რუსი დეპუტატი აზერბაიჯანს ბირთვული შეტევით დაემუქრა, კრემლს ჩარევა მოუხდა

რუსი დეპუტატის მუქარა აზერბაიჯანს

რუსეთის სახელმწიფო დუმის დეპუტატმა მიხეილ დელიაგინმა, რუსეთის სახელმწიფო ტელევიზიის ეთერში საუბრისას, განაცახადა, რომ ყარაბაღში “აგრესიული ქმედებებისთვის” აზერბაიჯანი მკაცრად უნდა “დაისაჯოს”. შემდეგ მან ჩაატარა გამოკითხვა თემაზე – “ღირს თუ არა აზერბაიჯანის ნავთობის ინდუსტრიაზე ბირთვული იარაღით შეტევა?”

რუსეთის ფედერაციის პრეზიდენტის პრესმდივნის, დმიტრი პესკოვისა და საგარეო საქმეთა სამინისტროს ოფიციალური წარმომადგენლის, მარია ზახაროვას სახით, კრემლს საკითხში ჩარევა მოუხდა. მხოლოდ ამის შემდეგ მოუხადა ბოდიში დელიაგინმა აზერბაიჯანელებს.

• “სამხელისუფლებიანობა” ყარაბაღის აღმოსავლეთით. მხარეების საპირისპირო განცხადებები
• სომხეთი მთიან ყარაბაღში აზერბაიჯანის შეჭრაზე იუწყება, ბაქო ამას პოზიციების დაზუსტებას უწოდებს

რა მოხდა?

მოწოდება აზერბაიჯანის “დასჯისკენ” რუსეთის ფედერაციის სახელმწიფო სათათბიროს დეპუტატმა, პარტიიდან “სამართლიანი რუსეთი”, დუმის ეკონომიკური პოლიტიკის კომიტეტის თავმჯდომარის მოადგილე მიხაილ დელიაგინმა, უსეთის სახელმწიფო ტელევიზიის ეთერში, გააჟღერა.

დეპუტატს არ მოეწონა აზერბაიჯანის „აგრესია“ ყარაბაღში. კერძოდ, ის, რომ აზერბაიჯანის თავდაცვის სამინისტრომ რუსი კოლეგები ტყუილში ამხილა. საუბარია რუსეთის თავდაცვის სამინისტროს განცხადებაზე, რომელშიც ნათქვამი იყო, რომ ყარაბაღის აღმოსავლეთით 24 მარტს დაკავებული პოზიციებიდან აზერბაიჯანმა ჯარი გაიყვანა.

24 მარტს, აზერბაიჯანის შეიარაღებულმა ძალებმა დაიკავეს ყარაბაღის აღმოსავლეთით სოფელი ფარუხი და სტრატეგიულად მნიშვნელოვანი მთა დაშბაში. ამ ადგილებში დროებით რუსეთის სამშვიდობო ძალები არიან განლაგებული. აზერბაიჯანის არმიის ხელმძღვანელობამ ამ მოქმედებას ადგილმდებარეობის დაზუსტება უწოდა.

ბაქოში ჯარის გადაადგილება სომხეთისა და რუსი სამშვიდობოების მიერ 2020 წლის 10 ნოემბრის სამმხრივი განცხადების მე-4 პუნქტის პირობების შეუსრულებლობით ახსნეს, რომლის მიხედვითაც სომხეთის შეიარაღებულმა ძალებმა ყარაბაღი უნდა დატოვონ.

ტელევიზიით საუბრის შემდეგ, მიხაილ დელიაგინმა, Telegram-ის არხზე გამოკითხვაც ჩაატარა. შეკითხვა – აზერბაიჯანის ნავთობის ინდუსტრიაზე ბირთვული შეტევის მიზანშეწონილობას ეხებოდა.

დეპუტატის სატელევიზიო გამოსვლასა და გამოკითხვას აზერბაიჯანში დიდი აღშფოთება მოჰყვა. გაისმა მოწოდება პარტია „სამართლიანი რუსეთის“ ექსტრემისტულად გამოცხადების შესახებაც. შეგახსენებთ, ამ პარტიის წევრია დეპუტატი დელიაგინი.

აზერბაიჯანელი დეპუტატის კომენტარი

მომხდარს აზერბაიჯანის პარლამენტსი დეპუტატი, რასიმ მუსაბეკოვი გამოეხმაურა.

