “ვინც იმპიჩმენტის მომხრეა, ევროინტეგრაციის წინააღმდეგია.”
ეს განცხადება პრეზიდენტის საპარლამენტო მდივანმა საკანონმდებლო ორგანოში გააკეთა, სადაც საპროცედურო საკითხთა და წესების კომიტეტმა ხელმოწერების ნამდვილობა დაადასტურა.
“მინდა გითხრათ, რომ დღეიდან დაიწყო ლუსტრაციის პროცესი, რომელიც დაიწყო ზუსტად ამ ხელმოწერებით, რომელიც ეწინააღმდეგება ჩვენი ქვეყნის ისტორიულ არჩევანს გახდეს ევროკავშირის სრულუფლებიანი წევრი ევროპის ოჯახის. დაიწყო ლუსტრაცია იმის, თუ ვინ იქნება ამის მხარდამჭერი და ვინ აუბამს მხარს ამ პროცესს.
ქართულ ოცნებას და უმრავლესობას მოუწევს ამაზე პასუხის გაცემა, თუ რატომ ახორციელებენ როგორც სიტყვით, დღეიდან უკვე საქმით, როგორც ჩანს, ჩვენი ქვეყნის ოკუპანტი რუსეთის უმაღლესი თანამდებობის პირების მესიჯბოქსს, რომ მათ საქართველოში გარდა პრეზიდენტის აქტივობისა, ყველაფერი აკმაყოფილებთ და ამის შემდეგ რამდენიმე დღეში იწყება პრეზიდენტის იმპიჩმენტის პროცესი. ყველაფერი ნათელია, ვისაც დანახვა უნდა, დაინახავს, ვისაც გაგება უნდა გაიგებს, მეორე ვარიანტი არ არსებობს“, – განაცხადა გიორგი მსხილაძემ.
საქართველოს პარლამენტის თავმჯდომარე, შალვა პაპუაშვილი პრეზიდენტის საპარლამენტო მდივანს, გიორგი მსხილაძეს მოუწოდებს, კორექტული იყოს. მისი თქმით, სჯობს, მსხილაძე “საკუთარი კომპეტენციის ფარგლებში ჩაეტიოს”.
“პრეზიდენტის საპარლამენტო მდივანი, მნიშვნელოვანი არის, რომ ჩაეტიოს საკუთარი უფლებამოსილებისა და კომპეტენციის ფარგლებში და არ მგონია, რომ მისი მხრიდან საქართველოს ხალხის მიერ არჩეული პარლამენტის წევრების ასეთი შეფასებები შესაბამისი იყოს, ამიტომ მას მოვუწოდებ, რომ იყოს კორექტული”, – თქვა პაპუაშვილმა.
იმპიჩმენტის პროცედურის სისრულეში მოყვანას პარლამენტის 100 დეპუტატის თანხმობა სჭირდება, რომელიც მმართველ გუნდს არ აქვს. მაგრამ, მიუხედავად ამისა, მმართველი გუნდი მაინც იწყებს აღნიშნულ პროცედურებს.
საიმპიჩმენტო განაცხადის მიხედვით, “პრეზიდენტმა დაარღვია საქართველოს კონსტიტუციის 52-ე მუხლის პირველი პუნქტის “ა” ქვეპუნქტი, რომელიც გულისხმობს მთავრობის თანხმობით პრეზიდენტის უფლებას, განახორციელოს წარმომადგენლობითი უფლებამოსილებები საგარეო ურთიერთობებში, აწარმოოს მოლაპარაკებები სხვა სახელმწიფოებთან და საერთაშორისო ორგანიზაციებთან, დადოს საერთაშორისო ხელშეკრულებები, მიიღოს სხვა სახელმწიფოებისა და საერთაშორისო ორგანიზაციების ელჩების და სხვა დიპლომატიური წარმომადგენლების აკრედიტაცია”.
“ქართულმა ოცნებამ” საქართველოს პრეზიდენტის წინააღმდეგ იმპიჩმენტის პროცედურის დაწყების შესახებ პირველ სექტემბერს განაცხადა. ამის შესახებ ბრიფინგზე მმართველი პარტიის თავმჯდომარემ, ირაკლი კობახიძემ ისაუბრა. კობახიძის განმარტებით, იმპიჩმენტის პროცედურა დაიწყება მიუხედავად იმისა, რომ მის აღსრულებას პარლამენტში ოპოზიციის მხარდაჭერაც სჭირდება.
გარდა ამისა, კობახიძის თქმით, პრეზიდენტის მიერ კონსტიტუციის დარღვევის ფაქტზე „ქართული ოცნება“ მიმართავს საკონსტიტუციო სასამართლოსაც.
საქართველოს პრეზიდენტის ადმინისტრაციამ 30 აგვისტოს გამოაქვეყნა განცხადება, რომლის მიხედვით, საქართველოსთვის ევროკავშირის წევრობის კანდიდატი ქვეყნის სტატუსის მინიჭების მხარდასაჭერად პრეზიდენტი სალომე ზურაბიშვილი ევროპელ ლიდერებთან შეხვედრებს იწყებს.
მალევე საქართველოს მთავრობა სალომე ზურაბიშვილის გერმანიაში დაგეგმილ ვიზიტს გამოეხმაურა და განმარტა, რომ პრეზიდენტს უარი გერმანიის გარდა, უკრაინაში ვიზიტზეც უარი ეთქვა. ზურაბიშვილს ასევე უარი ეთქვა შვეიცარიაში, პოლონეთში, ბელგიაში, დანიაში, არაბთა გაერთიანებულ საამიროებში, ბულგარეთში, ჩეხეთსა და ისრაელში დაგეგმილ შეხვედრებზეც.
თუმცა საქართველოს პრეზიდენტმა ევროპული ტურნე მაინც წამოიწყო. ზურაბიშვილი გერმანიაში გაემგზავრა და გერმანიის პრეზიდენტს შეხვდა, მოგვიანებით კი იგი საფრანგეთის პრეზიდენტს, ემანუელ მაკრონსაც შეხვდა.
7 სექტემბერს კი საქართველოს პრეზიდენტმა სალომე ზურაბიშვილმა სპეციალური ვიდეომიმართვა გაავრცელა და განაცხადა, რომ ის არსად წასვლას არ აპირებს და მის გადადგომაზე ოცნება ყველამ უნდა დაივიწყოს.
