სად იმშობიარებენ გურჯაანელი ქალები, მარნეული "არემჯის" წინააღმდეგ. რეგიონული ამბების დაიჯესტი
რეგიონული ამბების დაიჯესტი.
“მთები ოქროზე მნიშვნელოვანია” – მარნეული “არემჯის” წინააღმდეგ
მარნეულის მოსახლეობა საქართველოს ყველაზე მსხვილ ოქროსმომპოვებელ კომპანია “არემჯის” უპირისპირდება. კომპანია აპირებს სოფელ მუშევანში ღია კარიერული წესით მოიპოვოს მადანი. ის ტერიტორია, სადაც “არემჯიმ” ბურღვა-აფეთქებები უნდა აწარმოოს, სოფლიდან 800 მეტრშია. ხალხს ეშინია, რომ მათი სახლები დაიბზარება და დაინგრევა, ამიტომ კომპანიას აქციებით უპირისპირდება.
“მთები ოქროზე მნიშვნელოვანია” – ამ ბანერებით შეიკრიბნენ 16 ნოემბერს მუშევანელი ქალები ქუჩაში და “არემჯის” კიდევ ერთხელ უთხრეს, რომ სამუშოების დაწყების უფლებას არ მისცემენ.
ვრცლად: marneulifm.ge
გურჯაანში ერთადერთი სამშობიარო დახურეს
გურჯაანში ერთადერთი სამშობიარო სახლი დაიხურა იმის გამო, რომ სულ უფრო ცოტა მშობიარე მიმართავდა. კლინიკის ხელმძღვანელობა ამბობს, რომ სანაცვლოდ პედიატრიულ განყოფილებას გახსნის, რადგან პედიატრებზე უფროა მოთხოვნა.
როგორც ადგილობრივი გამოცემა „კახეთის ხმა“ წერს, ამიერიდან გურჯაანელ მშობიარეებს სულ მცირე 40-45 კილომეტრის გავლა მოუწევთ მეზობელ თელავში ან ლაგოდეხში სამშობიაროდ.
ვრცლად: Knews.ge
გორში მარტოხელა ქალი წლებია ითხოვს დახმარებას, რომ გადარჩეს
გორის გამოცემა “მოზაიკა ჰყვება, რომ სოფელ რუისში მცხოვრები 50 წლის ქალი წლებია ადგილობრივ ხელისუფლებას მიზერულ დახმარებას სთხოვს გადარჩენისთვის.
“მეუბნებიან, ფართი გაქვსო და ამას ამბობენ ავარიულ სახლზე“, – უყვება ქალი გამოცემას. ქონებაში ირმა ღვინიაშვილს ერთ ავარიულ ოთახს, ძველ გარდეროფს და “კორფუჯის” ტელევიზორს უთვლიან.
ვრცლად: mozaikanews.ge
მერი სუქანაათუბნიდან – როგორ დაიცალა ოსური სოფელი
შიდა ქართლის გამოცემა Qartli.ge ჰყვება ძამას ხეობის სოფელ სუქანაათუბნის ისტორიას, სადაც ერთ დროს, ერთად ცხოვრობდნენ ოსები და ქართველები. გამოცემის ინფორმაციით, ახლა ამ სოფელში სულ 30-მდე ოჯახია დარჩენილი.
ვიდეოში, რომელიც გამოცემამ მოამზადა, მთავარი გმირი მერი ჰყვება, როგორ დაბრუნდა სოფელში ათწლიანი ემიგრაციიდან. ,,ძალიან გამიჭირდა თავიდან, დეპრესია დამემართა. არა ხალხი, არა ბავშვი… არა ჟრიამული”, – ამბობს მერი.
მერის ისტორია ნახეთ ამ ვიდეოში და ვრცლად წაიკითხეთ: qartli.ge-ზე
ამავე თემაზე შეგიძლიათ ნახოთ “ჯემნიუსის” საინტერესო პროექტი თრუსოს ხეობიდან, რომელშიც ბევრი ფოტო და ვიდეო დაგხვდებათ
„აქ ყველა დღე ერთმანეთის მსგავსია, ზოგჯერ არც გვახსოვს რა რიცხვია”
სამცხე-ჯავახეთის რეგიონული გამოცემა “სამხრეთის კარიბჭე” კი ადიგენის ერთ-ერთი სოფლიდან, ხარჯამიდან უყვება მკითხველს ამბავს.
როგორც ტექსტის ავტორი წელს, წლის ამ დროს ხარჯამში ყველა ეზო ერთმანეთის მსგავსია: თოკებზე სარეცხი, აივნებზე სიმინდი, ჭიშკრების წინ დასახერხი შეშის გორები, ძაღლების ყეფა და „დრუჟბის“ ხმა.
რეპორტაჟი და ფოტოები ვრცლად: Sknews.ge
ნინოწმინდაში, იქ სადაც დღე-დღეზე მოთოვს, ახლა დარგეს დეკორატიული ბუჩქები
საქართველოს ყველაზე ცივ მხარეში, ნინოწმინდაში, სადაც ადრე მოდის თოვლი, ერთ-ერთ სკვერში ახლა დარგეს დეკორატიული მცენარეები. კომპანიაში, რომელმაც პარკში ბუჩქები დარგო, რადიო “ნორს” უთხრეს, რომ ეს ყველაზე კარგი დროა ახალი ნარგავების დასარგავად.
ვრცლად: nor.ge
რეგიონული ამბების დაიჯესტი.
