რა იცვლება ჩვენს ცხოვრებაში 2026 წლის იანვრიდან - ახალი საკანონმდებლო ცვლილებები
რა იცვლება 2026 წლის იანვრიდან
ამ ცვლილებების უმრავლესობა ჯერ კიდევ 2025 წელს იყო დაგეგმილი და დაანონსებული, თუმცა სხვადასხვა მიზეზების გამო გადაიდო.
საჯარო მოხელეების ხელფასები იზრდება
საქართველოში ბოლო წლებში დანერგილი პრაქტიკის შესაბამისად, წელს, პირველი იანვრიდან საჯარო სექტორში დასაქმებულთა ხელფასი კვლავ 10 პროცენტით გაიზრდება.
მათ შორის ხელფასი გაეზრდებათ პირველადი ჯანდაცვის პერსონალს, პოლიციელებს და ჯარისკაცებსაც.
ხელფასების მატება ამჯერად არ არის გათვალისწინებული პედაგოგებისთვის.
ჩინოვნიკების ხელფასები იზრდება
ხელფასის მომატებათ სახელმწიფო-პოლიტიკური თანამდებობის პირებსაც. მათ შორის მინისტრებს, მათ მოადგილეებს, პარლამენტის თავმჯდომარეს და მის მოადგილეებს, საპარლამენტო კომიტეტების თავმჯდომარეებს და პარლამენტის წევრებს.
როგორც bm.ge-მ დაიანგარიშა, ასეთი ხელფასები ექნებათ მათ 2026 წელს:
- პრეზიდენტი – თვეში 16 000 ლარი, წლიურად 192 000 ლარი;
- პრემიერ მინისტრი – თვეში 16 000 ლარი, წლიურად 192 000 ლარი;
- მინისტრი – თვეში 13 600 ლარი, წლიურად 163 200 ლარი;
- მინისტრის პირველი მოადგილე – თვეში 12 000 ლარი, წლიურად 144 000 ლარი;
- მინისტრის მოადგილე – თვეში 11 600, წლიურად 139 200 ლარი;
- პარლამენტის თავმჯდომარე – თვეში 16 000 ლარი, წლიურად 192 000 ლარი;
- პარლამენტის თავმჯდომარის პირველი მოადგილე – თვეში 14 720 ლარი, წლიურად 176 640 ლარი;
- პარლამენტის თავმჯდომარის მოადგილე – თვეში 14 400 ლარი, წლიურად 172 800 ლარი;
- პარლამენტის კომიტეტის თავმჯდომარე – თვეში 13 760 ლარი, წლიურად 165 120 ლარი;
- პარლამენტის წევრი – თვეში 12 800 ლარი, წლიურად 153 600 ლარი.
პენსია 20 ლარით იზრდება
1-ლი იანვრიდან საქართველოში იზრდება ასაკობრივი პენსიაც. იგი 20 ლარით მოიმატებს და 370 ლარი გახდება. 70 წელს ზემოთ პენსიონერები კი 495 ლარს მიიღებენ.
მაღალმთიან დასახლებებში მცხოვრები პენსიონერები 444 ლარს მიიღებენ, 70-ს გადაცილებულები კი 594 ლარს.
ჯამში 2026 წელს მოსახლეობის სოციალური დაცვის პროგრამებზე გათვალისწინებულია 6 მილიარდ 930 მილიონ ლარზე მეტი.
უცხოელი ტურისტებისთვის დაზღვევა სავალდებულო ხდება
2026 წლის 1-ლი იანვრიდან უცხოელ ტურისტებს საქართველოში შემოსვლისას თან უნდა ჰქონდეთ ჯანმრთელობისა და უბედური შემთხვევების დაზღვევის პოლისი. დოკუმენტი უნდა იყოს შედგენილი ქართულ და ინგლისურ ენაზე და ტურისტმა იგი თან უნდა იქონიოს მატერიალური ან ელექტრონული ფორმით. პოლისის სადაზღვეო თანხა უნდა შეადგენდეს არანაკლებ 30 000 ლარს. პოლისი შეიძლება გაცემული იყოს როგორც ქართული, ასევე უცხოეთის სადაზღვეო კომპანიის მიერ.
მძღოლები ხმაურის გამო დაჯარიმდებიან
2026 წლის 1-ლი იანვრიდან ძალაში “ადმინისტრაციულ სამართალდარღვევათა კოდექსის“ ის ნორმა შედის, რომლის მიხედვით, ღამის საათებში, კერძოდ, 23:00 საათიდან 08:00 საათამდე, დასახლებულ პუნქტებში სატრანსპორტო საშუალების ექსპლუატაციისას წარმოქმნილი ხმაურის მაქსიმალური დასაშვები დონე არ უნდა აღემატებოდეს 80 დეციბელს. დამრღვევი პირველად 100 ლარით დაჯარომდება, განმეორების შემთხვევაში 200 ლარით, ხოლო შემდეგ ჯერზე 300 ლარით. ჯერ კიდევ 2025 წელს იყო დაანონსებული, რომ მძღოლები, რომლებიც ღამის საათებში ხმაურიანად ატარებენ მანქანას, დაჯარიმდებოდნენ, თუმცა კანონის ამოქმედება ერთი წლით გადაიდო.
