რეპორტიორები საზღვრების გარეშე: ჟურნალისტების მიმართ ჩადენილი ძალადობის შესახებ საერთაშორისო გამოძიებას მოვითხოვთ
რეპორტიორები საზღვრების გარეშე განცხადებას ავრცელებს
საერთაშორისო ორგანიზაცია რეპორტიორები საზღვრების გარეშე (RSF) საქართველოში მიმდინარე მოვლენებთან დაკავშირებით სტატიას აქვეყნებს და საპროტესტო აქციების დროს, მედიის წარმომადგენლების მიმართ განხორციელებულ თავდასხმას გმობს.
როგორც RSF განმარტავს, თავდასხმის ფაქტებს სისტემატური ხასიათი აქვს, რაც შოკისმომგვრელია. ამასთან, მოუწოდებს ევროკავშირს, იმოქმედოს საქართველოს სამართალდამცავი ორგანოების დაუსჯელობის წინააღმდეგ, რაც საფრთხეს უქმნის ქვეყნის დემოკრატიას.
“ქართული ოცნება დემოკრატიისთვისა და მედიისთვის ნამდვილი კოშმარია. პოლიციის სრული დაუსჯელობა და ახალი კანონები სერიოზულ საფრთხეს უქმნის სანდო ინფორმაციის უფლებას. ევროინტეგრაციის საკითხის გარდა, ეს მოვლენები განასახიერებს ყველაზე მნიშვნელოვან ბრძოლას საქართველოს დამოუკიდებლობისთვის რუსული გავლენისგან.
RSF სასწრაფოდ ითხოვს ევროკავშირისგან გადამწყვეტ მოქმედებას და საერთაშორისო გამოძიებას ჟურნალისტების მიმართ ჩადენილი ძალადობის შესახებ, რათა პასუხისმგებელი პირები მართლმსაჯულების წინაშე წარდგნენ”, – თქვა აღმოსავლეთ ევროპისა და ცენტრალური აზიის RSF-ის ოფისის ხელმძღვანელმა, ჟანა კაველიემ.
ორგანიზაცია აცხადებს, რომ საპოლიციო ძალებმა გამოიყენეს ცრემლმდენი გაზი, წყლის ჭავლის მანქანები, ხოლო რამდენიმე ჟურნალისტმა ისეთი სახის დაზიანებები მიიღო, რომ ხანგრძლივი მკურნალობა დასჭირდათ და მათი ნაწილი სამსახურში დაბრუნებას ამ დრომდე ვერ ახერხებს. მათივე თქმით, “ქართული ოცნების” დრაკონული კანონები პრობლემებს უქმნიან ჟურნალისტებსაც, რომლებიც აქციების გაშუქებისას, ცრემლმდენი გაზისგან თავის დაცვის მიზნით სახეს ფარავენ.
RSF-ის ცნობით, 2024 წელს, მსოფლიო პრესის თავისუფლების ინდექსში, საქართველო 180 ქვეყანას შორის 103-ე ადგილზეა.
14 იანვარს გამოქვეყნდა საერთაშორისო ადამიანის უფლებადამცველი ორგანიზაციის, Amnesty International-ის განცხადებაც, რომელშიც ორგანიზაცია მოუწოდებს საქართველოს ხელისუფლებას, დაუყოვნებლივ გაათავისუფლოს ყველა, ვინც საქართველოში გამოხატვის თავისუფლებისა და შეკრების უფლების მშვიდობიანი გამოყენების გამო დააკავეს.
ამასთან, ორგანიზაცია განცხადებაში წერს, რომ გასული წლის 30 დეკემბერს “ქართულმა ოცნებამ “დრაკონული კანონი შემოიღო, რომელიც პოლიციას, მათ შორის, სამართალდარღვევის შესაძლო ჩადენის აღკვეთის მიზნით პრევენციული დაკავების უფლებას აძლევს.
Amnesty International ხაზს უსვამს, რომ ბათუმში დაკავებული აქტივისტები მათე ცენტერაძე და ციალა ქათამიძე, ახლახან მიღებული კანონით დააკავეს, რომელიც საჯარო შენობებზე საპროტესტო სტიკერების გაკვრას კრძალავს.
● 11-12 იანვარს პოლიციის მხრიდან უკანონო დაკავებები ხდებოდა როგორც თბილისში, ასევე ბათუმში. სულ დღის მანძილზე დააკავეს 16 ადამიანი – 7 ბათუმში და 9 თბილისში. მათგან გამოუშვეს მხოლოდ ელენე ხოშტარია და გიორგი კირთაძე, რადგან მათ დეპუტატის სტატუსი აქვთ, დანარჩენები გადაყვანილები არიან დროებით მოთავსების იზოლატორებში.
● 11 იანვარს ბათუმში ადმინისტრაციული წესით 10-ზე მეტი პირი, ხოლო სისხლის სამართლის წესით 1 პირი დააკავეს, ხოლო თბილისში კი ადმინისტრაციული წესით დააკავეს 1 პირი.
● სულ არჩევნების შემდგომ დღემდე სახელმწიფომ ადმინისტრაციული წესით 480-ზე მეტი, ხოლო სისხლის სამართლის წესით – 43 პირი დააკავა.
● “ბათუმელებისა“ და “ნეტგაზეთის“ დამფუძნებელი და დირექტორი, მზია ამაღლობელი 12 იანვარს ბათუმის პოლიციის მთავარ სამმართველოსთან გამართულ ხალხმრავალ აქციაზე დააკავეს.
● პროპაგანდისტული ტელეკომპანია „იმედის“ მიერ გავრცელებულ უხმო კადრებში ჩანს, რომ მზია ამაღლობელი სახეში ხელს არტყამს პოლიციის უფროსს, ირაკლი დგებუაძეს. თავად ჟურნალისტმა სახალხო დამცველის წარმომადგენელს უთხრა, რომ დაკავებამდე სამართალდამცავები ძალიან უჭერდნენ ხელზე, რის გამოც ხელი ძლიერად აიქნია და უნებურად პოლიციელს მოარტყა.
