აფხაზეთს, ცხინვალს, დნესტრისპირეთს და დონბასს რუსეთის მიერ ანექსიისთვის ამზადებენ?
რუსეთში გაისმა საჯარო მოწოდებები აფხაზეთის, სამხრეთ ოსეთის, დნესტრისპირეთის და დონბასის შემოერთების თაობაზე. სოხუმის რეაქცია მკვეთრად უარყოფითია – იქ განაცხადეს, რომ რუსეთთან შეერთება არ განიხილება. საქართველოში კი არ გამორიცხავენ, რომ ეს განცხადებები აფხაზეთის ახალ ხელისუფლებაზე ზეწოლის პოლიტიკის ნაწილია.
მწერალი ზახარ პრილეპინი, რომელიც ახლახანს ჩამოყალიბებული პარტია „სიმართლისთვის“ ლიდერია, არაღიარებული ან ნაწილობრივ აღიარებული რესპუბლიკების შემოერთების გზით რუსეთის ტერიტორიის გაფართოების იდეით გამოვიდა.
- შესაძლებელია თუ არა რუსეთის მხრიდან ბელარუსის ანექსირება?
- აფხაზეთი: ბინები როგორც „ომის ნადავლი“ – დაუბრუნებენ თუ არა მათ მფლობელებს?
იგი ასევე გამოვიდა წინადადებით რუსეთის კონსტიტუციაში ჩაიწეროს, რომ ქვეყანას უფლება აქვს ნებისმიერი ტერიტორია შემოიერთოს, რომლის მოსახლეობის არანაკლებ 75 პროცენტი რუსეთთან შეერთებას დაუჭერს მხარს.
იმავდროულად, განცხადება აღმოსავლეთ უკრაინის არაღიარებული დონეცკის და ლუგანსკის “სახალხო რესპუბლიკების” რუსეთთან შესაძლო შეერთების შესახებ, “დონეცკის რესპუბლიკის” ყოფილმა “პრემიერმა” ალექსანდრ ბოროდაიმ გააკეთა.
ვინ არიან პრილეპინი და ბოროდაი?
ზახარ პრილეპინი ევგენი პრილეპინის ლიტერატურული ფსევდონიმია.
მან ლიტერატურული საქმიანობა 2000-იანი წლების დასაწყისიდან დაიწყო.
მანამდე სწავლობდა პოლიციის უმაღლეს სკოლაში. როგორც სპეცრაზმის მებრძოლმა, მონაწილეობა მიიღო ჩეჩნეთის მეორე ომში.
2019 წელს იგი დონბასში მოხალისედ გაემგზავრა და საჯაროდ განაცხადა, რომ მონაწილეობდა უკრაინელი სამხედროების მკვლელობებში.
2020 წელს პარტია “სიმართლისთვის” ჩამოაყალიბა, რომელმაც განაცხადა, რომ აპირებს მონაწილეობა მიიღოს მიმდინარე წელს რეგიონალურ არჩევნებში და 2024 წლის საპარლამენტო არჩევნებში.
ამ პარტიის პროგრამა ითვალისწინებს რეფერენდუმის ჩატარებას აფხაზეთის, სამხრეთ ოსეთის, დნესტრისპირეთის და დონბასის რუსეთთან შეერთების თაობაზე.
პრილეპინის გარდა, მის საარჩევნო სიაში არიან რუსული შოუბიზნესის ცნობილი სახეები, რომლებიც ექსტრავაგანტული ქცევით გამოირჩევიან.
ალექსანდრ ბროდაი რუსი ბიზნესმენი და ჟურნალისტია.
1992 წელს, ჯერ კიდევ სტუდენტობის დროს, მონაწილეობას იღებდა დნესტრისპირეთის ომში ადგილობრივი სეპარატისტების მხარეზე.
შემდგომში, იგი ულტრაკონსერვატული მედიის – გაზეთ “ზავტრას” და “ცარგრადის” ტელევიზიის ერთ-ერთი მუდმივი ავტორი გახდა.
გარკვეული პერიოდი იყო არაღიარებული “დონეცკის სახალხო რესპუბლიკის” პრემიერ-მინისტრი.
რას ნიშნავს განცხადებები შეერთების შესახებ?
რუსულ სოციალურ ქსელებში პრილეპინისა და ბოროდაის განცხადებებზე ორი მოსაზრებაა გავრცელებული.
პირველი – ეს შეიძლება იყოს საზოგადოების ყურადღების გადატანის მცდელობა ყველაზე აქტუალური თემიდან – რუსეთის კონსტიტუციაში ახლახან მიღებული ცვლილებებიდან. რომლებიც ვლადიმირ პუტინს საშუალებას აძლევს დარჩეს ხელისუფლებაში 2036 წლამდე.
და მეორე მოსაზრება – ეს შეიძლება იყოს ნამდვილი მზადება დნესტრისპირეთის, აფხაზეთის, სამხრეთ ოსეთისა და დონბასის ანექსიისთვის. მიზანი ვლადიმერ პუტინის დავარდნილი რეიტინგის ამაღლებაა.
თავად რუსეთის პრეზიდენტმა ცოტა ხნის წინ განაცხადა, რომ საბჭოთა კავშირის დაშლა უსამართლო იყო. მისი თქმით, რესპუბლიკები “ისე წავიდნენ, რომ რუსი ხალხისგან ტერიტორიული საჩუქრები გაიყოლეს”, რომლებიც რუსეთს უნდა დაუბრუნდეს.
რეაქცია აფხაზეთში
აფხაზური პარლამენტი ამ განცხადებებს გამოეხმაურა და მათ ავტორებს შეახსენა, რომ “აფხაზეთის სახელმწიფო წყობა” განისაზღვრება მისი კონსტიტუციით, ხოლო რუსეთთან ურთიერთობები – ხელშეკრულებებითა და შეთანხმებებით.
”ასეთი ინიციატივები უკიდურესად ნეგატიურად აღიქმება აფხაზეთის ხალხის მიერ და ხელს არ უწყობს ჩვენს ქვეყნებს შორის კეთილმეზობლური და მეგობრული ურთიერთობების განმტკიცებას”, – აცხადებენ აფხაზი დეპუტატები.
მოსაზრება საქართველოდან
”მთავარი კითხვაა – ასეთი განცხადებები კერძო ინიციატივაა თუ კრემლიდან მოდის?”, – მიიჩნევს GIPA-ს პროფესორი თორნიკე შარაშენიძე.
თუ ასეთი ინიციატივები წახალისებულია რუსეთის ხელისუფლების მიერ, შარაშენიძე არ გამორიცხავს, რომ ეს შეიძლება იყოს აფხაზეთის ხელისუფლებაზე, განსაკუთრებით კი ახალ პრეზიდენტ ასლან ბჟანიაზე ზეწოლის პოლიტიკის ნაწილი მოსკოვის მხრიდან.
” შეიძლება იქ რაღაც ხდება და ჩვენ არ ვიცით”, – ამბობს შარაშენიძე.
ის ფაქტი, რომ ეს განცხადება მოჰყვა პუტინის ცნობილ განცხადებას ყოფილი საბჭოთა რესპუბლიკების საზღვრების შესახებ, შარაშენიძის თქმით, შეიძლება შემთხვევითი არ იყოს:
”ალბათ , ეს დამთხვევა არაა. ჩემი აზრით რუსეთი არ გაჩერდება და ზეწოლას გააგრძელებს – პირველ რიგში ბელარუსზე, ასევე აფხაზებზე, რომელბიც დიდი ხანია “ეჯიუტებიან”.