„ჟირინოვსკი სასიკვდილო სარეცელზეა და მის როლზე – ყველაზე “ეპატაჟური” პოლიტიკოსი სახელმწიფო სათათბიროში, შერჩევაა გამოცხადებული. ერთ-ერთი პირველი, ამ როლზე, აშკარად ახალი დეპუტატი, ვინმე მიხაილ დელიაგინი “განიხილება”.

როგორც ეკონომისტს, მას, რუსეთის ჩათვლით, არსად არავინ ახსენებს. როგორც ჩანს, სწორედ ამიტომ, ამ სუბიექტმა გადაწყვიტა გეოპოლიტიკურ და სამხედრო სფეროში გამოიჩინოს თავი

28 მარტს, სახელმწიფო არხის, „Россия 1“-ის ოდიოზური გადაცემის „60 წუთის“ ეთერში, დელიაგინმა აზერბაიჯანის ნავთობის ინფრასტრუქტურაზე სამხედრო დარტყმისკენ მოწოდება გააჟღერა.

დასავლეთის მიერ უკრაინაში შეჭრის გამო რუსეთის ენერგორესურსებზე გამოცხადებული ემბარგოს პასუხად, მოსკოვი ფიქრობს ბაზარზე დეფიციტის შესაქმნელად ხელოვნურად შეზღუდოს ნავთობისა და გაზის მიწოდება სხვა ექსპორტიორი ქვეყნებიდან.

ამ მიზნით, გამოგონილი საბაბით, ნოვოროსიისკიდან ყაზახური ნავთობის გადაზიდვა შეჩერდა. როგორც ჩანს, კრემლის ზოგიერთი უბედური სტრატეგის თავში ასეთი იდეები მწიფდება და დელიაგინს მხოლოდ მათი საჯაროდ გაჟღერება დაევალა.

ამ ხალხის ინფორმირებისთვის, შეგახსენებთ, რომ აზერბაიჯანს პოსტსაბჭოთა სივრცეში ყველაზე თანამედროვე და მდიდარი საჰაერო თავდაცვისა და რაკეტსაწინააღმდეგო სისტემა აქვს. იგი დაფუძნებულია თავად რუსეთში შეძენილი უახლესი S-300PMU2 “ფავორიტის” ორ დივიზიაზე, დიდი რაოდენობით Бук-МБ, Тор-M2Э, ასევე ისრაელის SPYDERSR (სახელგანთქმული “რკინის გუმბათი”) და Barak-8.

აზერბაიჯანის საჰაერო და სარაკეტო თავდაცვამ საიმედოდ დაიცვა ენერგეტიკული ინფრასტრუქტურის ობიექტები 2020 წლის 44-დღიანი ომის დროს.

ასევე, შევახსენებ ინგლისელი მწერლის რობერტ ლუისის ცნობილი სიტყვებსაც: „… იმან, ვინც შუშის სახლში ცხოვრობს, სხვებს ქვები არ უნდა დაუშინოს“.

დელიაგინის პოლიტიკური და სოციალური წონა რუსეთის ფედერაციაში იმდენად მცირეა, რომ მას საკუთარი “მეხუთე წერტილის” უსაფრთხოებაც კი არ შეუძლია, რომ აღარაფერი ვთქვათ, რუსეთის ფედერაციის ენერგეტიკული ინფრასტრუქტურის უსაფრთხოებაზე.

ასე რომ, მას სახელმწიფო ტელეარხის ტელეეკრანიდან უპასუხისმგებლოდ არ უნდა გამოესროლა მუქარა, ჯერჯერობით მეგობარი, აზერბაიჯანის ნავთობის ინფრასტრუქტურის განადგურების შესახებ“, – განაცხადა მუსაბეკოვმა გამოცემა minval.az-თან. აღსანიშნავია, რომ “როსკომნადზორის” გადაწყვეტილებით, რუსეთში ამ საინფორმაციო საიტზე წვდომა დაბლოკილია.

დელიაგინის მისამართით პროტესტი აზერბაიჯანის რუსულმა თემმაც გამოთქვა, პარლამენტის სხვა დეპუტატის მიხაილ ზაბელინის ხელმძღვანელობით.

კრემლის რეაქცია

„დეპუტატ დელიაგინის სიტყვები ბაქოს ნავთობის მრეწველობაზე რუსული შეტევის შესაძლებლობის შესახებ არანაირად არ შეესაბამება მოსკოვის ხაზს“, – განაცხადა რუსეთის პრეზიდენტის პრესმდივანმა დმიტრი პესკოვმა დელიაგინის მუქარის კომენტირებისას.

