„რუსულო გემო, იდი ნა***“. ქართველი მეზღვაურები, ნიჩბები და რუსეთ-უკრაინის ომის მემები
„რუსულო გემო – იდი ნა***“ – რუსეთ-უკრაინის ომის მთავარი მემი
მემი, რომელიც რუს სამხედროებთან უკრაინელი მესაზღვრეების მოლაპარაკებების ჩანაწერიდან დაიბადა, საოცარი სისწრაფით მოედო სოციალურ ქსელებს და საინფორმაციო გამოშვებებს და, ფაქტობრივად, დაწყებული ომისა და რუსული აგრესიის მიმართ უკრაინის წინააღმდეგობის მთავარ სიმბოლოდ იქცა.
ჩანაწერი სოციალურ ქსელებსა და მედიაში 25 თებერვალს გაჩნდა – უკრაინაში რუსეთის შეჭრის მეორე დღეს. ჩანაწერის მიხედვით, რუსული სამხედრო ფლოტი უკრაინელი მესაზღვრეების პატარა გარნიზონისგან მოითხოვს, დანებდნენ, შავი ზღვის კუნძულ ზმეინზე.
„მე რუსული სამხედრო გემი ვარ. გთავაზობთ დაყაროთ იარაღი და დანებდეთ სისხლისღვრისა და გაუმართლებელი მსხვერპლის თავიდან ასაცილებლად. წინააღმდეგ შემთხვევაში, დაიბომბებით“, – ორჯერ იმეორებს ხმა.
უკრაინელი მესაზღვრე მას სიტყვასიტყვით ასე პასუხობს: „რუსული სამხედრო გემო, იდი ნახ..ი!“
მოგვიანებით, უკრაინის პრეზიდენტმა ვოლოდიმირ ზელენსკიმ განაცხადა, რომ 13-ვე მესაზღვრე, რომლებიც კუნძულს იცავდნენ, დაიღუპა. და რომ მათ მიენიჭებათ უკრაინის გმირის წოდება სიკვდილის შემდეგ.
თუმცა, რუსეთის სარდლობამ გამოაცხადა, რომ კუნძულ ზმეინზე 82 უკრაინელი ჯარისკაცი მსახურობდა, და ყველა მათგანი ტყვედ ჩაბარდა და ცოცხალია.
რუსულ არხებზე აჩვენეს სიუჟეტი იმის შესახებ, როგორ გადაიყვანეს დატყვევებული უკრაინელი ჯარისკაცები სევასტოპოლში. უკრაინულ მედიაში ამ სიუჟეტს ფეიკი უწოდეს.
თუმცა, 28 თებერვალს, უკრაინის თავდაცვის სამინისტრომ განაცხადა, რომ შესაძლოა, მესაზღვრეები კუნძულ ზმეინიდან მართლაც ცოცხლები არიან და ტყვეობაში იმყოფებიან.
ამის მიუხედავად, მემმა რუსული სამხედრო გემის შესახებ უკვე თავისი საკუთარი ცხოვრება დაიწყო. ამ ლოზუნგს უკრაინის ქალაქებში ბილბორდებზეც კი ათავსებენ, მას პოლიტიკოსებიც იყენებენ.
ასე მაგალითად, რუსეთთან მოლაპარაკებებზე უკრაინის დელეგაციის ხელმძღვანელმა დავით არახამიამ 28 თებერვალს დაწერა, რომ „მოლაპარაკებები ან უკრაინისთვის საჭირო მიმართულებით წავა, ან ისე, როგორც რუსული სამხედრო გემი“.
მემ-გაგრძელება: „ნიჩბები გამოიყენეთ“
„რუსული გემის“ ისტორიამ მოულოდნელი გაგრძელება ჰპოვა ახალი ვიდეორგოლის სახით, რომელიც მაშინვე ვირუსული გახდა.
ვიდეოზე სამოქალაქო გემის – რომელიც გემების საწვავით მომარაგებისთვისაა განკუთვნილი – კაპიტნის თანაშემწე რადიოთი რუსული გემის ეკიპაჟს ელაპარაკება. შეიტყობენ რა, რომ გემი რუსულია, ეკიპაჟის ორივე წევრი – ქართველები, მომსახურებაზე უარს ეუბნებიან და უკრაინელი მესაზღვრეების ფრაზას იმეორებენ.
ხოლო რუსების შეპასუხებაზე, საწვავი გვითავდებაო, ნიჩბების მოსმას სთავაზობენ.
რა გემი იყო, ან სად და როდის მიმდინარეობდა ეს მოლაპარაკებები, უცნობია.
ნიჩბების გამოყენების თემა, როგორც გადაადგილების ალტერნატიული საშუალებისა, ასევე აქტიურად თამაშდება სოციალურ ქსელებში – რუსეთის წინააღმდეგ საავიაციო სანქციების თემის ილუსტრირებისას.
რუსეთმა უკრაინაში შეჭრა 2022 წლის 24 თებერვალს დაიწყო. უკვე რამდენიმე დღეა, უკრაინის დედაქალაქ კიევისთვის, ასევე ქვეყნის ბევრ ქალაქში მძიმე ბრძოლები მიმდინარეობს, რუსეთის ხელისუფლება აცხადებს, რომ შეჭრის მიზანი – ხელისუფლების შეცვლა, უკრაინის „დემილიტარიზაცია და დენაციფიკაციაა“.
დასავლეთის ქვეყნებმა განაცხადეს, რომ რუსეთმა დამოუკიდებელ ქვეყანაში არაპროვოცირებული შეჭრა განახორციელა, და მის წინააღმდეგ ახალი სანქციები შემოიღეს, ასევე, უკრაინას ეხმარებიან იარაღის მიწოდებით და ჰუმანიტარული დახმარების აღმოჩენით.
