აშშ-ს სახელმწიფო დეპარტამენტი: წინასწარ არ ვსაუბრობთ სანქციებზე, ვითარებას ყურადღებით ვაკვირდებით

აშშ-ს სახელმწიფო დეპარტამენტის პრესსპიკერმა ნედ პრაისმა, დღეს გამართულ ბრიფინგზე, 5-6 ივლისს საქართველოში განვითარებულ მოვლენებზე და სანქციების შესაძლო გამოყენებაზე ისაუბრა.

მისი თქმით, სანქციები აშშ-ს ერთ-ერთი იარაღია, რომელსაც დაწესებამდე არ აცხადებენ, მაგრამ აშშ საქართველოში მიმდინარე მოვლენებს ახლოდან აკვირდება.

ნედ პრაისმა მწუხარება გამოთქვა “ტვ პირველის” ოპერატორის, ლექსო ლაშქარავას გარდაცვალებასთან დაკავშირებით და აღნიშნა, რომ აუცილებელია დამნაშავეების გამოაშკარავება და მათი პასუხისმგებლობის საკითხის დაყენება:

“ჩვენ მოვუწოდებთ სიმშვიდისკენ და ძალადობის შეჩერებისკენ, რომელმაც ამ შემთხვევაში უკვე გამოიწვია ერთი ადამიანის ტრაგიკული სიკვდილი.”

მისივე თქმით, პასუხისმგებლობა უნდა დადგეს იმ ადამიანებისაც, ვინც აქეზებდა ძალადობას:

“თითოეული ქართველი ჟურნალისტის უსაფრთხოება და საქართველოში დემოკრატიის საიმედოობა მოითხოვს, რომ თითოეული პირი, რომელიც თავს დაესხა მშვიდობიან დემონსტრანტებს და ჟურნალისტებს 5-6 ივლისს ან ისინი ვინც წააქეზა ძალადობა, იყვნენ იდენტიფიცირებული, დაკავებული და კანონის სრული სიმკაცრით გასამართლებული.”

სახელმწიფო დეპარტამენტის პრესსპიკერი საქართველოს ლიდერებს და პოლიტიკურ აქტორებს ადამიანის კონსტიტუციური უფლებების, ჟურნალისტების და პრესის თავისუფლების დაცვის პასუხისმგებლობასაც ახსენებს:

“ჩვენ შევახსენებთ საქართველოს ლიდერებს და მათ სამართალდამცველებს პასუხისმგებლობას დაიცვან ყველას კონსტიტუციურ უფლებები, შევახსენებთ პასუხისმგებლობას, დაიცვან ჟურნალისტები, პრესის თავისუფლება. მოვუწოდებთ ყველა ქართველს, ქართველ თანამდებობის პირს საჯაროდ დაგმონ ამ სახის ძალადობა, რომლის ადგილიც არ არის დემოკრატიაში. 

ჩვენ მსოფლიოს მასშტაბით ამაყად ვმუშაობთ ლგბტქ+ უფლებებისთვის, რათა ლგბტქ+ ადამიანები დაცული იყვნენ ძალადობისგან, კრიმინალიზაციისგან, დისკრიმინაციისგან და სტიგმისგან. ჩვენ ვისწრაფვით გავაძლიეროთ ადგილობრივი ლგბტ+ მოძრაობები. ჩვენ მტკიცედ ვეწინააღმდეგებით ძალადობას ლგბტ+ თემზე და, რა თქმა უნდა, ამ შემთხვევაში, უხეშ ძალადობას გარდაცვლილ ჟურნალისტზე.

რაც შეეხება პრემიერმინისტრს და მის მომავალს, ეს, რა თქმა უნდა, არის ქართველი ხალხის გადაწყვეტილება.”

_______________________________________________

● “ტვ პირველის” ოპერატორი ლექსო ლაშქარავა დღეს დარკძალეს
● “ანტიეკლესიური ძალების მიერ დაგეგმილი შეთქმულება ვერ შედგა” – ღარიბაშვილი გადადგომას არ აპირებს
● “პრემიერი უნდა გადადგეს” – აქცია საქართველოს პარლამენტთან
● რატომ ვერ ჩატარდა ღირსების მარში – რა აჩვენა ამ დღემ?
● ნადირობა მედიაზე. პრაიდის საწინააღმდეგო აქციაზე ოცზე მეტი რეპორტიორი მძიმედ დაშავდა

_________________________________________________

ვითარება საქართველოში ტელეკომპანია „პირველის“ ოპერატორის, ლექსო ლაშქარავას გარდაცვალების შემდეგ გამწვავდა. ლაშქარავა, რომელიც 5 ივლისს ულტრა-მემარჯვენე ჰომოფობიურმა ჯგუფებმა სამსახურებრივი მოვალეობის შესრულების დროს სასტიკად სცემეს, 11 ივლისს გარდაიცვალა. ჟურნალისტები, ოპოზიცია, არასამთავრობო ორგანიზაციები და სამოქალაქო საზოგადოება მომხდარში ხელისუფლებას ადანაშაულებს, ვინაიდან ხელისუფლებამ ვერ მოახერხა 5 ივლისს მშვიდობიანი მომიტინგეების დაცვა მოძალადეებისგან.

5 ივლისს, თბილისში, Tbilisi Pride-ის კვირეულის ფარგლებში “ღირსების მარში” უნდა გამართულიყო. სწორედ ამ ღონისძიების ჩასაშლელად, საპატრიარქოს მოწოდების შემდეგ, გამოვიდნენ 5 ივლისს ჰომოფობიურად განწყობილი ჯგუფები.

დამკვირვებლების თქმით, მიუხედავად იმისა, რომ ქალაქში უკვე დილიდან დათარეშობდნენ რადიკალები, ხელისუფლებამ არასაკმარისი რაოდენობის სამართალდამცავი გამოიყვანა ქუჩაში, რათა მოქალაქეების უსაფრთხოება დაეცვა.

5 ივლისს მარში არ ჩატარდა, ლგბტქ თემის წარმომადგენლები ქუჩაში არ გამოსულან, თუმცა ჰომოფობები მაინც არ დაშლილან – მიზანმიმართულად დასდევდნენ ჟურნალისტებს და ფიზიკურად უსწორდებოდნენ. 5 და 6 ივლისს თბილისში 53 ჟურნალისტი დაშავდა.

ექსპერტების აზრით, ჰომოფობიური ჯგუფების ქმედებები ასევე წაახალისა 5 ივლისს დილით, პრემიერ ღარიბაშვილის მიერ გაკეთებულმა განცხადებამ. ღარიბაშვილმა ვითარების შესაძლო გართულებაზე პასუხისმგებლობა დააკისრა არა ძალადობრივი აქციის წევრებს, არამედ “ღირსების მარშის“” ორგანიზატორებს და მოუწოდა მათ, არ ჩაეტარებინათ მსვლელობა რუსთაველის გამზირზე. ღარიბაშვილმა განაცხადა, რომ დაგეგმილი “ღირსების მარში” მისთვის “მიზანშეუწონელი” და საფრთხის შემცველი იყო. ასევე მან თქვა, რომ ღირსების მარშის მიღმა ოპოზიცია დგას.  

“ღირსების მარში” გაუქმდა, თუმცა, რუსთაველის გამზირზე ძალადობა კიდევ რამდენიმე საათს გაგრძელდა.