დღეს საქართველოს ამერიკელი სენატორები, ჯინ შაჰინი და დიკ დურბინი ესტუმრნენ. ჯინ შაჰინმა პრესკონფერენციაზე“ქართული ოცნებიდან” ფორმალურად გასული დეპუტატების, “ხალხის ძალის” მიერ ინიციირებულ “უცხოური აგენტების” კანონზე განაცხადა, რომ კანონპროექტი არაა აშშ-ის კანონმდებლობის მსგავსი და ის რუსული კანონის მსგავსია.
ასევე, შაჰინის თქმით, მსგავსი კანონი მიღებულ იქნა უნგრეთის მიერ და დადასტურდა, რომ ის არის შეუსაბამო ევროკავშირის სტანდარტებთან, ასევე ადამიანის უფლებების რეალიზებასთან და “როცა ვსაუბრობთ დემოკრატიის უკუსვლაზე ესეც იგულისხმება.”
“ხალხის ძალის” მიერ ინიციირებული “უცხოური გავლენების გამჭვირვალობის შესახებ” კანონპროექტი პარლამენტის ბიუროს სხდომაზე დღეს დარეგისტრირდა და განსახილველად იურიდიულ კომიტეტს გადაეცა.
ბიუროს სხდომის პარალელურად, პარლამენტში დღეს მედიის წარმომადგენლებმა საპროტესტო აქცია გამართეს. მათი თქმით, რუსული კანონის დამტკიცების შემთხვევაში, თავისუფალი მედიის არსებობა ქვეყანაში კანონით აიკრძალება.
სავარაუდოდ, ეს საკითხი მიმდინარე კვირაში სესიაზე განხილვისთვის არ გავა. საპარლამენტო უმრავლესობა საბოლოო პოზიციის უახლოეს 2 კვირაში დაფიქსირებას აპირებს.
სენატორმა შაჰინმა დაადასტურა, რომ პრემიერ ღარიბაშვილთან შეხვედრაზე ივანიშვილის საკითხიც გაჟღერდა, ისევე “როგორც სხვა საუბრების დროს.” მისი თქმით, საუბარი შეეხო 12 პუნქტიან გეგმას და ასევე დეოლიგარქიზაციას.
ჯინ შაჰინმა ასევე აღნიშნა, რომ მნიშვნელოვანია, ჟურნალისტებს ჰქონდეთ შესაძლებლობა, იმუშაონ თავისი პროფესიით. სენატორის განმარტებით, ევროკავშირის რეკომენდაციებში მედიათავისუფლება და ადამიანის უფლებები ერთ-ერთი მთავარი მიმართულებაა. შაჰინმა ხაზი გაუსვა, რომ საქართველომ უნდა უპასუხოს ამ გამოწვევას, თუ ფიქრობს ევროკავშირში გაწევრიანებაზე.
“აშშ 30 წელია მხარს უჭერს საქართველოს და ქართველი ხალხის მისწრაფებას, იცხოვრონ დემოკრატიულ ქვეყანაში, ჰქონდეთ კეთილდღეობა, წარმატება და რა თქმა უნდა, მხარს უჭერს საქართველოს მისწრაფებას, გახდეს ევროკავშირისა და NATO-ს წევრი და ჩვენ, ეს მხარდაჭერა, დღეს შეხვედრებზე კიდევ ერთხელ დავადასტურეთ.
ჩვენ ვურჩიეთ შეხვედრებზე მთავრობას, რომ გააგრძელონ მხარდაჭერა ისეთი საკითხების მიმართ, როგორიცაა ანგარიშვალდებულება, გამჭვირვალობა და მხარი დაუჭირონ და წინ წაწიონ ქართველი ხალხის სურვილი, რაც მდგომარეობს ევროატლანტიკურ ინტეგრაციასა და ევროპასთან დაახლოებაში.” – განაცხადა შაჰინმა.
