რატომ ლანძღავს დასავლეთს ასლან ბჟანია? მოსაზრება
ასლან ბჟანია დასავლეთს საყვედურობს
ინალ ხაშიგი:
აფხაზეთის პრეზიდენტის, ასლან ბჟანიას ბოლო გამოსვლას პარლამენტში, რომლის დროსაც მან “კოლექტიური დასავლეთი” გააკრიტიკა, ბევრმა დამკვირვებელმა “მოვალეობის მოხდა” უწოდა და ნაწილობრივ მართლები არიან.
ასლან ბჟანიას სასწრაფოდ სჭირდება მისთვის სამი ფუნდამენტურად მნიშვნელოვანი პროექტის განხორციელება:
- ბიჭვინთის სახელმწიფო აგარაკის რუსეთისთვის გადაცემა;
- ენერგეტიკული ინდუსტრიის დენაციონალიზაცია და მასში რუსი ინვესტორების შემოშვება;
- სანაპირო ზონაში ბინების მასიური მშენებლობა, რომელთა მთავარი მყიდველები ისევ რუსები უნდა იყვნენ.
- ბიჭვინთის ცნობილი სახელმწიფო აგარაკი და 180 ჰექტარი ფიჭვნარი რუსეთის მფლობელობაში გადადის
- რამდენად გამართლებულია რუსული ინვესტიციები აფხაზეთში, როგორც ენერგეტიკული კრიზისის დაძლევის საშუალება
- ახალი „კანონი ბინების შესახებ“ აფხაზეთში – რას ნიშნავს და რა საფრთხეებს შეიცავს
ასლან ბჟანია ამ პროექტების განხორციელებას თითქმის 2020 წლიდან, ხელისუფლებაში მოსვლის შემდეგ ცდილობს. თუმცა, ყოველ ჯერზე ის აწყდება საპარლამენტო გაუგებრობის „კედელს“ – დეპუტატებს არ სურთ პრეზიდენტის ინიციატივებს მხარი დაუჭირონ.
ასე რომ, ასლან ბჟანია კიდევ ერთხელ მივიდა პარლამენტში იმ მიზნით, რომ დაეყოლიებინა დეპუტატები, რათა მის მიერ ლობირებულ პროექტებს ხმა მისცენ. მაგრამ ამჯერად, ჩვეულ არგუმენტებს, რომ “ჩვენ ბევრი პრობლემა გვაქვს და მოსკოვის მხარდაჭერის გარეშე საკუთარი რესურსების ხარჯზე ვერ მოვაგვარებთ მათ“, ბჟანიამ უკვე “გლობალური პრობლემებიც” დაამატა, რაც უჩვეულო იყო.
„აფხაზეთი დღევანდელი გლობალური დაპირისპირების ერთ-ერთი მტკივნეული წერტილია. დასავლეთი ყველაფერს აკეთებს იმისათვის, რომ ჩვენ არ ვიარსებოთ. მათ არ უნდათ დაინახონ ჩვენი უფლება ვიყოთ დამოუკიდებლები, არ უნდათ დაინახონ ჩვენი პასპორტები, არ უნდათ დაინახონ აფხაზეთი, როგორც მსოფლიოს ნაწილი. მათ უნდათ ჩვენთან საუბარი შუამავლების მეშვეობით თბილისში, უნდათ, რომ ჩვენი დედაქალაქი იყოს არა სოხუმში, არამედ თბილისში და აქტიურად მუშაობენ იმისთვის, რომ ეს ასე მოხდეს.
ეს მათ სჭირდებათ იმისთვის, რომ მსოფლიოს დაანახონ რუსეთის ფედერაციის მიერ ჩვენი სუვერენიტეტის აღიარების უმნიშვნელოობა, ასევე დაანახონ საქართველოს და რეგიონის სხვა ქვეყნებს, რომ პრობლემების გადაჭრის გასაღები მათ ჯიბეშია. ყველაფერს აკეთებენ, რომ აფხაზეთის არ განვითარდეს“, – განაცხადა ბჟანიამ დეპუტატებთან შეხვედრაზე.
არასდროს, არც ერთი პრეზიდენტის დროს, თუნდაც სოხუმისთვის ყველაზე რთულ პერიოდში, გეოპოლიტიკა ასე ხაზგასმით არ ყოფილა გამოყენებული შიდა პრობლემების გადასაჭრელად. მაგრამ ახლა, როგორც ჩანს, ეს მომენტი დადგა. როგორც ჩანს, ეს ასლან ბჟანიას ბოლო კოზირია. და ეს ძალიან საეჭვო კოზირია, იმიტომ რომ ზედმეტად გაზვიადებულია.
უფრო მეტიც: თუ, მაგალითად, უფრო ყურადღებით მოუსმენთ ფრაზას “დასავლეთი, რომელსაც წარმოადგენს შეერთებული შტატები და ევროპის ქვეყნები, ყველაფერს აკეთებს იმისათვის, რომ ჩვენ არ ვიარსებოდეთ”, მაშინ აუცილებლად წარმოიქმნება საპირისპირო ეფექტის მქონე სხვა ასოციაციური სერია.
თუ ვაშინგტონი და ბრიუსელი 30 წლის განმავლობაში აკეთებენ ყველაფერს აფხაზეთის სახელმწიფოებრიობის დასამარხად და მაინც ვერ მიაღწიეს წარმატებას, მაშინ ეს ორიდან ერთს ნიშნავს:
- აფხაზეთი ზედმეტად მკაცრია კოლექტიური დასავლეთისთვის და, შესაბამისად, აფხაზი ხალხი, რომელმაც გაუძლო ასეთ ზეწოლას, გაუმკლავდება ნებისმიერ გამოწვევას, მათ შორის ისეთ გამოწვევებსაც, რომლებსაც ბჟანია მიიჩნევს, რომ „დაძლევადია“.
- აფხაზეთი არ არის სამყაროს ცენტრი, რომ დასავლეთმა გამუდმებით მასზე იფიქროს. ეს უბრალოდ ლამაზი პატარა პერიფერიაა, არც თუ ისე განვითარებული დემოკრატიული ინსტიტუტებით. ამიტომ არჩეული მმართველები, ფაქტობრივად, ცუდი მენეჯერები არიან და თავიანთი არაეფექტურობის კომპენსირებას მხოლოდ ერთი გზით ცდილობენ – პირდაპირი პროპაგანდით.
სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო
