როგორი იყო ტოკიოს ოლიმპიადა სამხრეთ კავკასიის სამი ქვეყნისთვის. შეჯამება
ისტორიაში ყველაზე უცნაური ოლიმპიადა უკვე წარსულია. ტოკიოს ოლიმპიური თამაშები ერთი წლის დაგვიანებით, მაყურებლის გარეშე ჩატარდა. 206 ქვეყნის 11 ათასზე მეტი სპორტსმენს შორის ქართველმა, აზერბაიჯანელმა და სომეხმა სპორტსმენებმაც იასპარეზეს.
საქართველოსთვის ეს იყო უპრეცედენტო წარმატება, აზერბაიჯანისთვის – ყველაზე ცუდი 25 წლის განმავლობაში, სომხეთისთვის – იმავე 25 წლის განმავლობაში მესამე საუკეთესო.
როგორი იყო მათთვის ტოკიოს ოლიმპიადა. JAMnews-ის მოკლე შეჯამება:
საქართველო – უპრეცედენტო წარმატება
სამხრეთ კავკასიის სამ ქვეყანას შორის ყველაზე კარგი შედეგი საქართველომ აჩვენა.
მეტიც, ტოკიოს ოლიმპიადა ამ ქვეყნისთვის უპრეცედენტოდ უხვმედლიანი აღმოჩნდა. საქართველოს აქამდე არასოდეს მოუპოვებია ერთ ოლიმპიადაზე რვა მედალი: ორი – ოქრო, ხუთი – ვერცხლი და ერთი – ბრინჯაო. ეს დამოუკიდებელი საქართველოს ისტორიაში, ოლიმპიადაზე ნაჩვენები საუკეთესო შედეგია, მედლების რაოდენობის მხრივ.
ყველაზე მასშტაბურ სპორტულ ღონისძიებაში 33-მა ქართველმა სპორტსმენმა მიიღო მონაწილეობა. ისინი 11 სხვადასხვა სახეობაში ასპარეზობდნენ.
ოლიმპიური ჩემპიონები და ოქროს მედალოსნები გახდნენ ძიუდოისტი ლაშა ბექაური და ძალოსანი ლაშა ტალახაძე.
საერთო ჩათვლაში საქართველოს დელეგაციამ 33-ე ადგილი დაიკავა, ხოლო ევროპის მასშტაბით ყველაზე წარმატებული 20 ქვეყანას შორის მოხვდა.
საქართველომ გადაასწრო ბევრ ისეთ ქვეყანას, რომლებიც სპორტში გაცილებით მეტ ფულსა და სხვა რესურსს ხარჯავენ. მაგალითად, საქართველოს ჩამორჩნენ თურქეთი, საბერძნეთი, ავსტრია, არგენტინა, პორტუგალია.
რაც შეეხება პოსტსაბჭოთა ქვეყნებს, აქ საქართველო მესამე ადგილზე გავიდა, რაც ასევე ისტორიული შედეგია. საქართველომ ისეთ სპორტულ გრანდებს გადაუსწრო, როგორიც უკრაინა და ბელორუსია.
ოლიმპიური ჩემპიონები ლაშა ბექაური და ლაშა ტალახაძე სახელმწიფოსგან მილიონ ლარს მიიღებენ.
90 კილოგრამ წონით კატეგორიაში მოჭიდავე ახალგაზრდა ქართველმა სპორტსმენმა, 21 წლის ლაშა ბექაურმა თქვა, რომ ამ თანხის ნაწილს ემიგრაციაში მყოფი ბებიისა და დეიდის საქართველოში დასაბრუნებლად დახარჯავს.
ბევრად უფრო გამოცდილი სპორტსმენია მეორე ოქროსმედალოსანი ლაშა ტალახაძე.
ტალახაძე პირველი სპორტსმენია, რომელიც დამოუკიდებელი საქართველოს სახელით ორჯერ გახდა ოლიმპიური ჩემპიონი.
მსოფლიოს ოთხგზის და ევროპის ხუთგზის ჩემპიონმა ტალახაძემ პირველი ოლიმპიური ოქრო 2016 წელს რიო დე ჟანეიროდან ჩამოიტანა.