მართვის მოწმობა ჩამორთმეულებს დოკუმენტი დაუბრუნდებათ
1-ლი იანვრიდან მოქალაქეთა ნაწილს ჩამორთმეული მართვის მოწმობა დაუბრუნდება. კერძოდ, ვისაც 2025 წლის 16 დეკემბრის ჩათვლით შეჩერებული აქვს მართვის უფლება საგზაო-სატრანსპორტო შემთხვევის ადგილის მიტოვებისთვის, ალკოჰოლური სიმთვრალის მდგომარეობაში სატრანსპორტო საშუალების მართვისთვის, ნარკოტიკული საშუალების მოხმარებისთვის ან მართვის მოწმობისთვის მინიჭებული ქულების რაოდენობის ამოწურვისთვის.
ამ ცვლილებამ დიდი დისკუსია გამოიწვია სოციალურ ქსელებში. მოქალაქეთა ნაწილი არ მიესალმება იმ ფაქტს, რომ დამრღვევ მძღოლებს კვლავ მიეცემათ ავტომობილის ტარების უფლება.
ვეტერინარების სერტიფიცირება სავალდებულო ხდება
2026 წლის 1 -ლი იანვრიდან ვეტერინარისა და ვეტერინარი ტექნიკოსის საქმიანობისთვის სახელმწიფო სერტიფიკატის მიღება სავალდებულო გახდა. სახელმწიფო სერტიფიკატების გარეშე ვეტერინარს საქმიანობა ეკრძალება. 2025 წელს აღებული სერტიფიკატები 2030 წლის პირველ იანვრამდე იმოქმედებს.
შეწყდება მიწების სისტემური რეგისტრაცია
2026 წლის 1-ლი იანვრიდან აღარ გაგრძელდება მიწების სისტემური რეგისტრაციის უფასო პროგრამა. ცნობისთვის, მიწის სისტემური რეგისტრაცია არის საქართველოს იუსტიციის სამინისტროს მიერ 2022 წლიდან დაწყებული რეფორმა, რომელიც მიზნად ისახავდა ქვეყნის მასშტაბით მიწის ნაკვეთების სისტემურად აზომვას, საკადასტრო სამუშაოების ჩატარებას და საკუთრების უფლების რეგისტრაციას. რეფორმის დასრულების თარიღად 2025 წლის ბოლო იყო დასახელებული.
შესაბამისად, 2026 წლის 1-ლი იანვრიდან მიწების რეგისტრაცია მხოლოდ სპორადული წესით გაგრძელდება. იმ მოქალაქეებს კი, რომლებმაც ნაკვეთების საკუთრებაში გაფორმება სისტემური რეგისტრაციის ფარგლებში სხვადასხვა მიზეზით ვერ შეძლეს (ვერ მოასწრეს), მიწების დარეგისტრირება მხოლოდ სპორადული წესით შეეძლებათ 2027 წლის 1-ელ იანვრამდე და ამაში გარკვეული საფასური ექნებათ გადასახდელი.
იზრდება აქციზი იმპორტირებულ სიგარეტზე
1-ლი იანვრიდან უცხოური სიგარეტი დაიბეგრება 20 ღერზე 2.75 ლარის ოდენობის აქციზის განაკვეთით, რაც არსებულზე 85 თეთრით მეტია. ამასთან, იანვრიდანვე 60 თეთრით შემცირდება აქციზის განაკვეთი ადგილობრივად წარმოებულ სიგარეტზე.
პირველკლასელთა ასაკი იცვლება
ახალი რეგულაციით, სკოლაში შესვლის შესაძლებლობა ექნებათ მხოლოდ იმ ბავშვებს, რომლებსაც ყოველი წლის 15 სექტემბრის ჩათვლის შეუსრულდებათ 6 წელი. პირველკლასელების ასაკი ბოლო რამდენიმე წლის განმავლობაში რამდენჯერმე შეიცვალა – ბოლო სამი წელია სკოლაში იმ ბავშვებსაც იღებენ, რომლებსაც 6 წელი არ შესრულებიათ.
პირადობის მოწმობები იცვლება
ცვლილებების მიხედვით, პირადობის მოწმობებს უნდა დაემატოს ახალი რეკვიზიტები. კერძოდ, მოწმობის წვდომის კოდი, რომელიც უკონტაქტო მიკროსქემიდან მონაცემთა ამოკითხვისათვის გამოიყენება და ე.წ. QR კოდი, რომლის მეშვეობითაც, პირს შეუძლია გადაამოწმოს ინფორმაცია დოკუმენტის ან მისი მფლობელის შესახებ. გარდა ამისა, ცვლილებით, პირადობის მოწმობაზე თითის ანაბეჭდის დატანაც არის გათვალისწინებული. ცვლილებები 2026 წლის 1-ლი იანვრიდან ეტაპობრივად უნდა ამოქმედდეს.
