ნიცაში თავდამსხმელმა 3 ადამიანი მოკლა, ერთ-ერთს თავი მოჰკვეთა. რა მოხდა მანამდე
2020 წლის 29 ოქტომბერს, ნიცასა და ავინიონში მომხდარმა სისხლიანმა ინციდენტებმა გააგრძელეს ხელისუფლებისა და ისლამური თემის დაპირისპირება საფრანგეთში.
ნიცაში თავს დაესხნენ ეკლესიაში მიმავალ მრევლს. ორი ადამიანი მოკლეს, ერთ-ერთს თავი მოჭრეს. მძიმედ დაიჭრა რამდენიმე ადამიანი.
თავდამსხმელი დაჭრილი და დაკავებულია. ის „ალაჰ აქბარს“ ყვიროდა იმ დროსაც კი, როდესაც სამედიცინო დახმარებას უწევდნენ.
თითქმის იმავდროულად, ავინიონში, პოლიციელებმა მოკლეს ადამიანი, რომელიც დანით ხელში დაესხა მათ თავს და ყვიროდა ისლამურ ლოზუნგებს.
გამოძიებას სპეციალური ანტიტერორისტული პროკურატურა აწარმოებს.
ეს ტრაგედიები მოვლენათა სერიის შემდეგ განვითარდა:
2020 წლის 16 ოქტომბერს, ჩეჩენი ემიგრანტების შვილმა პარიზში, პირდაპირ ქუჩაში, თავი მოჰკვეთა სკოლის მასწავლებელ სამუელ პატის იმის გამო, რომ მან გაკვეთილზე, წინასწარმეტყველი მუჰამედის კარიკატურები აჩვენა.
ეს კარიკატურები 2015 წელს, სატირულ ჟურნალ Charlie Hebdo-ში გამოქვეყნდა. ისლამურ სამყაროში, ის მიზანმიმართულ შეურაცხყოფად განიხილება და იმავე წელს, აღნიშნულ რედაქციაზე სისხლიანი თავდასხმისა და 11 ადამიანის სიკვდილის მიზეზი გახდა.
პარიზში, მასწავლებლის მკვლელობამდე ცოტა ხნით ადრე, ჟურნალმა თავიდან დაბეჭდა ის კარიკატურები.
28 ოქტომბერს კი, Charlie Hebdo-მ საზოგადოებას ახალი კარიკატურებიც წარუდგინა – თურქეთის პრეზიდენტ ერდოღანის, რომელიც წარმოდგენილია უცხო ქალთან ერთად, ნახევრადშიშველ მდგომარეობაში, ალკოჰოლური სასმელებით ხელში.
პრეზიდენტმა ემანუელ მაკრონმა ინციდენტთან დაკავშირებით მკაცრი რეაგირება მოახდინა. ის „ისლამური სეპარატიზმის“ შესახებ გამოვიდა სიტყვით და ისლამს უწოდა „რელიგია, რომელიც მთელ მსოფლიოში კრიზისს განიცდის“.
„საფრანგეთი არ იტყვის უარს თავის უფლებაზე, ხატოს კარიკატურები, მათ შორის, წინასწარმეტყველი მუჰამედის. ჩვენი თანამემამულეები მოკლეს იმის გამო, რომ ბავშვებს სიტყვის თავისუფლებას ასწავლიდნენ. ობსკურანტიზმი და ძალადობა ვერ გაიმარჯვებს“, – განაცხადა მაკრონმა.
იგივე შეტყობინებები გაიმეორა მან სხვა გამოსვლების დროსაც. საფრანგეთის სხვადასხვა ქალაქში, ათასობით ადამიანი გამოვიდა ქუჩაში მასწავლებლის ხსოვნისთვის პატივის მისაგებად. მონპელიესა და ტულუზაში აქციის დროს, სამთავრობო შენობებზე პროექტორით გაუშვეს იგივე კარიკატურები, რომელიც პატიმ გაკვეთილზე აჩვენა მოსწავლეებს.
ამის შემდეგ, ისლამური სამყაროს ლიდერებმა მთელ მსოფლიოში, ბოიკოტი გამოუცხადეს საფრანგეთს, პრეზიდენტი მაკრონი კი ტერორიზმის მხარდაჭერასა და რელიგიათაშორისი დაპირისპირებების გაღვივებაში დაადანაშაულეს.
მთელ მსოფლიოში, მათ შორის, საფრანგეთში მიმდინარე აქციებზე, მაკრონის ფოტოსურათებს წვავენ.
მაკრონის საწინააღმდეგო აქციები გაიმართა თურქეთში, სირიაში, ლიბიაში, პაკისტანში, ერაყში, ბანგლადეშში, სომალიში, ინდოეთსა და ღაზის სექტორში.
ყველაზე მასშტაბური მიტინგი ბანგლადეშში გაიმართა, მასში, 40 ათასზე მეტმა ადამიანმა მიიღო მონაწილეობა, აქციის მიმდინარეობისას მაკრონის ფიტული დაწვეს.
თურქეთში, ქუვეითში, იორდანიაში, ბანგლადეშში, ყატარსა და სუდანში მაღაზიებიდან ფრანგულ პროდუქციას იშორებენ.
თურქეთის პრეზიდენტმა ერდოღანმა მაკრონს „ფსიქიკური ჯანმრთელობის შემოწმება“ ურჩია და მოსახლეობას მოუწოდა, არ შეიძინონ ფრანგული საქონელი.
ჩეჩნეთის მეთაური კადიროვი და რესპუბლიკის მთავარი მუფთი კი პირდაპირ დაემუქრნენ საფრანგეთის პრეზიდენტს.
