"ქართული ოცნება" შესაძლოა ევროპის სოციალისტური პარტიიდან გარიცხონ. რას პასუხობს ღარიბაშვილი

“ქართული ოცნება” შესაძლოა ევროპის სოციალისტური პარტიიდან გარიცხონ

ევროპის სოციალისტური პარტიის ვიცე-პრეზიდენტის, კეტი პირის განცხადებით, პოლიტიკურ გაერთიანებაში “ქართული ოცნებისთვის” სტატუსის შეჩერებაზე ერთსულოვნებაა და ოცნებას არავინ უჭერს მხარს. ამის შესახებ მან “ფორმულასთან” ინტერვიუში განაცხადა.

საქართველოს მმართველი პარტიის გარიცხვასთან დაკავშირებით კომენტარი გააკეთა ევროპის სოციალისტური პარტიის კიდევ ერთმა წევრმა, ევროპარლამენტარმა ტეის როიტენმა. მან იმედი გამოთქვა, რომ “ქართული ოცნება” ორბანის და პუტინის მიმართულებას აღარ აირჩევს და აღნიშნა, რომ დღეს საქართველოს ხელისუფლება ასოცირდება ორბანთან და მემარჯვენე ძალებთან. მისი თქმით, ეს არ არის ის ადგილი, სადაც საქართველო და საქართველოს მთავრობა უნდა იმყოფებოდეს.

პრემიერმინისტრი ირაკლი ღარიბაშვილი ევროპის სოციალისტური პარტიის ვიცე-პრეზიდენტის, კეტი პირის განცხადებებს გამოეხმაურა. როგორც ღარიბაშვილი ამბობს, დასკვნებს პარტიაშიც გააკეთებენ, “შეიძლება იმაზე ადრე, ვიდრე სოციალისტები შეიკრიბებიან ივნისში”.

“ჩვენ არ დავუშვებთ არც უმცირესობაზე ძალადობას, ისევე არ დავუშვებთ უმცირესობის ძალადობას და მათ აგრესიულ პროპაგანდას ჩვენი მოსახლეობის, ჩვენი ხალხის უმრავლესობაზე. ეს უფლებები არის გარანტირებული კონსტიტუციით, ჩემო ძვირფასო, უფრო მეტიც, ჩვენ კანონით გავამყარეთ ეს ყველაფერი და არცერთი ადამიანის დისკრიმინაცია არ ხდება ქვეყანაში.” – უპასუხა ღარიბაშვილმა ჟურნალისტის დასმულ შეკითხვას.

“ქართული ოცნება” ევროპარლამენტის ევროპელი სოციალების ალიანსის წევრია.

4 მაისს, უნგრეთში ირაკლი ღარიბაშვილის გამოსვლა დაგმო ევროპელი სოციალისტების პარტიამ (PES) და აღნიშნა, რომ მომავალ სხდომაზე ქართული ოცნებისთვის სტატუსის შეჩერებას განიხილავენ, რაც “აუცილებელი ნაბიჯია”.

საქართველოს პრემიერმინისტრმა ირაკლი ღარიბაშვილმა ბუდაპეშტში კონსერვატიული პოლიტიკური მოქმედების ყოველწლიურ კონფერენციაზე სიტყვით გამოსვლისას განაცხადა, რომ უნგრელ ხალხს ძალიან გაუმართლა, რომ “ასეთი ბრძენი და შორსმჭვრეტელი” ლიდერი ჰყავს. მისივე თქმით, სიმართლესთან დაპირისპირებული ძალები მიზნების მიღწევას ლგბტ პროპაგანდით ცდილობენ.

ღარიბაშვილის განმარტებით, საქართველოს საზოგადოების უდიდესი უმრავლესობა ტრადიციულ, კონსერვატიულ ოჯახურ ღირებულებებს იზიარებს და ეს ფასეულობები მხოლოდ წარსული მემკვიდრეობა არ არის. ღარიბაშვილის თქმით, იგი ცოცხალი დღევანდელობაა – გარემო, რომელშიც “ჩვენ გავიზარდეთ და გვსურს ჩვენი შვილები აღვზარდოთ.”

კეტი პირის განცხადება

როგორც კეტი პირიმ აღნიშნა, მათი შეშფოთება ჯერ კიდევ მარტში რუსულ კანონთან დაკავშირებით ქართული ოცნების ლიდერების განცხადებებმა გამოიწვია.

“იყო ძალიან დიდ შეშფოთება არა კანონთან დაკავშირებით, არამედ თუ როგორ განცხადებას აკეთებდნენ კანონმდებლობასთან დაკავშირებით ოცნების პოლიტიკოსები – თბილისის მერი, პარტიის ლიდერი თუ პრემიერმინისტრი. ჩვენ ძალიან შეშფოთებულები ვიყავით და მარტში გადავწყვიტეთ ფაქტების მოძიების მისია გაგვეგზავნა საქართველოში, გვესაუბრა საქართველოს წარმომადგენლებთან, ქართული ოცნების სამოქალაქო საზოგადოების წარმომადგენლებთან, მაგრამ როგორც კი დავინახეთ, რომ ღარიბაშვილისა და მისი პარტიისთვის მისაღები იყო ულტრაკონსერვატიულ, არადემოკრატიულ პოლიტიკურ ყრილობაზე სიტყვით გამოსვლა, ფაქტების მოძიების მისია აღარ გახდა საჭირო. სოციალისტური პარტიის არც ერთი წევრი არ იყო კმაყოფილი ქართული ოცნების ამ ქმედებით”. – აღნიშნა მან. 

● სახელმწიფო დეპარტამენტი: 5 ივლისის საქმეზე არც ერთი ორგანიზატორი არ დასჯილა
● ადამ ჰოლოვეი: „ქართული ოცნება“ პროპუტინისტური და პრორუსული ჯგუფია, რომელიც საქართველოს რისკის ქვეშ აყენებს
● ვიოლა ფონ კრამონი: ქართველმა ტროლებმა რუსებსაც აჯობეს  – სავარაუდო დამკვეთი ოცნებაში უნდა ვეძებოთ

მისივე თქმით, საბოლოო გადაწყვეტილებას გარიცხვასთან დაკავშირებით ივნისში მიიღებენ.

“ნათლად დგას საკითხი, მე წარვუძღვები დისკუსიას ევროპელ სოციალისტებში, ჩემი პირადი აზრი და პოზიცია იქნება, რომ მათ შეუჩერდეთ სტატუსი ევროპელ სოციალისტებში… ჩვენ რამდენჯერმე განვიხილეთ და ერთსულოვნება ვიგრძენი ჩვენს პოლიტიკურ ოჯახში. ასეთი ტიპის განცხადებები, რომელიც გახლავთ ანტი ლგბტ, ასევე უკრაინაში ომის თემასთან დაკავშირებით როგორ ჩარჩოებშიც სვამდნენ სამოქალაქო საზოგადოებას. ყველა დისკუსიაში, რომელიც გავმართეთ (სამჯერ გაიმართა) არავინ დადგა ქართული ოცნების მხარეს. რაც შეეხება ხმის მიცემის პროცედურას, არ ვფიქრობ, რომ ეს კენჭისყრაზე დადგება. არც ერთი ადამიანი არ უჭერს მხარს ქართულ ოცნებას.” – აცხადებს კეტი პირი.