ლაშა ტალახაძე მძიმეწონოსანია და +109 კილოგრამ წონით კატეგორიაში ასპარეზობს. მან ორჭიდის ჯამში 488 კილოგრამი აწია. ამ ოლიმპიადაზე ტალახაძემ გააუმჯობესა მსოფლიოს რეკორდი, რომელიც მანამდე თავადვე ჰქონდა დამყარებული.
წესით, ახლა საქართველოს კიდევ ერთი, მეცხრე მედალიც უნდა ჰქონდეს. ტოკიოს ოლიმპიურ თამაშებზე სერბეთის სახელით ბრინჯაოს მედალი მოიპოვა 30 წლის ქართველმა მოჭიდავემ ზურაბ დათუნაშვილმა (87 კგ).
დათუნაშვილმა საქართველო და საქართველოს ეროვნული ნაკრები 2019 წელს დატოვა, საქართველოს ჭიდაობის ფედერაციის პრეზიდენტ გეგა გეგეშიძესთან მომხდარი ინციდენტის შემდეგ გადაწყვიტა. გეგეშიძემ მომავალ ოლიმპიელს ფიზიკური შეურაცხყოფა მიაყენა და თქვა, რომ ნაკრებში არ სჭირდებოდა, რადგან სუსტი იყო.
დაბოლოს, ტოკიოს ოლიმპიადაზე ქართული დელეგაციიდან ერთ-ერთი ყველაზე დასამახსოვრებელი კადრი საქართველოს ნაკრების მთავარი ექიმის, ზურაბ კახაბრიშვილის გულწრფელი ემოციები იყო:
აზერბაიჯანი – ყველაზე ცუდი შედეგი ბოლო 25 წლის განმავლობაში
ტოკიოს ოლიმპიურ თამაშებზე აზერბაიჯანის ნაკრები 44 სპორტსმენით იყო წარმოდგენილი და 1996 წლის ოლიმპიადის შემდეგ ყველაზე ცუდი შედეგი აჩვენა.
აზერბაიჯანის ნაკრებმა შეძლო 3 ვერცხლისა და 4 ბრინჯაოს მედლის მოპოვება. აზერბაიჯანს არც ერთი ოქროს მედალი არ აქვს. ასეთი რამ მხოლოდ აზერბაიჯანის ოლიმპიური დებიუტის დროს 1996 წელს ატლანტაში მოხდა და ახლა მეოთხედი საუკუნის შემდეგ ტოკიოში განმეორდა.
ტოკიოს ოლიმპიადის შვიდი პრიზიორიდან მხოლოდ სამია აზერბაიჯანის მკვიდრი, დანარჩენები უცხოელები არიან, რომლებიც აზერბაიჯანის სახელით გამოვიდნენ.
ვერცხლი მოიპოვეს კარატისტმა ირინა ზარეცკამ (წარმოშობით უკრაინიდან), ასევე კარატისტმა რაფაელ აგაიევმა და მოჭიდავე გაჯი ალიევმა.
“ბრინჯაოები” ერგოთ მოკრივე ალფონსო დომინგესს (წარმოშობით კუბადან), ძიუდოისტ ირინა კინძერსკაიას (წარმოშობით უკრაინიდან) და მოჭიდავეებს მარია სტადნიკს (წარმოშობით ბელორუსიდან) და რაფიკ ჰუსეინოვს.
ოლიმპიადაზე ძიუდოს პროგრამის დასრულებისთანავე, აზერბაიჯანის ძიუდოს ფედერაციამ გამოაცხადა, რომ სპორტსმენების ხელფასების შემცირება და სამწვრთნელო შტაბი შეიცვლება.
ტრადიციულად, ძიუდო ერთ -ერთი ყველაზე წარმატებული დისციპლინაა აზერბაიჯანისთვის. აზერბაიჯანელი სპორტსმენები სწორედ ძიუდოთი ავსებენ ხოლმე ოლიმპიადებზე მედლების “ყულაბას”.
სკანდალური აღმოჩნდა ასევე ვერცხლის მედალოსნის, კარატის რაფაელ აგაევის აღიარება, რომ მას მეტოქესთან “მოლაპარაკება” ჰქონდა.
