ქოლცენტრების საქმე: საქართველოში უცხო ქვეყნის მოქალაქე დააკავეს და ტრანსნაციონალური დანაშაული გამოავლინეს

ტრანსნაციონალური დანაშაული გამოავლინეს

საქართველოს გენერალური პროკურატურის განცხადებით, უწყებამ შვიდი ქვეყნის კომპეტენტური უწყებების წარმომადგენლების ჩართულობით, ერთდროულად სამი ქვეყნის ტერიტორიაზე ტრანსნაციონალური დანაშაული გამოავლინა – საქმე ე.წ. ქოლცენტრებს ეხება. სპეციალურ ბრიფინგზე საქართველოს პროკურატურის წარმომადგენელმა განმარტა, რომ ფართომასშტაბიან ღონისძიებაში გერმანიის ფედერაციული რესპუბლიკის 60 და საქართველოს სამართალდამცავი ორგანოების 250-მდე თანამშრომელი მონაწილეობდა, რის შედეგადაც საქართველოში დაკავებულია უცხო ქვეყნის ერთი მოქალაქე.

პროკურატურის ცნობით, ერთობლივი ღონისძიების ფარგლებში, გერმანიის ფედერაციული რესპუბლიკის პოლიციის, პროკურატურის და საქართველოს სხვადასხვა უწყებების საგამოძიებო სამსახურის თანამშრომლებმა საქართველოს ტერიტორიაზე საგამოძიებო მოქმედებები ათეულობით ლოკაციაზე ჩაატარეს. ასევე, მათი თქმით, ფართომასშტაბიან ღონისძიებაში გერმანიის ფედერაციული რესპუბლიკის 60 და საქართველოს სამართალდამცავი ორგანოების 250-მდე თანამშრომელი მონაწილეობდა:

“ღონისძიების ფარგლებში, განხორციელდა ხუთი ე.წ. ქოლცენტრის, ათეულობით ფიზიკური პირის, მათი საცხოვრებელი ბინების, ავტომანქანების და სამუშაო ადგილების ჩხრეკა. ამოღებულია ასეულობით ელექტრონული მატარებელი, დოკუმენტაცია და დიდი ოდენობით ფულადი თანხა. ათეულობით ობიექტიდან გამოთხოვილია  ელექტრონული ინფორმაცია. ამავდროულად ყადაღა დაედო სავარაუდოდ დანაშაულებრივი გზით მოპოვებულ ქონებებს და საბანკო ანგარიშებზე განთავსებულ თანხას.”

ამასთან, უწყების ცნობით, ფართომასშტაბიანი ღონისძიების ფარგლებში, პირველ ეტაპზე სისხლისსამართლებრივი დევნა სხვადასხვა ქვეყნებში დაწყებულია დანაშაულის ორგანიზატორთა გარკვეული ნაწილის მიმართ, საქართველოში კი დაკავებულია დანაშაულებრივი ჯგუფის ერთ-ერთი ორგანიზატორი, მისი შემდგომი ექსტრადირების მიზნით, თუმცა პროკურატურას დაკავებულის ვინაობა არ დაუსახელებია.

პროკურატურა ხაზს უსვამს, რომ გამოძიების მიერ ამ ეტაპზე მოპოვებული ინფორმაციით, დანაშაულებრივი ჯგუფის საქმიანობა მოიცავს სხვადასხვა ქვეყნებში, მათ შორის საქართველოში, კომპანიების დაფუძნებას და მათ ბაზაზე ე.წ. ქოლცენტრების მოწყობას.

“აღნიშნული ქოლცენტრების მეშვეობით ევროკავშირის წევრი ქვეყნების, მათ შორის გერმანიის ფედერაციული რესპუბლიკის მოქალაქეების კუთვნილი მილიონობით ევროს თაღლითურად დაუფლებას და შემდგომში მათ გათეთრებას.” – ნათქვამია განცხადებაში.

ასევე, პროკურატურის ინფორმაციით, დანაშაულებრივი ჯგუფის წევრების მიერ ე.წ. ქოლ-ცენტრის ფუნქციონირებისთვის, ასეულობით საფირმო სახელწოდებით შექმნილია ელექტრონული სავაჭრო პლატფორმები, რომლებიც უზრუნველყოფდა მომხმარებლისაგან თაღლითურად მოპოვებული თანხების განთავსებას ფიქტიური საწარმოების საბანკო ანგარიშებზე.