პლასტიკის ერთჯერადი ჭურჭელი აიკრძალება
2026 წლის 1-ლი იანვრიდან პლასტმასისგან დამზადებული ჩანგლების, დანების, კოვზების, ჩხირების, თეფშების, საწრუპების და გაფართოებული პოლისტიროლისგან დამზადებული სასურსათო კონტეინერების და მათი თავსახურების, ჭიქების და მათი თავსახურების წარმოება, იმპორტი და ბაზარზე განთავსება იკრძალება. მართალია რეგულაცია ძალაში 2026 წლის 1-ლი იანვრიდან შევა, თუმცა ბიზნესს პლასტმასის ჭურჭლის ამოყიდვისთვის გარდამავალი პერიოდი მიეცემათ.
მკაცრდება უცხოელების დასაქმების წესი
„შრომითი მიგრაციის შესახებ“ კანონში შეტანილი ცვლილებების თანახმად, უცხოელებს საქართველოში დასაქმებისთვის სპეციალური ნებართვა დასჭირდებათ, დამსაქმებლებს კი მათი სამსახურში აყვანის საჭიროების დასაბუთება მოუწევთ. უცხოელის შესაბამისი უფლების გარეშე დასაქმების შემთხვევაში, დამსაქმებელიც და თავად დასაქმებული უცხოელიც 2000 ლარით დაჯარიმდებიან, განმეორების შემთხვევაში კი, ფულადი სანქცია ორმაგდება. აღნიშნული ფულადი სანქციების ამოქმედების ვადად 2026 წლის 1-ლი მარტია განსაზღვრული.
გიდების სერტიფიცირება სავალდებულო ხდება
2026 წლის 1-ლი ივნისიდან ამოქმედდება გიდების სერტიფიცირების ვალდებულება და ამ წესეის დარღევისთვის გათვალისწინებული ჯარიმები.
კერძოდ, „ტურიზმის შესახებ“ საქართველოს კანონში შეტანილი ცვლილების თანახმად, სამთო გამყოლის, სათხილამურო გამყოლისა და ალპური გამყოლის საქმიანობას განახორციელებს მხოლოდ შესაბამისი ავტორიზაციის მქონე, სერტიფიცირებული ფიზიკური პირი. მის სერტიფიცირებას ახორციელებს საქართველოს ტურიზმის ეროვნული ადმინისტრაციის მიერ ავტორიზებული პერსონალის სერტიფიცირების ორგანო. არასერტიფიცირებული პირი დაჯარიმდება 1000 ლარით.
იცვლება შინაური ცხოველების კანონი
„შინაურ ბინადარ ცხოველთა შესახებ“ კანონი, რომელიც პარლამენტმა 2025 წლის ივლისში მიიღო, 2026 წლიდან ეტაპობრივად ამოქმედდება.
ახალი კანონმდებლობის შესაბამისად, პირველ ეტაპზე, ცხოველის მეპატრონე ვალდებული იქნება:
- ცხოველის ავადობის შემთხვევაში, ის გადაიყვანოს ვეტერინარულ დაწესებულებაში;
- დაკბენა-დაკაწვრა-დადორბვლის შემთხვევაში, უზრუნველყოს სააგენტოს ინფორმირება და მოახდინოს ცხოველის ვეტერინარული მეთვალყურეობა იზოლირებულად.
- საზოგადოებრივი სავრცის დაბინძურების შემთხვევაში, უზრუნველყოს მისი მყისიერი დასუფთავება;
- აანაზღაუროს ცხოველის მიერ სხვა პირისათვის მიყენებული ზიანი;
- ცხოველის დაღუპვის შემთხვევაში, დაცემული ცხოველის გადაყვანა მოახდინოს საქართველოს კანონმდებლობით დადგენილი წესის შესაბამისად;
- ახალი რეგულაციები შეეხება შინაურ ბინადარი ცხოველების შემგროვებლურობასა და მათი გამრავლების წესების დაცვას;
- მკაცრად გაკონტროლდება ცხოველის მიტოვების საკითხი და ცხოველების;
- 2026 წლის 1-ლი ივლისიდან ანტირაბიული ვაქცინაციისა და სტერილიზაცია – კასტრაციის პირობების დარღვევისთვის განისაზღვრა გამკაცრებული ადმინისტრაციული ჯარიმები;
- 2026 წლის 1-ლი იანვრიდან ძალაში შედის კანონის მუხლი, რომელიც არასამკურნალო მიზნით ან ფუნქციური დანიშნულების გარეშე ცხოველისთვის ვეტერინარული ოპერაციების ჩატარებას კრძალავს. კერძოდ, აკრძალული იქნება ყურებისა და კუდის კუპირება, ეშვების ექსტრაქცია, კლანჭების ოპერაციული ამოკვეთა, სმენის დაქვეითება და ხმის იოგების გადაჭრა.
ცვლილებები შეეხება ცხოველების მიმკედლებლებსაც. მათ სრულად დაეკისრებათ ვალდებულება უზრუნველყონ მიკედლებული ცხოველების მოვლა-პატრონობის წესის დაცვა.
რა იცვლება 2026 წლის იანვრიდან
