როგორ ხსნის გურამ იმნაძე მოსამართლეთა დასანქცირების ფაქტს
“სოციალური სამართლიანობის ცენტრის” იურისტი გურამ იმნაძე ამერიკის შეერთებული შტატების ხელისუფლების მიერ ქართველი მოსამართლეების დასანქცირებაზე ვრცელ პოსტს აქვეყნებს, სადაც დეტალურად ხსნის ამ გადაწყვეტილების პოლიტიკურ და სამართლებრივ ასპექტებს.
გურამ იმნაძე:
“მოსამართლეთა დასანქცირებას აქვს სამართლებრივი და პოლიტიკური მხარე.
სამართლებრივ ნაწილზე საელჩო და სახელმწიფო დეპარტამენტი გასაგებად მიუთითებენ, რომ მათ საკმარისი მტკიცებულებები აქვთ იმის დასასაბუთებლად, რომ ეს ადამიანები ჩართულნი იყვნენ კორუფციულ საქმიანობაში და ამიტომ, მათ უნდა შეეზღუდოთ შტატებში შესვლის უფლება. სამართლებრივად თუკი ქართულ მხარეს სურს მეტის გარკვევა, აქამდეც ჰქონდათ ძალიან დიდი დრო ამისთვის და ახლაც შეუძლიათ, რომ ან გამოძიება დაიწყონ, ან პარლამენტში შექმნან ამისთვის სპეციალური მექანიზმი და შეისწავლონ, არსებობს თუ არა კორუფციადა არაფორმალური გავლენები სასამართლო სისტემაში.
სანქციების პოლიტიკურ მხარეს რაც შეეხება, აქ რამდენიმე რამე უნდა გამოიყოს: შეერთებულ შტატებს ძალიან დიდი ფინანსური, ადამიანური და ექსპერტული მხარდაჭერა აქვს გაწეული ქართული მართლმსაჯულების განვითარებისთვის და ბუნებრივია, რომ ისინი გრძნობენ პასუხისმგებლობას დღევანდელ სასამართლოზე.
სანქციებით ისიც დასტურდება, რომ ეს აღარაა რამდენიმე მოსამართლის პრობლემა და რომ ამით მთლიანად ქვეყნის დემოკრატიულ განვითარებას და პოლიტიკურ სტაბილურობას ადგება გამოუსწორებელი ზიანი. ბოლო წლებში თუკი საერთაშორისო დონეზე მორიდებით საუბრობდნენ არაფორმალურ გავლენებზე, მოსამართლეთა კლანზე და სისტემაში კორუფციაზე, დღეიდან ეს “ჩუმად” საუბარი ბევრად ხმაურიანი გახდება.
სანქციებს ასევე შეიძლება ჰქონდეს პირდაპირი ეფექტი თვითონ სასამართლოს სისტემის შიგნით. პირველ რიგში, ეს არის ნიშანი იმ კეთილსინდისიერი მოსამართლეებისთვის, ვინც დღემდე (ასევე მორიდებით, მაგრამ მაინც) აგრძელებს მუშაობას სისტემაში, რომ არანაირი ძალაუფლება და გავლენა არაა მარადიული და ადრე თუ გვიან, ნებისმიერი უსამართლობა დამთავრდება. ეს ასევე არის იმ მოსამართლეების გამბედაობის დაფასება, ვინც ხმამაღლა, საკუთარი სიცოცხლის თუ პირადი ინტერესების რისკის ფასად გაბედა სისტემაში არსებულ დანაშაულებრივ გარემოზე საუბარი.
და ბოლოს – სანქციებით ჯერ სამართლიანობა არ დამდგარა. ჯერ მხოლოდ სამართლიანობის სიმბოლურ მხარეზე შეიძლება საუბარი, ისიც ნაწილობრივ. სამართლიანობაზე მხოლოდ მაშინ შევძლებთ საუბარს, როცა ქართული სასამართლო ამ კასტისგან სრულად გათავისუფლდება (სხვათა შორის, კლანის ერთ-ერთმა წევრმა პარლამენტის სამუშაო ჯგუფში ეგეც გვითხრა, თუკი ჩემს ყოფნა-არყოფნაზე გადის სასამართლოს ბედი, მე მზად ვარ მანტია დავთმოო).