მიხეილ სააკაშვილის შესახებ დასმულ შეკითხვას სენატორმა დიკ დურბიმნა უპასუხა, რომ ყველას მოუწოდებს ჰუმანური მოპყრობისა და მისი უფლებების დაცვისკენ:
“სააკაშვილს პირადად ვიცნობ. გავიცანი, როდესაც პრეზიდენტი იყო და ხშირად გვსტუმრობდა. ბოლო დროს, ყურადღებით ვადევნებთ თვალყურს მის ირგვლივ სიტუაციას. მე არ მაქვს ინფორმაცია სამართლებრივი ბრალდებების შესახებ, რაც მის მიმართაა. ასევე, არც სამედიცინო კუთხით არ ვარ ექსპერტი, რომ ვისაუბრო, თუმცა მე ვკითხულობ ანგარიშებს ამასთან დაკავშირებით და ვიცით, რომ მისი მდგომარეობა უარესდება. მე მოვუწოდებ ყველას ჰუმანური მოპყრობისკენ, მისი უფლებების დაცვისკენ. მას, ისევე როგორც სხვა ნებისმიერ პატიმარს უნდა გაეწიოს სათანადო სამედიცინო დახმარება.”
16 თებერვალს აშშ-ს სახელმწიფო დეპარტამენტის სპიკერი, ნედ პრაისი “ქართული ოცნებიდან” ფორმალურად გამიჯნული დეპუტატების ინიციატივას გამოეხმაურა “უცხოური აგენტების” შესახებ და განაცხადა, რომ მსგავსი კანონი პოტენციურ საფრთხეს შეუქმნის საქართველოს ევროატლანტიკურ ინტეგრაციას. პრაისის განმარტებით, კანონი დაფუძნებულია არა აშშ-ს, არამედ რუსულ და უნგრულ რეგისტრაციის აქტზე. ამის შესახებ ნედ პრაისმა ბრიფინგზე ისაუბრა.
მისივე შეფასებით, შემოთავაზებული კანონი გარიყავს და გააჩუმებს დამოუკიდებელ ხმას საქართველოს მოქალაქეებისა, რომლებიც თავიანთი საზოგადოებისთვის უკეთესი მომავლის შესაქმნელად იღწვიან.
“ქართული ოცნებიდან” ფორმალურად გამოყოფილი დეპუტატები, რომლებმაც მოძრაობა “ხალხის ძალა” დააფუძნეს, პარლამენტში “უცხოური გავლენის გამჭვირვალობის შესახებ” კანონპროექტის არეგისტრირებენ. დეპუტატების თქმით, აღნიშნული კანონპროექტი უცხოური დაფინანსებით მოქმედი ორგანიზაციების საქმიანობას შეეხება.
“უცხოური აგენტების” რეესტრში შესვლა მოუწევთ იმ ქართულ არასამთავრობო ორგანიზაციებს, რომლებიც დაფინანსებას უცხოური წყაროებიდან იღებენ. როგორც მოძრაობის ერთ-ერთი ლიდერი და ყოფილი სახალხო დამცველი სოზარ სუბარი ამბობს, ეს იქნება დაფინანსების გამჭვირვალობის დასავლური ანალოგი და მას რუსულ მოდელთან საერთო არაფერი აქვს.
“ხალხის ძალის” ერთ-ერთი ლიდერის, გურამ მაჭარაშვილის თქმით, მათ მიაჩნიათ, რომ საჯაროობის და გამჭვირვალობის პრინციპებიდან გამომდინარე საზოგადოებისთვის ცნობილი უნდა იყოს არა მხოლოდ იმ პოლიტიკოსების შემოსავლის წყაროები, რომლებიც გადაწყვეტილებებს იღებენ სახელმწიფოში, არამედ გამჭვირვალე უნდა იყოს ისეთი სუბიექტების (ენჯეოებისა და მედიის) შემოსავლის წყაროებიც, რომელთა მიზანია ზეგავლენა მოახდინონ საჯარო გადაწყვეტილებებზე და რომლებიც მონაწილეობენ საზოგადოებრივი აზრის ფორმირებაში ან აქტიურ მონაწილეობას იღებენ საკანონმდებლო და აღმასრულებელი ხელისუფლების მიერ კანონების თუ გადაწყვეტილებების მიღების დროს გამართულ დისკუსიებში.
მისივე განმარტებით, ზემოაღნიშნული სუბიექტების უცხოური გავლენის აგენტად რეგისტრაციის საკითხს უზრუნველყოფს საჯარო რეესტრის ეროვნული სააგენტო.
