სანქციების საკითხებში ევროკავშირის სპეციალური წარმომადგენლის, დევიდ ო’სალივანის თქმით, ევროკავშირი იმედგაცრუებულია, რომ საქართველო დასავლეთის მიერ რუსეთის წინააღმდეგ დაწესებულ სანქციებს არ უერთდება, თუმცა კონტექსტის გეოპოლიტიკური გათვალისწინებით, ეს მათ “ესმით.”
ხოლო საქართველოში ოფიციალური ვიზიტით მყოფმა გაერთიანებული სამეფოს საგარეო, თანამეგობრობისა და განვითარების ოფისის გენერალურმა დირექტორმა ეკონომიკის, მეცნიერებისა და ტექნოლოგიების სფეროში, კუმარ აიერმა განაცხადა, რომ დასავლეთის მიერ რუსეთის წინააღმდეგ დაწესებული სანქციებისთვის თავის არიდების მცდელობების უმრავლესობა სახმელეთო საზღვრებზე ხდება, თუმცა კონტროლი უნდა გამკაცრდეს საჰაერო მიმოსვლაზეც.
როგორც აიერმა და აშშ-ს სახელმწიფო დეპარტამენტის სანქციების კოორდინაციის ოფისის ხელმძღვანელმა, ჯიმ ო’ბრაიენმა ერთობლივ კონფერენციაზე განმარტეს, ვიზიტის ძირითადი მიზანი მოსაზღვრე ქვეყნებიდან რუსეთის მიმართულებით სანქცირებული ტექნიკის შესაძლო იმპორტის კონტროლის მექანიზმებზე მუშაობაა.
“შექმნილი სისტემა თუ გააგრძელებს მუშაობას, მოგვცემს შესაძლებლობას, რომ მოვახდინოთ იდენტიფიცირება, თუ ხდება იმ საქონლით ვაჭრობა, რომელიც აკრძალულია”. – თქვა ო’ბრაიენმა.
ჯიმ ო’ბრაიენი ამბობს, რომ მათი მიზანია, რუს სამხედროებს ხელი შეუშალონ იმ იარაღების მიღებაში, რომელიც უკრაინაში ადამიანებს კლავს. ო’ბრაიენის თქმით, საქართველოში საკმიოდ დიდი სამუშაო გაიწია სანქციების შესრულების მონიტორინგის მიმართულებით და შექმნილია კომპლექსური სისტემაც.
“ჩვენი თანამშრომლობა საქართველოსთან მიმართულია სწორედ ამ ტიპის ელექტრონული მოწყობილობებისკენ, მინდა ხაზგასმით აღვნიშნო, ჩვენ არ ვცდილობთ, შევაჩეროთ მთელი ბიზნესი და ყველა ტიპის ვაჭრობა, ჩვენ არ ვაწესებთ სანქციებს რუსულ საკვებ-პროდუქტებზე, სასუქზე, ფართო მოხმარების საქონელზე, ჩვენ ვაქეზებთ მის მოხვედრას გლობალურ ბაზარზე. ამ ვაჭრობის გაგრძელების პარალელურად, გვინდა, ყურადღება გავამახვილოთ ისეთ საქონელზე, რაც შეიძლება, ბრძოლის ველზე იყოს გამოყენებული.” – განაცხადა მან.
“ქვეყანა, რომელსაც აქვს ევროკავშირში გაწევრიანების მისწრაფება, უნდა შეესაბამებოდეს, მათ შორის, ჩვენს საგარეო პოლიტიკას, მაგრამ ჩვენ, ასევე, ვიაზრებთ, რა სპეციფიკურ სიტუაციაში იმყოფება საქართველო ეკონომიკურად, გეოგრაფიულად და მრავალმხრივ რუსეთის კონტექსტის გათვალისწინებით. ამიტომ, ჩვენ გვესმის, რომ საქართველო ასრულებს ჩვენს სანქციებს. თუმცა, ბოლო ორ დღეში ვნახეთ, საქართველოს მთავრობა საკითხს ძალიან სერიოზულად უდგება, რომ ქვეყანა არ იყოს გამოყენებული სანქციების თავის ასარიდებელ პლატფორმად”. – ამბობს ო’სალივანი.
მისივე განმარტებით, პარტნიორობისა და თანამშრომლობის გასაღრმავებლად, ევროკავშირის მხრიდან ქვეყნებს აქვთ ძალიან მნიშვნელოვანი ორმხრივი გეგმა, “დღის წესრიგი საქართველოსა და ევროკავშირს შორის” და სალივანი იმედს გამოთქვამს, რომ უახლოეს მომავალში საქართველო იქცევა ევროკავშირის წევრად:
“ამიტომ ეს საკითხი, სანქციების საკითხი, რომელიც ძალიან დიდი ხნის განმავლობაში იქნება აქტუალური, უნდა მოვახერხოთ, რომ ამან არ შეაფერხოს ჩვენი ორმხრივი თანამშრომლობა მომავალში.”
ერთობლივი ვიზიტის ფარგლებში საქართველოში იმყოფებიან აშშ-ის სახელმწიფო დეპარტამენტის სანქციების კოორდინაციის ოფისის ხელმძღვანელი, ელჩი ჯიმ ო’ბრაიენი, გაერთიანებული სამეფოს საგარეო, თანამეგობრობისა და განვითარების ოფისის გენერალური დირექტორი ეკონომიკის, მეცნიერებისა და ტექნოლოგიების სფეროში, კუმარ აიერი და სანქციების საკითხებში ევროკავშირის სპეციალური წარმომადგენელი დევიდ ო’სალივანი.
გამოცემა POLITICO-ს ცნობით, 2023 წლის გაზაფხულზე დევიდ ო’სალივანი უკვე იმყოფებოდა თურქეთში, უზბეკეთსა და ყაზახეთში რუსეთის წინააღმდეგ დასავლეთის მიერ დაწესებული სანქციების შესაძლო გვერდის ავლის შემთხვევების მონიტორინგისთვის.
ჯეიმს ო’ბრაიენმა “ამერიკის ხმისთვის” მიცემულ ინტერვიუში განმარტა, რომ საქართველო სრულად ასრულებს დასავლეთის მიერ რუსეთის წინააღმდეგ დაწესებულ ფინანსურს სანქციებს, თუმცა მომატებულია რუსეთის მიმართულებით ელექტრონული ნივთების ტრანზიტი, რაც ლეგალური აღარ არის.
ასევე, ო’ბრაიენმა საგარეო ურთიერთობათა ევროპული საბჭოს (ECFR) ყოველწლიურ შეხვედრაზე თქვა, რომ რუსეთი გარკვეული სანქციებისთვის თავის არიდებას სხვა სახელმწიფოების გავლით ცდილობს, რაც ხელს უშლის შეზღუდვების მიზნების შესრულებას.