აი “ქართული ოცნებისთვის” კი მართლაც სიმბოლურია, მზად რომ არიან ზედ გადაეფარონ და ბოლომდე ჩაყვნენ ჭაობში ჩინჩალაძეს, მურუსიძეს, ცერცვაძეს და შენგელიას. ეს ყოფილა “კოლექტიური ზარდიაშვილის” ბედი.” – წერს გურამ იმნაძე.
გუშინ, 5 მარტს, ამერიკის სახელმწიფო დეპარტამენტმა “მნიშვნელოვანი კორუფციული საქმიანობის გამო” მოსამართლეებს მიხელ ჩინჩალაძეს, ლევან მურუსიძეს, ირაკლი შენგელიას და ვალერიან ცერცვაძეს, ასევე მათი ოჯახის წევრებს, სანქციები დაუწესა და შეერთებულ შტატებში შესვლა აუკრძალა. ამის შესახებ აშშ-ს სახელმწიფო მდივნის, ენტონი ბლინკენის განცხადებაშია ნათქვამი.
ენტონი ბლინკენი აღნიშნავს, რომ მათ, როგორც სასამართლოს თავმჯდომარეებმა და იუსტიციის უმაღლესმა წევრებმა, ბოროტად გამოიყენეს საკუთარი თანამდებობები.
დამოუკიდებელი ექსპერტები და უფლებადამცველები უკვე წლებია აღნიშნავენ, რომ ლევან მურუსიძე და მიხეილ ჩინჩალაძე საქართველოში ხელმძღვანელობენ ე.წ. მოსამართლეთა მძლავრ „კლანს“, რომელიც ბლოკავს საქართველოსა და ევროკავშირს შორის კავშირების გასაძლიერებლად საჭირო რეფორმებს.
ორივე მოსამართლე დაკავშირებულია ძლიერ ორგანოსთან, რომელსაც ჰქვია იუსტიციის უმაღლესი საბჭო, რომელიც ქვეყნის სასამართლო ხელისუფლების მთავარი ზედამხედველობის ორგანოა. ითვლება, რომ მათ ასევე აქვთ ფარული ურთიერთობა ბიძინა ივანიშვილთან, საქართველოს უმდიდრეს ადამიანთან, “ქართული ოცნების” დამფუძნებელთან და ქვეყნის არაფორმალურ მმართველად.
მურუსიძე წინა ხელისუფლების ლოიალობითაც გამოირჩეოდა – სანდრო გირგვლიანის გახმაურებული საქმის მოსამართლე იყო ნაციონალური მოძრაობის დროს. მურუსიძის სახელს სანდრო გირგვლიანის მკვლელობის საქმეში ბრალდებულებისთვის სასჯელის შემსუბუქება უკავშირდება.
სასამართლო სისტემის გაუმჯობესების შესახებ პუნქტი ჩაიწერა შარლ მიშელის 19 აპრილის შეთანხმებაშიც. მოგვიანებით რამდენჯერმე გააკეთა განცხადება აშშ-ის ელჩმაც. თუმცა, ხელისუფლებამ დანიშვნების პროცესი არ შეაჩერა და უზენაეს სასამართლოში უვადო მოსამართლეების დანიშვნა გააგრძელა.
2002 წლის 31 ოქტომბერს, მოსამართლეთა კონფერენციამ იუსტიციის უმაღლესი საბჭოს 2 ახალი მოსამართლე წევრი აირჩია: პაატა სილაგაძე და გიორგი გოგინაშვილი. მიჩნეულია, რომ სილაგაძე და გოგინაშვილი ე.წ მოსამართლეთა კლანის წევრები არიან, ამასთან, ორივე მათგანი განწესებულია თბილისის სააპელაციო სასამართლოს უვადო მოსამართლედ.
