სალომე ზურაბიშვილი: საქართველოში რუსების ჩამოსვლა უნდა გაკონტროლდეს
სალომე ზურაბიშვილი რუსეთზე
საქართველოს პრეზიდენტმა სალომე ზურაბიშვილმა CNN-ის წამყვანთან, ქრისტიან ამანპურთან ინტერვიუში განაცხადა, რომ პრობლემას ხედავს ქვეყანაში რუსეთის მოქალაქეების ამ რაოდენობით უკონტროლო შემოსვლის გამო, რადგან რუსეთი მათ “რბილი ძალის” გასავრცელებლად გამოიყენებს, ხოლო მომავალში, შესაძლოა, რუსულენოვანი მოსახლეობის დაცვის საბაბით საქართველოში შემოიჭრას კიდეც.
ზურაბიშვილმა ასევე თქვა, რომ საქართველო რუსეთთან “რბილი ომის” რეჟიმში იმყოფება და ამ ომში ევროკავშირის მხარდაჭერის იმედი აქვს.
მოკლედ, ზურაბიშვილის ინტერვიუს მთავარი ასპექტები:
● პრეზიდენტის თქმით, იმ ფონზე, როდესაც პუტინი ვერ მართავს ომს უკრაინაში, საქართველოზე სამხედრო ზეწოლის საფრთხეს ვერ ხედავს. თუმცა, მისი თქმით, არსებობს რუსეთის მხრიდან „რბილი ძალის” და პროპაგანდის გავრცელების დიდი საფრთხე:
“ჩვენს შემთხვევაში, ამ ეტაპზე, მე ვერ ვხედავ, რომ სამხედრო ზეწოლა არსებობდეს, ვინაიდან, ჩვენთან სამხედრო ოკუპაციაა, რომელიც 2008 წლიდან გრძელდება და მანამდეც 1991 წლიდან სხვადასხვა ფორმებით. ასე რომ, ორი რეგიონი ოკუპირებულია რუსეთის სამხედრო ბაზებით. მაგრამ ვფიქრობ, რაც შეიძლება, მოხდეს არის ის, რომ ახლა რუსეთი გამბედაობას ამოწმებს და ამოწმებს „რბილი ძალის” ფრონტს, რაც არის პროპაგანდა”
● ზურაბიშვილის თქმით, საქართველომ უნდა შეზღუდოს საქართველოში რუსეთის მოქლაქეების შემოსვლა, რადგან რუსეთი მათ თავის პროპაგანდის და “რბილი ძალის” გასავრცელებლად გამოიყენებს. ასევე, ზურაბიშვილმა თქვა, რომ მომავალში, შესაძლოა, საქართველოში მყოფი რუსულენოვანი მოსახლეობა რუსეთის საქართველოში შემოჭრის მიზეზი გახდეს:
” ყველა ის რუსი, რომელიც საქართველოში ჩამოვიდა და გავიმეორებ, რომ ეს უნდა კონტროლდებოდეს – არ შეგვიძლია ამდენი რაოდენობით რუსი შემოვუშვათ საქართველოს ტერიტორიაზე იმის ცოდნის გარეშე თუ ვინ არიან. უმრავლესობა, როგორც თქვით, ის ხალხია, რომელიც დღევანდელ რუსეთს გაურბის და პროპუტინული მოსახლეობა არ არის, მაგრამ ასევე ვიცით რუსეთის მუქარები, რომ თუ რუსულენოვანი ხალხი ნორმალურად არ იქნება დაცული – ეს შეიძლება რუსეთის შემოჭრის მიზეზად იქნას გამოყენებული”.
● პრეზიდენტმა ასევე თქვა, რომ საქართველოს აქვს დიდი შანსი, გახდეს ევროკავშირის ნაწილი და ევროკავშირი მას ამაში უნდა დაეხმაროს, რადგან წინააღმდეგ შეთხვევაში დასავლეთი საქართველოს დაკარგავს და ქვეყანა დარჩება რუსეთის “სათამაშოდ”:
“ევროკავშირი გადამწყვეტ მომენტშია, საქართველოს სჭირდება წლის ბოლოს კანდიდატის სტატუსის მიღება. [ევროპული] პერსპექტივა მოგვცეს, რაც საქართველოსთვის ძალიან მნიშვნელოვანი იყო, ვინაიდან, ეს ნიშნავდა, რომ გეოგრაფია საქართველოსთვის ხელის შემშლელი ფაქტორი აღარ არის, როგორც ეს ბევრი წლის განმავლობაში იყო. შემდეგი ეტაპი კანდიდატის სტატუსის მიღებაა და ამ “რბილ ომში”, რომელიც რუსეთთან გვაქვს, ვფიქრობ, ევროკავშირს არ შეუძლია საქართველოს დაკარგვა, ქართველი ხალხისთვის კვლავ იმედის გაცრუება და რუსეთისთვის “სათამაშოდ” მარტივი ადგილის მიცემა”.
● ზურაბიშვილი აღიარებს, რომ ბოლო პერიოდში დემოკრატიული რეფორმების მიმართულებით საქართველოს პრობლემები აქვს, თუმცა ამბობს, რომ ამის მიუხედავად ევროკავშირმა საქართველოს სტატუსზე უარი არვ უნდა უთხრას, რადგან ეს სტრატეგიული მნიშვნელობის გადაწყვეტილებაა:
“ეს ძალიან სტრატეგიული გადაწყვეტილებაა, რომელიც, რა თქმა უნდა, დემოკრატიულ რეფორმებსა და პროცესს ითვალისწინებს, რომელიც ბოლო პერიოდში ისეთი დამაკმაყოფილებელი არ არის, როგორიც უნდა იყოს. მაგრამ, ეს პირობები შეიძლება დარჩეს, შეიძლება დაემატოს, ბევრი შესაძლებლობა არსებობს, რომლის მეშვეობითაც ევროკავშირმა შეიძლება სწორი სიტყვები და ფორმატი შეარჩიოს, მაგრამ კვლავ – ეს სწორი სტრატეგიული გადაწყვეტილებაა”, – განაცხადა ზურაბიშვილმა.
● პრეზიდენტმა თქვა, რომ ქვეყნისთვისთვის სტრატეგიულ მიზნად კვლავ რჩება ნატოს წევრობა, თუმცა, მისი თქმით, ეს უფრო შორეული პერსპექტივაა დღეს, ვიდრე ევროკავშირი:
“რაც შეეხება ნატო-ს, შემდეგ სამიტზე ცენტრალური თემა უკრაინა იქნება, ყველამ ვიცით ეს, და უსაფრთხოების გარანტიები იქნება უკრაინისთვის, არ ვიცი რა ტიპის, და ეს ნორმალურია. ეს არის ის, რასაც უკრაინა დღეს იმსახურებს და არანაირი ფორმის შეჯიბრი არ არსებობს და უკრაინის ნებისმიერი წინსვლა ნამდვილად სასარგებლო იქნება საქართველოსთვის”.
სალომე ზურაბიშვილი რუსეთზე