პესკოვმა დელიაგინს მოუწოდა, გააკონტროლოს ემოციები და თავი შეიკავოს აზერბაიჯანის მიმართ არამეგობრული განცხადებებისგან.

”ამ განცხადებებში პირადი ემოციები სჭარბობს. ჩვენ ემოციების გაკონტროლებისა და მსგავსი განცხადებებიდან თავის შეკავებისკენ მოვუწოდებთ, მითუმეტეს, ჩვენს პარტნიორებთან მიმართებაში. აზერბაიჯანი პარტნიორი სახელმწიფოების კატეგორიას მიეკუთვნება“, – განაცხადა კრემლის პრესმდივანმა.

„… ჩვენ მიგვაჩნია, რომ ნებისმიერი მსგავსი განცხადება აბსოლუტურად დაუშვებელი და უპასუხისმგებლოა. ისინი არანაირად არ ასახავს ჩვენი ქვეყნის, რუსეთის ხელმძღვანელობის ოფიციალურ პოზიციას, რომელიც მიზნად ისახავს ბაქოსთან მოკავშირული ურთიერთობისა და სტრატეგიული პარტნიორობის ჩამოყალიბებას. დარწმუნებული ვარ, რომ სახელმწიფო სათათბიროს ხელმძღვანელობა სათანადო შეფასებას მისცემს მსგავს პროვოკაციულ განცხადებებს“, – განაცხადა რუსეთის საგარეო საქმეთა სამინისტროს პრესსპიკერმა მარია ზახაროვამ.

დელიაგინმა ბოდიში მოიხადა

კრემლის მკაცრი რეაქციის შემდეგ მიხეილ დელიაგინმა აზერბაიჯანელებს ბოდიში მოუხადა. ფეისბუქის საკუთარ გვერდზე მან დაწერა:

„რუსეთის ფედერაციის პრეზიდენტის პრესმდივანი, უმაღლესი მეთაური დიმიტრი პესკოვი აბსოლუტურად მართალია რეკომენდაციაში, რომ ემოციები ზომიერი იყოს და რუსეთ-აზერბაიჯანის ურთიერთობები არ დააზიანოს. მე სრულად შევასრულებ ამ რეკომენდაციებს.

ჩემი განცხადება და Telegram-ზე ჩატარებული გამოკითხვა ეხებოდა არა აზერბაიჯანელ ხალხს და მთლიანად სახელმწიფოს, არამედ მხოლოდ აზერბაიჯანული ბიუროკრატიის გარკვეულ ნაწილს, რომელმაც, შესაძლოა, ჩათვალა, რომ იმ სიტუაციაში, როდესაც რუსული ძალები სამხედრო სპეცოპერაციაზეა, მისი სამშვიდობოების უგულებელყოფა შეიძლება.

ეს გადაწყვეტილება, ჩემი აზრით, იმაში გამოიხატებოდა, რომ მას შემდეგ, რაც აზერბაიჯანის ჯარებმა რუსი სამშვიდობოების პასუხისმგებლობის ზონაში მდებარე დასახლებული პუნქტი დაიკავეს, ჩვენმა თავდაცვის სამინისტრომ განაცხადა, რომ სამშვიდობოებთან სიტუაციის განხილვის შემდეგ, აზერბაიჯანის ჯარებმა უკან დაიხიეს, აზერბაიჯანის თავდაცვის სამინისტრომ კი ძალიან თავაზიანად განმარტა, რომ აზერბაიჯანის ჯარები არსად წასულან.

რა თქმა უნდა, იმისათვის, რომ მოესმინათ, გაზვიადება მომიხდა და გულწრფელ ბოდიშს ვუხდი ყველას (არა მხოლოდ აზერბაიჯანელებს), ვინც შეშინებულად, დამცირებულად და განაწყენებულად იგრძნო თავი. ან, რაიმე სხვა ტიპის უარყოფითი ემოცია მიიღო. (რა თქმა უნდა, ეს არ ეხება მათ, ვისაც ჩემი სიტყვები არ ესმის იმის გამო, რომ რუსულად მხოლოდ უხამს გინებას ფლობს)”.

რუსი დეპუტატის მუქარა აზერბაიჯანს