სახალხო დამცველი მომიტინგეების პოლიტიკური, საქმიანობისა და მოსაზრების ნიშნით დევნაზე მიუთითებს

სახალხო დამცველის განცხადება

საქართველოს სახალხო დამცველმა 13 მაისს გამოაქვეყნა განცხადება, სადაც აქციაზე დაკავებულ პირთა მდგომარეობაზე, მათ მიმართ განხორციელებულ სავარაუდო ძალის გადამეტებაზე და არასათანადო მოპყრობის შესახებ ისაუბრა.

სახალხო დამცველის ლევან იოსელიანის თქმით, ოპოზიციური პარტიების წარმომადგენლებზე, ჟურნალისტებსა და აქციის მონაწილეებზე თავდასხმის ფაქტებში იკვეთება პოლიტიკური, საქმიანობისა და მოსაზრების ნიშნით ადამიანთა დევნის ნიშნები, რაც კატეგორიულად ეწინააღმდეგება კონსტიტუციითა და საერთაშორისო აქტებით გარანტირებულ ადამიანთა ინდივიდუალურ უფლებებს, დემოკრატიული საზოგადოებისა და სამართლებრივი სახელმწიფოს ძირითად პრინციპებს.

• ევროკავშირის სპეციალური წარმომადგენელი სამხრეთ კავკასიაში: საით მიდიხარ, საქართველო?
• “ვიწყებთ ბაზის შექმნას, სადაც თავს მოიყრის ინფორმაცია შანტაჟში ჩართულ პირებზე” – შალვა პაპუაშვილი
• მუქარა, გინება, ცემა. რა ფაზაში შევიდა “ქართული ოცნება”. ექსპერტების კომენტარები

სახალხო დამცველი აცხადებს, რომ მან სპეციალურ საგამოძიებო სამსახურს ოპოზიციის წევრებზე, აქტივისტებზე, ჟურნალისტებზე და კანონპროექტის წინააღმდეგ მომიტინგე მოქალაქეებზე თავდასხმების დროული და ეფექტური გამოძიების მოთხოვნით მიმართა. სახალხო დამცველის აპარატმა მოითხოვა ტელეკომპანია „ტვ პირველთან“ შესაძლო ჩასაფრებისა და ტელეკომპანიის გადამღები ჯგუფის საქმიანობის ხელშეშლის ფაქტის გამოძიება.

„კერძოდ, სახალხო დამცველის აპარატმა საგამოძიებო უწყებებს, დროული და ეფექტიანი რეაგირების განხორციელების მიზნით, მიმართა ლევან ხაბეიშვილის, სოფო ჯაფარიძის, ალეკო ელისაშვილის, გია ჯაფარიძის, გიორგი მუმლაძის, ბორის ჩელე ყურუას, ნოდარ ჩაჩანიძის, დიმიტრი ჩიქოვანის, ბაიკერ ლაშა ღვინიანიძის, დიჯეი გიორგი შენგელიას, სამოქალაქო აქტივისტის ანა სუბელიანის მამის, აშშ-სა და საქართველოს მოქალაქე თეოდორ ჯონასის, პედაგოგ ლადო აფხაზავას მიმართ განხორციელებული ძალადობის ფაქტებზე;

ასევე, ონლაინ გამოცემა „პუბლიკას“ ჟურნალისტ ალექსანდრე ქეშელაშვილისა და ამავე მედიის ჟურნალისტების, ონლაინ გამოცემა „ტაბულას“ ჟურნალისტ გიორგი ბადრიძის, გამოცემა „აპრილის“ ჟურნალისტ გიორგი ბასხაჯაულის, ტელეკომპანია „ტვ პირველთან“ შესაძლო ჩასაფრებისა და ამავე ტელეკომპანიის გადამღები ჯგუფის საქმიანობის ხელშეშლაზე, „ინფორმაციის თავისუფლების განვითარების ინსტიტუტის“ (IDFI) აღმასრულებელ დირექტორ გიორგი კლდიაშვილსა და „ფორმულას“ გადამღებ ჯგუფზე თავდასხმის ფაქტებზე; ასევე, 13 მაისსა და წინა დღეებში მომხდარ/საჯაროდ გავრცელებულ არაერთ ვიდეომასალაში აღბეჭდილ ძალადობრივ ქმედებებზე, მათ შორის, ლეონიძის ქუჩაზე მოქალაქის მიმართ განხორციელებული ძალადობის, გმირთა მოედანზე ახალგაზრდების ჯგუფზე მომხდარი თავდასხმის შემთხვევებზე“, – ვკითხულობთ ლევან იოსელიანის განცხადებაში.

სახალხო დამცველი მოუწოდებს საგამოძიებო უწყებებს, უმოკლეს ვადებში გამოკვეთოს სავარაუდო დამნაშავის პასუხისმგებლობა და გაატაროს შესაბამისი სამართლებრივი ღონისძიებები, როგორც კანონდამრღვევი პოლიციელების, ისე მოძალადე ფიზიკური პირებისა თუ ჯგუფების, და მათი ორგანიზატორების ან/და წამქეზებლების იდენტიფიცირების მიზნით.

გარდა იმისა, რომ შინაგან საქმეთა სამინისტროს სხვადასხვა ქვედანაყოფის თანამშრომლები გამოირჩევიან აგრესიული ქმედებებით, იმ ადამიანების წინააღმდეგ, ვინც აქტიურად აპროტესტებს “აგენტების კანონს”, ფართომასშტაბიანი სიძულვილის კამპანია მიმდინარეობს. ბოლო პერიოდში ადამიანებს თავს ესხმიან და სასტიკად უსწორდებიან დაუდგენელი ჯგუფები. აქტივისტების სახლებსა და ოფისებთან აკრავდენ შეურაცხმყოფელ პლაკატებს. უტოვებენ შეურაცხმყოფელ წარწერებს მანქანებზე.

ადამიანებს უშლიდნენ საზოგადოებრივი თავშეყრის ადგილებში გადაადგილებას, თუ მათ სამოსზე ჰქონდათ წარწერა “არა რუსულ კანონს”, ან მსგავსი შინაარსით.

გარდა ფიზიკური ძალადობისა, “აგენტების კანონის” მოწინააღმდეგეების მიმართ ხორციელდება ფსიქოლოგიური ძალადობა და მუქარა. მათ ტელეფონზე ურეკავენ, აგინებდნენ და ემუქრებიან.