"ეს არ იქნება ჩვეულებრივი საახალწლო შოპინგი" - საქართველო გარკვეულ შეზღუდვებს ხსნის. რა იცვლება

რამდენიმედღიანი კონსულტაციების შემდეგ მთავრობამ მიიღო გადაწყვეტილება, რომ 24 დეკემბრიდან შემსუბუქდება გარკვეული შეზღუდვები, რომლებიც ქვეყანაში 28 ნოემბერს ამოქმედდა.

საკოორდინაციო საბჭოს გადაწყვეტილებით, შეზღუდვების შემსუბუქება 2 იანვრამდე იმოქმედებს.

რა იცვლება:

შემსუბუქება ეხება ფაქტობრივად მხოლოდ სავაჭრო ობიექტებს – მაღაზიებს და მოლებს. და ისიც არა ყველას – მაგალითად, ბაზრობები არ გაიხსნება.

24 დეკემბრიდან 2 იანვრის ჩათვლით მუშაობას განაახლებენ სავაჭრო ობიექტები – მაღაზიები და მოლები. თუმცა, მათი მუშაობის წესი და გრაფიკი მნიშვნელოვნად იცვლება.

“ეს არ იქნება ჩვეულებრივი წინასაახალწლო შოპინგი,” – თქვა ეკონომიკის მინისტრმა ნათია თურნავამ.

• როგორ გადაარჩინა თურქეთმა ტურიზმი, მაგრამ გააღრმავა ეპიდემია
• როდესაც მხოლოდ ღარიბები დაიღუპებიან – ბრძოლა კორონვირუსის ვაქცინისთვის

რა არ იცვლება:

● კვლავ არ იმუშავებს მუნიციპალური ტრანსპორტი დიდ ქალაქებში – თბილისში, რუსთავში, ქუთაისში, ბათუმში, გორში, ზუგდიდში, ფოთსა და თელავში;

გამონაკლისი იქნება ახალი წლის – 31 დეკემბრის ღამე და ასევე შობის – 6 იანვრის ღამე.

● ძალაში რჩება კომენდანტის საათი 21:00-დან 05:00-მდე.

გამონაკლისი იქნება ახალი წლის – 31 დეკემბრის ღამე და ასევე შობის – 6 იანვრის ღამე.

● კვლავ არ იმოძრავებს საქალაქთაშორისო ტრანსპორტი საქართველოს ქალაქებს შორის მთელი ქვეყნის მასშტაბით. კერძო ავტომანქანებით გადაადგილება კვლავ ნებადართული იქნება;

● კვლავ დაკეტილი რჩება ე.წ. ტანსაცმლის ბაზრობები.

● მუშაობას ისევ გააგრძელებენ აგრარული ბაზრები, წესების სრული დაცვის პირობით;

რა რეგულაციები დაუწესდათ მაღაზიებს:

● მაღაზიების სამუშაო საათები განისაზღვრება დილის 07:00-დან საღამოს 19:00 საათამდე.

● მაღაზიის ფართის ყოველ 20-კვადრატულ მეტრზე დაიშვება არაუმეტეს ერთი მომხმარებელი;

● მაღაზიების როგორც შიდა, ასევე მაღაზიის გარე სივრცეში უნდა მოხდეს მომხმარებელთა რიგების მართვა;

● ფასდაკლებების აქციები გამოცხადდება ძირითადად დილის საათებში ან/და ონლაინ გაყიდვების შემთხვევაში;

● ტანსაცმლის მაღაზიებში არ იმუშავებენ გასახდელები;

● მომხმარებელთა ინტერესების დაცვის მიზნით, მაღაზიებმა უნდა დაუშვან პროდუქციის დაბრუნება ან გადაცვლა ერთი თვის განმავლობაში და ეს უნდა მოხდეს მხოლოდ 1 თებერვლის შემდეგ;

● სავაჭრო ცენტრებში იკრძალება კვების ობიექტების ფუნქციონირება, მათ შორის გატანის სერვისით.

● ყველა სივრცეში და მაღაზიის გარეთ რიგებში დაცული უნდა იყოს სოციალური დისტანცია და პირბადეების სწორად ტარების მოთხოვნები

ყველა ამ წესის დაცვაზე სრული პასუხისმგებლობა ეკისრება სავაჭრო ობიექტების ადმინისტრაციას. ნებისმიერი დარღვევის შემთხვევაში ობიექტს ან დაჯარიმებენ და/ან მის საქმიანობას შეაჩერებენ.

რესტორნები და კაფეები არ გაიხსნება?

არა. რესტორნები და კვების ობიექტები ქვეყნის მასშტაბით რჩება დაკეტილი, მათ შორის ახალი წლის ღამესაც. ისინი გააგრძელებენ მუშაობას მხოლოდ გატანის სერვისზე;

სასტუმროები?

დღეის მდგომარეობით, სათხილამურო კურორტების გარდა, მთელი ქვეყნის მასშტაბით დაშვებული იყო სასტუმროების და მათთან არსებული რესტორნების ფუნქციონირება. ასე გაგრძელდება 24 დეკემბრის შემდეგაც.

● თუმცა, სასტუმროების რესტორნები უნდა მოემსახურონ მხოლოდ სასტუმროში მცხოვრებ სტუმრებს და ისიც მხოლოდ 21.00 საათამდე. 21:00-დან დაშვებული იქნება მხოლოდ ნომერში მომსახურების სერვისი.

● სასტუმროებში აკრძალულია კულტურული და სხვა სახის გასართობი ღონისძიებების მოწყობა.

________________________

22 დეკემბერს, საქართველოში, გამოვლინდა ვირუსით ინფიცირების 3 064 ახალი დადასტურებული შემთხვევა. გარდაიცვალა კიდევ 42 პაციენტი.

● სულ საქართველოში დადასტურებულია 212 526 შემთხვევა
აქედან:
● გარდაცვლილი – 2182
● გამოჯანმრთელებული – 188 408
● აქტიური შემთხვევა (ანუ ახლა არიან ავად) – 21 910

როგორც ამირან გამყრელიძემ მთავრობის ადმინისტრაციაში გამართულ ბრიფინგზე განაცხადა, ინფიცირებულთა რაოდენობის შემცირების ტენდენციაა, თუმცა, არა ძალიან მნიშვნელოვანი.

“ბოლო 3 კვირის განმავლობაში, რაც შეზღუდვები მოქმედებს, მთავარი მიღწევა გვაქვს ის, რომ შემთხვევების მატება უკვე აღარ ფიქსირდება, ანუ დასტაბილიზირდა გარკვეულად ახალ ინფიცირებულთა რაოდენობა და მრუდი უკვე ქვემოთ გადმოიხარა”, – განაცხადა ამირან გამყრელიძემ