მას შემდეგ, რაც აგაევმა ფინალში იტალიელ ლუიჯი ბუზასთღან წააგო, მან აზერბაიჯანის ეროვნულ ოლიმპიურ კომიტეტთან ინტერვიუში აღიარა, რომ “შეთანხმება დაიდო იტალიელ სპორტსმენთან შეჯიბრის დაწყებამდე”.
სომხეთი – მესამე საუკეთესო შედეგი 25 წლის განმავლობაში
სომეხი სპორტსმენები ტოკიოს ოლიმპიური თამაშებიდან ოთხი მედლით დაბრუნდნენ – ორი ვერცხლით და ორი ბრინჯაოთი.
მედლების საერთო რეიტინგში ამან სომხეთს 69 -ე ადგილი მისცა.
17 სპორტსმენისგან შემდგა დელეგაციაში მოჭიდავეთა წარმომადგენლობითი ჯგუფი იყო: ორი თავისუფალი სტილით და ოთხი ბერძნულ-რომაულით.
ბერძნულ-რომაულ მოჭიდავეთა შორის ერთადერთი ვერცხლის მედალი არტურ ალექსანიანმა მოიპოვა. ფინალურ მატჩში მან წააგო რუსეთის ოლიმპიური კომიტეტის წარმომადგენელ მუსა ევლოევთან.
არტურ ალექსანიანზე დიდ იმედებს ამყარებდნენ, რადგან ის არის 2016 წლის რიოს ოლიმპიადის ოქროს მედალოსანი და ლონდონის 2012 წლის თამაშების ბრინჯაოს მედალოსანი.
სომხეთის ბერძნულ-რომაული ჭიდაობის ნაკრების სამწვრთნელო შტაბმა ოლიმპიური მსაჯები უსამართლო მსაჯობაში დაადანაშაულა.
დასკვნით პრესკონფერენციაზე გევორგ ალექსანიანმა, გუნდის ერთ-ერთმა მწვრთნელმა და არტურ ალექსანიანის მამამ, განაცხადა, რომ ის აპირებს საერთაშორისო კლასის მოსამართლის წოდებაზე უარის თქმას.
იმავე პრესკონფერენციაზე ითქვა, რომ სომხეთი აპირებს საჩივარი შეიტანოს საერთაშორისო სასამართლოში უსამართლო მსაჯობის ფაქტებთან დაკავშირებით, რომელთა გამოც სომხეთის ნაკრებმა “სულ მცირე სამი მედალი დაკარგა”.
ბრინჯაოს მედლები, რომლებიც სომეხმა სპორტსმენებმა ტოკიოში მოიპოვეს, ძალიან მნიშვნელოვანი აღმოჩნდა სომხური სპორტისთვის.
ხანგრძლივი პაუზის შემდეგ, სომხეთმა შეძლო ოლიმპიური მედლის პომოვება კრივში. ბრინჯაო გადაეცა ევროპისა და ევროპის თამაშების ორგზის ჩემპიონს ოვანეს ბაჩკოვს.
ეს არის მეორე ოლიმპიური მედალი სპორტის ამ სახეობაში პოსტსაბჭოთა სომხეთისთვის.
მიუხედავად იმ სავალალო პირობებისა, რომელშიც სომეხი სპორტსმენები ვარჯიშობენ, მხატვრული ტანვარჯიში, ტრადიციულად, სომხეთისთვის სპორტის ძლიერ სახეობად ითვლება. ამ თამაშებზე ტანმოვარჯიშე არტურ დავტიანმა მოიპოვა ბრინჯაო.
ეს არის პირველი ოლიმპიური მედალი სომეხი ტანმოვარჯიშეებისთვის 1980 წლის მოსკოვის თამაშების შემდეგ.
ჯამში ტოკიოს ოლიმპიური თამაშები, შედეგების მიხედვით, მესამე საუკეთესო შედეგია პოსტსაბჭოთა სომხეთის სპორტისთვის.
ტოკიოზე უკეთ სომეხ სპორტსმენებს საქმეები მხოლოდ 1996 წელს, ატლანტაში წაუვიდათ, როდესაც მოჭიდავე არმენ ნაზარიანმა ოქროს მედალი მოიპოვა. და ასევე 2016 წელს რიო -დე -ჟანეიროში, როდესაც მოჭიდავე არტურ ალექსანიანი გახდა პირველი.
