რუსული სამთავრობო მედია: საქართველო ირჩევს რუსეთს და საკუთარ მომავალს
რუსული სამთავრობო მედია საქართველოზე
რუსულმა სამთავრობო მედია РИА Новости-მ გამოაქვეყნა სტატია სათაურით “საქართველო ირჩევს რუსეთს და საკუთარ მომავალს”, რომელშიც მიმოხილულია რუსეთიდან იმპორტის მონაცემები და რუსეთ-საქართველოს ეკონომიკური ურთიერთობები.
სტატიაში ნათქვამია, რომ 2022 წლის შესაბამის მაჩვენებლებთან შედარებით, შავი ოქროს იმპორტი 275%-ით გაიზარდა.
ამასთან, სტატიაში ვკითხულობთ, რომ საქართველოს ნავთობპროდუქტების იმპორტიორთა კავშირის მონაცემებით, პირველ კვარტალში ქვეყანამ თხევადი ბუნებრივი აირის შესყიდვები მესამედით გაიზარდა, თბილისმა კი ნავთობპროდუქტები $250 მილიონად იყიდა, საიდანაც რუსულ იმპორტზე $168 მილიონი მოდიოდა.
ავტორის თქმით, ოფიციალური სტატისტიკის მიხედვით, საქართველო-რუსეთს შორის სავაჭრო ბრუნვამ მიმდინარე წლის პირველ ორ თვეში, წინა წლის შესაბამის პერიოდთან შედარებით, 48%-ით გაიზარდა და შესაბამისად, $467 მილიონს გადააჭარბა.
” საქართველომ 2022 წლის თებერვალში რუსეთ-უკრაინის ომის დაწყების შემდეგ მოსალოდნელზე მეტად, კატეგორიული უარი თქვა რუსეთის წინააღმდეგ ეკონომიკური სანქციების დაწესებაზე.
ამან გამოიწვია მნიშვნელოვანი პოლიტიკური სკანდალი, კიევმა თბილისი ღალატში პირდაპირ დაადანაშაულა: ამბობდნენ, რომ [საქართველოს] ღიად უჭერდნენ 2008 წელს მხარს.
მიუხედავად ძლიერი რუსოფობიისა, რომელიც ჭარბობს მოსახლეობის ნაწილს შორის, ქართველი პარლამენტარები ბევრად უფრო გამჭრიახები აღმოჩნდნენ, ან შესაძლოა, ისინი უბრალოდ უკეთესები არიან მათემატიკაში.
პარლამენტმა ფაქტობრივად უგულებელყო პრეზიდენტ ზურაბიშვილის ყველა რუსოფობიური თავდასხმა და ხელიც არ შეუშალა პირდაპირი ფრენების აღდგენას, რომელიც ვლადიმირ პუტინის პირადი ინიციატივით დაიწყო”. – ვკითხულობთ სტატიაში.
ავტორი ხაზს უსვამს, რომ თბილისის მერმა, კახა კალაძემ დასავლურ მედიასთან ინტერვიუში აღნიშნა, რომ თანამოქალაქეების ინტერესებიდან გამომდინარე იმოქმედებდა, “მიუხედავად იმისა”, რომ ერთ წელზე მეტი აქვს გატარებული კიევის დინამოში.
“სულ რაღაც ერთი თვის წინ განვიხილავდით მნიშვნელოვან პროექტს რაშტ-ასტარას სარკინიგზო ხაზის დასაკავშირებლად, რომელიც რეალურად ქმნის პირდაპირ სატრანსპორტო დერეფანს რუსეთიდან ირანის გავლით ინდოეთის პორტ მუმბაიმდე.
