როსტოვში აფხაზური დიასპორის ლიდერი „ანტირუსული განცხადებებისთვის“ დააკავეს
როსტოვში აფხაზური დიასპორის ლიდერი დააკავეს
დონის როსტოვში მცხოვრები აფხაზური დიასპორის ერთ-ერთი ლიდერი, ირაკლი ბჟინავა, რუსეთის სამართალდამცავებმა „ანტირუსული განცხადებებისა და ეთნიკური სიძულვილის გაღვივების“ ბრალდებით დააკავეს.
ბჟინავა, სამართლის დოქტორანტი და კონსტიტუციური სამართლის სპეციალისტი, მუშაობდა დონის როსტოვში მდებარე სამხრეთ ფედერალურ უნივერსიტეტში ლექტორად. მისი დაკავება 2026 წლის 4 თებერვალს მოხდა. სასამართლომ მას ორთვიანი წინასწარი პატიმრობა შეუფარდა.
მისი საქმე განსაკუთრებით საყურადღებოა არა მხოლოდ ბრალდებების შინაარსის, არამედ დაკავების პირობების გამო. ბჟინავა მოთავსებულია წინასწარი დაკავების იზოლატორში, რომელიც, გავრცელებული ცნობებით, გამოიყენება ომის დანაშაულებში ბრალდებულთა დასაკავებლად და წარსულში არაერთხელ გამხდარა კრიტიკის ობიექტი ადამიანის უფლებების დარღვევების გამო.
სოციალურ მედიაში გავრცელებული ინფორმაციით, ამ დაწესებულებაში ჩვენებები ხშირად ძალადობრივი მეთოდებით მიიღება, თუმცა ამ ბრალდებების დამოუკიდებელი დადასტურება რთულია.
საჯარო დისკუსიაში ბჟინავას დაკავება უკავშირდება მის კრიტიკულ პოზიციას აფხაზეთში რუსული შიდა პასპორტების გაცემის საკითხზე. თემას, რომელიც თავად აფხაზურ საზოგადოებაშიც დაპირისპირებისა და უთანხმოების წყაროა.
აფხაზეთის დე ფაქტო ხელისუფლება აცხადებს, რომ პროცესს ყურადღებით აკვირდება. აფხაზეთის ე.წ. პრეზიდენტმა, ბადრა გუნბამ აღნიშნა, რომ საქმე „განხილვის ქვეშ“ რჩება და მას პირადად აკონტროლებს. მისი თქმით, შესაბამისი უწყებები უკვე მუშაობენ რუსეთის სპეციალურ სამსახურებთან.
აფხაზეთის ე.წ. საგარეო საქმეთა სამინისტროს ინფორმაციით, ბჟინავას უზრუნველყოფილი აქვს იურიდიული დახმარება. ასევე აღნიშნულია, რომ დონის როსტოვში აფხაზეთის საპატიო კონსული კონტაქტშია მისი ოჯახის წევრებთან და მოქმედებს საკუთარი მანდატის ფარგლებში.
გუნბამ დამატებით აღნიშნა, რომ ბჟინავას, აფხაზეთის მოქალაქეობის გარდა, რუსეთის მოქალაქეობაც აქვს და ბოლო წლებში მუდმივად ცხოვრობდა რუსეთის ფედერაციაში.
ეს საქმე იზოლირებული შემთხვევა არ არის. ბჟინავა უკვე მეორე აფხაზი მოქალაქეა, რომელსაც რუსეთში „ექსტრემიზმის“ კანონმდებლობით ედება ბრალი. ცოტა ხნის წინ, დონის როსტოვში სამხედრო სასამართლომ აფხაზი ბლოგერი, ტიმურ აგრბა, ხუთნახევარი წლით პატიმრობაში გაამწესა. მას ბრალად ედებოდა ჩეჩენი საველე მეთაურის, შამილ ბასაევის „გმირული იმიჯის“ შექმნა. ეს ბრალდება, რომელიც რუსეთის კანონმდებლობით ექსტრემიზმის პროპაგანდად განიხილება.
