რუსეთში, აფხაზეთის მკვიდრს, ბავშვების დახმარების უკანონოდ მიღებისთვის ორი წლით თავისუფლების აღკვეთა მიუსაჯეს
უკანონო რუსული შეღავათები აფხაზეთში
რუსეთში, აფხაზეთის მკვიდრს, ბავშვების დახმარების უკანონოდ მიღებისთვის ორი წლით თავისუფლების აღკვეთა მიუსაჯეს. მსგავსი საფრთხე კიდევ რამდენიმე ასეულ აფხაზ ქალს ემუქრება.
აგვისტოს შუა რიცხვებში რუსეთის სასამართლომ აფხაზეთის მოქალაქეს ორი წლით თავისუფლების აღკვეთა შეუფარდა და საერთო რეჟიმის კოლონიაში გაამწესა. მას ბრალად დასდეს დიდი ოდენობით თაღლითობა — კერძოდ ის, რომ რუსეთის მოქალაქეობის არსებობის საფუძველზე შვილებზე სოციალურ დახმარებას იღებდა, მიუხედავად იმისა, რომ ოჯახი აფხაზეთში ცხოვრობდა. ქალი ხუთი შვილის დედაა.
გადაწყვეტილება მიიღეს მიუხედავად იმისა, რომ სოციალურ დახმარებაზე განაცხადის პროცედურის დროს მან ოფიციალური შემოწმებები გაიარა და დარწმუნებული იყო, რომ კანონმდებლობას არ არღვევდა და დახმარების მიღების უფლება ჰქონდა.
დოკუმენტების წარდგენისას მან მიუთითა, რომ აფხაზეთში მუშაობდა, შვილები კი იქვე სკოლაში დადიოდნენ და მუდმივადაც იქ ცხოვრობდნენ. ეს ინფორმაცია რუს ოფიციალურ უწყებებს მაშინ კითხვებს არ უჩენდა, თუმცა კანონით დახმარების მიღების უფლება მხოლოდ იმ ოჯახებს აქვთ, რომლებიც წელიწადში არანაკლებ 180 დღე ცხოვრობენ რუსეთში და რომელთა შვილებიც რუსეთის სკოლებში ან საბავშვო ბაღებში დადიან.
ქალი რვა წლის განმავლობაში — 2016-დან 2024 წლამდე — იღებდა დახმარებას. რამდენიმე თვის წინ, როცა ის სოჭიდან სახლში ბრუნდებოდა, რუსეთის საზღვარზე დააკავეს და თაღლითობაში დასდეს ბრალი. გამოძიებამ მოითხოვა მიღებული თანხის სრულად დაბრუნება და მსხვილი ჯარიმის გადახდა, თუმცა ამის რესურსი ქალს არ ჰქონდა, რის შემდეგაც საქმე საპატიმრო სასჯელით დასრულდა.
აფხაზი მრავალშვილიანი დედების დაკავებები, რომლებიც ბავშვებზე რუსეთიდან სოციალურ დახმარებებს იღებდნენ, 2024 წელს დაიწყო — ცოტა ხნით ადრე აფხაზეთში საპრეზიდენტო არჩევნების ჩატარებამდე. ოფიციალური მონაცემები იმის შესახებ, რამდენმა აფხაზმა ქალმა მიიღო ასეთი დახმარება უკანონოდ, ხელმისაწვდომი არ არის, რადგან რუსული მხარე შესაბამის სტატისტიკას არ ასაჯაროებს.
ზოგიერთ ქალს დღემდე არც კი უეჭვია, რომ რუსეთის სამართალდამცველებს მათ მიმართ პრეტენზიები გააჩნიათ. როგორც წესი, ამის შესახებ მხოლოდ საზღვრის გადაკვეთისას ხდება ცნობილი.
2025 წლის მარტის არჩევნების შემდეგ შეშფოთებულმა მრავალშვილიანმა დედებმა ახალარჩეულ ე.წ. პრეზიდენტ ბადრა გუნბას მიმართეს. შეიქმნა უწყებათაშორისი კომისია პრობლემის გადასაჭრელად და ამოქმედდა “ცხელი ხაზი“ იურიდიული დახმარებისთვის.
ამ საკითხს რუსეთის საგარეო საქმეთა მინისტრ სერგეი ლავროვთან შეხვედრაზეც შეეხო აფხაზეთის საგარეო უწყების ხელმძღვანელი, ოლეგ ბარციცი.
თუმცა, ჯერჯერობით მოლაპარაკებებს შედეგი არ გამოუღია და ვითარება კიდევ უფრო დამძიმდა.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