შემდეგ ჩვენ ვახსენეთ ქართული მიმართულების პოტენციალი, რასაც მაშინ კითხვის ნიშანი დავუსვით. ივნისის ბოლომ კი აჩვენა, რომ ჩვენი დიპლომატები და ენერგეტიკოსები ტყუილად არ ჭამენ პურს. თუ ვიმსჯელებთ ენერგიის იმპორტის ცვლილებების დინამიკით, შეიძლება ველოდოთ სხვა სახელმწიფოთაშორისი პროექტების გალღობასაც. კრიტიკულია არა მხოლოდ რუსეთისთვის, არამედ უაღრესად მომგებიანი საქართველოსა და მთლიანად რეგიონისთვის.
მოსკოვისა და თბილისის საკმაოდ ბუნდოვანი ურთიერთობების გათვალისწინებით, მით უფრო სასიამოვნოა დაკვირვება: მეგობრობას თუ არა ჯანსაღ პრაგმატიზმს ბევრად მეტი სარგებელი მოაქვს, ვიდრე თვითმკვლელობის ტოლფას ხტუნაობას სანქციების ორმოში და სავაჭრო ურთიერთობების გაწყვეტას”. – ნათქვამია სტატიაში.
● ვინ და როგორ ეხმარება რუსეთს ევროპარლამენტში – “ნოვაია გაზეტას” კვლევა
● გაზი, წყლის ჭავლი, დაკავებები – მასშტაბური აქცია თბილისში რუსული კანონის წინააღმდეგ. ქრონოლოგია და ბევრი ფოტო
● რუსული სამთავრობო მედია: საქართველო მზადაა ევროკავშირთან ურთიერთობა გაწყვიტოს
ეს არ არის პირველი შემთხვევა, როცა რუსეთის ფედერაციის მაღალი რანგის ჩინოვნიკები და სამთავრობო მედია, საქართველოს ხელისუფლებას უკრაინასთან და დასავლეთთან მიმართებაში აქებენ.
გასული წლის 25 მარტს რუსეთის ფედერაციის საბჭოს საერთაშორისო საქმეთა კომიტეტის თავმჯდომარემ, გრიგორი კარასინმა ასევე შეაქო საქართველოს ხელისუფლება უკრაინის საკითხზე პოზიციის გამო. საქართველოს რეაქციას დასავლეთის ანტირუსულ სანქციებზე კარასინმა “გაწონასწორებული” უწოდა და ხაზგასმით აღნიშნა, რომ რუსეთში „ეს ფაქტი შეუმჩნეველი არ დარჩება“.
ასევე, კარასინის თქმით, მოიხსნა ქართულ საქონელზე დაწესებული ყველა შეზღუდვა და რუსეთში ქართული ექსპორტი 14-ჯერ გაიზარდა.
2022 წლის შემაჯამებელ პრესკონფერენციაზე კი სერგეი ლავროვმა განაცხადა, რომ საქართველოს, აფხაზეთსა და ცხინვალს შორის დიალოგისთვის საჭირო მექანიზმები არსებობს, რომელშიც “რუსეთიც მონაწილეობს”. მისივე განმარტებით, მოსკოვი საქართველოსა და ოკუპირებულ ტერიტორიებს შორის ურთიერთობების აშენების მომხრეა.
ლავროვი ასევე აღნიშნავს, რომ დასავლური ქვეყნები და ინსტიტუტები ჟენევის ფორმატის უკრაინაში მიმდინარე მოვლენების “მძევლად ქცევას” ცდილობენ, რაც მისი აზრით, “პოლიტიკური წყენებითა და კაპრიზებითაა განპირობებული”.
აღსანიშნავია, რომ 10 მაისს რუსეთის პრეზიდენტმა ვლადიმერ პუტინმა ხელი მოაწერა საქართველოს მოქალაქეებისთვის სავიზო რეჟიმის გაუქმების შესახებ დოკუმენტს 2023 წლის 15 მაისიდან. მეორე განკარგულებით კი, პუტინმა გააუქმა რუსეთიდან საქართველოში საჰაერო მიმოსვლის აკრძალვა.