“გამოძიება, გერმანულ მხარესთან, ასევე საერთაშორისო საგამოძიებო ჯგუფში ჩართული ქვეყნების კომპეტენტურ უწყებებთან, აქტიური თანამშრომლობით გაგრძელდება ორგანიზებული დანაშაულებრივი ჯგუფის საქმიანობაში ჩართული სხვა პირების მხილების მიზნით.” – განმარტავენ უწყებაში.

● „კანონის უზენაესობა და არაქურდული ოფისი“ – აფხაზური პასპორტი სოჭელი ბიზნესმენისთვის
● ცხინვალი: რომელი პრეზიდენტია ჩართული გახმაურებულ მკვლელობაში?
● აფგან მუხთარლი საქართველოს შს მინისტრისთვის უფლებამოსილების შეჩერებას ითხოვს

რა არის ქოლცენტრი

ე.წ. ქოლცენტრების საქმეზე ოპოზიცია და ხელისუფლება უკვე დიდი ხანია ერთმანეთს ადანაშაულებენ. საქართველოს პრემიერმინისტრი ირაკლი ღარიბაშვილი წინა ხელისუფლების მაღალჩინოსნის, დავით კეზერაშვილის ბრალეულობაზე საუბრობს, ხოლო ყველაზე დიდი ოპოზიციური პარტიის, “ნაციონალური მოძრაობის” ერთ-ერთი ლიდერი ლევან ხაბეიშვილი – სახელმწიფო უსაფრთხოების სამსახურის უფროსის, გრიგოლ ლილუაშვილის.

ქოლცენტრების თაღლითური საქმიანობის მსხვერპლი ევროპის სხვადასხვა ქვეყანაში მცხოვრები მოქალაქეები არიან. კერძოდ, ე.წ. ქოლცენტრის თანამშრომლები, წინასწარ შემუშავებული გეგმის შესაბამისად, ცრუ სატელეფონო ნომრების გამოყენებით უკავშირდებოდნენ გერმანიისა და სხვა ქვეყნების მოქალაქეებს, ეცნობოდნენ გამოგონილი სახელებით, მათი კომპანიის ადგილსამყოფელის შესახებ აწვდიდნენ ყალბ ინფორმაციას და სთავაზობდნენ ფასიანი ქაღალდების, აქციების, სასაქონლო აქტივების, ვალუტების და კრიპტოვალუტების ელექტრონულ ვაჭრობაში მონაწილეობის მიღებას გამოგონილი ელექტრონული პლატფორმების გამოყენებით.

ოპერატორები მომხმარებლებს არწმუნებდნენ, რომ მათი დახმარებით ფასების ზრდა-შემცირებაზე ელექტრონული ვაჭრობის შემთხვევაში, შეძლებდნენ სოლიდური მოგების მიღებას. მომხმარებლისგან თანხმობის მიღების შემდგომ, მათგან ელექტრონული ვაჭრობისთვის გამოყოფილი თანხების განთავსება ხდებოდა დანაშაულებრივი ჯგუფის კონტროლის ქვეშ არსებულ საბანკო ანგარიშებზე.

ამის შემდეგ ეს თანხები თავსდებოდა ორგანიზებული ჯგუფის მიერ უცხოეთში დაფუძნებული კომპანიების ანგარიშებზე, საიდანაც ფიქტიური დანიშნულებით, თითქოსდა გაწეული მომსახურების სანაცვლოდ, ირიცხებოდა საქართველოში, მათივე კომპანიების ანგარიშებზე.

ამ სქემით, 2021 წელს, დამნაშავეებმა 9 490 991 ევროს, 716 642 დოლარისა და 218 000 ბრიტანული ფუნტი სტერლინგის უკანონო შემოსავლის ლეგალიზაცია მოახდინეს. მაშინ ტრანსნაციონალური დანაშაულის გახსნაზე პროკურატურამ ოფიციალური განცხადება გააკეთა. უწყების ინფორმაციით, საქართველოსა და ისრაელის მოქალაქეებმა ჩამოაყალიბეს შეთანხმებულად მოქმედი, სტრუქტურული ფორმის მქონე ორგანიზებული დანაშაულებრივი ჯგუფი, თაღლითურად დაეუფლნენ “გერმანიის მოქალაქეების კუთვნილ მილიონობით ევროს და დანაშაულებრივი გზით მიღებული უკანონო შემოსავლის ლეგალიზაცია მოახდინეს.”