საკუთარი ტელეარხი სახელმწიფოებრიობის დასტურია

სამხრეთი ოსეთის ტელევიზია იუბილარია. მისი დაარსებიდან 22 წელი გავიდა. ტელეარხმა მაუწყებლობა 1994 წელს დაიწყო.

JAM-news  ადგილობრივი ტელევიზიის ერთ-ერთი ყველაზე რეიტინგული გადაცემის წამყვანს, ტამერლან ძუწევს ესაუბრა იმის შესახებ, თუ როგორი იყო, და რად იქცა დღეს ეს ყველაფერი.

JAMnews: გახსოვთ, როგორ დაიწყო ყველაფერი 1994 წელს?

– იმ პერიოდში რესპუბლიკაში არ ვიყავი _ მოსკოვში ვიმყოფებოდი, თუმცა, ცხადია, ვიცი, რა ეფექტიც ჰქონდა საკუთარი ტელევიზიის შექმნას _ შეიძლება, ადამიანებისთვის ეს იმის ყველაზე თვალსაჩინო დასტურიც კი იყო, რომ დამოუკიდებელ სახელმწიფოდ ვყალიბდებოდით. ყველა უყურებდა.

JAMnews:ოსურ ენაზე მაუწყებლობდნენ?

– დიახ, თუმცა, რამდენიმე გადაცემა რუსულ ენაზეც გადიოდა.

JAMnews: საიდან იღებდნენ კადრებს?

– ეს ყველაფერი ცარიელი ენთუზიაზმით კეთდებოდა. ალან ჯიოევი და ვალერი ხუბულოვი სადღაც შოულობდნენ ტექნიკურ აღჭურვილობას. სიუჟეტებს ხშირად შინ ამზადებდნენ,საკუთარ მუხლებზე.ასე გრძელდებოდა ორი წლის განმავლობაში, ვიდრე ტელევიზია დამოუკიდებელი იყო; შემდეგ კი ეს  სახელმწიფო ტელეარხი გახდა.

JAMnews: ახლა როგორ გამოიყურება სამხრეთი ოსეთის ტელევიზიის კონტენტი?

– ადგილობრივი მაუწყებლობა 15:00-ზე იწყება. მანამდე კი რუსულ კონტენტს (ძირითადად ფილმებს) ვიყენებთ. თუმცა, თუ რუსეთის ფედერალურ არხებზე სამხრეთ ოსეთთან დაკავშირებით რაიმე გადაიცემა, რა თქმა უნდა, ეს გამორჩეული ამბავია ხოლმე.

JAMnews: ავლენს თუ არა ხელისუფლება განსაკუთრებულ ინტერესს ტელევიზიის მიმართ?

– მე პირდაპირ ეთერში გასულ გადაცემებს ვუძღვები, რომლებშიც რესპუბლიკის ხელმძღვანელები იღებენ მონაწილეობას.გარდა ამისა, ყოველი კვირის ბოლოს საღამოს გადაცემა მიმყავს სახელწოდებით „ხმამაღლა“, სადაც ასევე ჩინოვნიკები გამოდიან. საპარლამენტო და საპრეზიდენტო არჩევნების წინ კი ტელედებატების წამყვანი ვარ ხოლმე. ცხადია,ინტერესი იგრძნობა.

JAMnews: ზეწოლა?

– განსაკუთრებულ ზეწოლას ვერ ვგრძნობ.

JAMnews: ანუ შეიძლება ითქვას, რომ შემოქმედებითი თავისუფლება გაქვთ?

– შემოქმედებითობა წახალისებულია, ოღონდ არხის პოლიტიკური ხაზი მოზომილი უნდა იყოს. ჩვენ ხომ სახელმწიფო ტელევიზია ვართ. თუმცა, პრეზიდენტი ლეონიდ თიბილოვი ამტკიცებს, რომ კრიტიკას მიესალმება.

JAMnews: რესპუბლიკის ტერიტორიაზე ქართული არხების ყურება თუ არის შესაძლებელი?

– დიახ, განსაკუთრებით საზღვრისპირა რეგიონებში. ზოგჯერ ვუყურებ ხოლმე _ რამდენის საშუალებასაც ქართული ენის ცოდნა  მაძლევს.

JAMnews: და როგორი შთაბეჭდილება გრჩებათ?

– ცხადია, გამოსახულებისა და ტექნიკური შესაძლებლობების თვალსაზრისით, ჩვენზე წინ არიან.

პორტალის მასალები შეიცავს იმ ტოპონიმებსა და ტერმინოლოგიას, რომელიც გამოიყენება აფხაზეთში, სამხრეთ ოსეთსა და მთიან ყარაბაღში.

გამოქვეყნებულია: 17.03.2016