"ქართული ოცნება" კონსტიტუციის ცვლილებას და ბარიერის 2%-მდე დაწევას აღარ აპირებს

მმართველი პარტია “ქართული ოცნება” კონსტიტუციის ცვლილებას და მომდევნო საპარლამენტო არჩევნებზე ბარიერის 2%-მდე დაწევას აღარ აპირებს. როგორც პარტიის თავმჯდომარემ, ირაკლი კობახიძემ განაცხადა, ამ ეტაპზე საკონსტიტუციო ცვლილებები, რომელიც საარჩევნო სისტემის რეფორმირებას გულისხმობს, არ განიხილება. 

მოქმედი კონსტიტუციით, 2024 წელს საპარლამენტო არჩევნები 5%-იანი ბარიერით, სრულად პროპორციულ სისტემით უნდა ჩატარდეს.

საკონსტიტუციო კანონში ცვლილებების ინიცირება შარლ მიშელის დოკუმენტს მოჰყვა, რომლის მიხედვით, მომდევნო 2 საპარლამენტო არჩევნები, 2%-იანი ბარიერით უნდა ჩატარდეს – ცვლილებები პარლამენტმა ერთი მოსმენით უკვე მიიღო. 

თუმცა, “ქართულმა ოცნებამ” შარლ მიშელის შეთანხმება დატოვა, ხოლო შალვა პაპუაშვილმა მეორე მოსმენისთვის ბარიერის 3%-მდე გაზრდის შესახებ ისაუბრა.

როგორც კობახიძე ამბობს, ცვლილებების დამტკიცება “სხვადასხვა სუბიექტის ქცევასა და ქმედებებზე იქნება დამოკიდებული”, ხოლო შალვა პაპუაშვილის თქმით, შარლ მიშელის შეთანხმების ანულირების შემდეგ, კონსტიტუციის ცვლილების ვალდებულება ხელისუფლებას აღარ აქვს.

“ის ბარიერი, რომელიც 2024 წლიდან ამოქმედდება, არის სრულად თავსებადი დემოკრატიულ სტანდარტებთან. ეს არის 5%-იანი ბარიერი, 2024 წლიდან ამოქმედდება ყველა შემთხვევაში სრულად პროპორციული სისტემა თავისი 5%-იანი ბარიერით.

რაც შეეხება 2 %-იან ბარიერს, უკეთესია თუ არა ეს 5 %-იანზე, ამაზე არავითარი სიღრმისეული მსჯელობა არ ყოფილა, შეიძლება უარესიც არის“, – ამბობს ირაკლი კობახიძე.

ხოლო შალვა პაპუაშვილის თქმით, “ეს პროცესი, სრული თანხმობის პროცესი უნდათ, გამოიყენონ დესტაბილიზაციისთვის და არეულობისთვის, რომ შემდეგ მოითხოვონ რიგგარეშე არჩევნები.”

● რას ფიქრობენ ექსპერტები შარლ მიშელის შეთანხმების გაუქმებაზე
● კელი დეგნანი: სანქციები ჩვენი ერთ-ერთი ბერკეტია
● კრიზისის დასასრული? ხელისუფლებამ და ოპოზიციის ნაწილმა შეთანხმებას ხელი მოაწერა

ყველაზე მსხვილი ოპოზიციური პარტიის, “ნაციონალური მოძრაობის” თავმჯდომარის, ნიკა მელიას თქმით, ქართული ოცნება ეძებს გზას, რომ საზოგადოების წინაშე კიდევ ერთხელ ჩაიდინოს პოლიტიკური თაღლითობა. როგორც მელიამ აღნიშნა, პარლამენტის თავმჯდომარემ, კახა კუჭავამ წლის ბოლომდე უნდა წარადგინოს გეგმა, როდის და როგორ აპირებენ საკონსტიტუციო ცვლილებების მიღებას.

“რატომ აკეთებს ამ ყველაფერს? იმიტომ, რომ იცის, რომ ამ ქვეყანაში ახალი არჩევნები ჩატარდება. ზუსტად იცის ქართულმა ოცნებამ. იძულებული გახდებიან. ვინ გახდის იძულებულს? – საზოგადოება. როდესაც ესენი მეორე და მესამე მოსმენით მიიღებენ ცვლილებებს, რომლითაც ჩაიწერება კონსტიტუციაში, რომ თუ 2022 წლის აპრილის თვეში ჩატარდება არჩევნები, ის არჩევნები უნდა იყოს სრულად პროპორციული, ქართულმა ოცნებამ იცის, რომ აპრიორი დამარცხებულია, ამას არც უარყოფს. ამიტომ, გზას ეძებენ, რომ ჩაიდინონ კიდევ ერთხელ პოლიტიკური თაღლითობა საერთაშორისო და ქართული საზოგადოების წინაშეც”, – ამბობს მელია.

ნიკა მელიას განმარტებით, “ნაციონალური მოძრაობა” პარლამენტში მხოლოდ იმიტომ დარჩა, რომ საკონსტიტუციო ცვლილებები მიეღოთ და თუ ეს ასე არ მოხდა, პარტია პარლამენტს დატოვებს.

● აშშ-ს სახელმწიფო დეპარტამენტი: წინასწარ არ ვსაუბრობთ სანქციებზე, ვითარებას ყურადღებით ვაკვირდებით
● მოსაზრება: რატომ არ გამოდიან ქართველები ქუჩაში?

მმართველი პარტიის ინიციატივას გამოეხმაურა არასამთავრობო ორგანიზაციების ნაწილიც.

მათი თქმით, 19 აპრილს, შარლ მიშელის მედიაციით, პარტიებს შორის მიღწეული შეთანხმება ითვალისწინებდა ამბიციურ საარჩევნო რეფორმას, მათ შორის მომავალი საპარლამენტო არჩევნების სრულად პროპორციული სისტემით გამართვას და შემდეგი ორი საპარლამენტო არჩევნებისთვის ბუნებრივი ან, მაქსიმუმ, 2%-იანი ბარიერის შემოღებას.

ორგანიზაციები აღნიშნავენ, რომ “ქართული ოცნების” მიერ, საერთაშორისო, ადგილობრივი პარტნიორებისა და საზოგადოების წინაშე დადებული პირობა, რომელიც ქვეყანაში დემოკრატიის დონის გაუმჯობესებას ემსახურება, აუცილებლად უნდა შესრულდეს, “რადგან ეს მმართველი ძალის უპირველეს ვალდებულებას წარმოადგენს.”

“აღსანიშნავია ისიც, რომ საკონსტიტუციო ცვლილებები პირველი მოსმენით, ერთხმად, ოპოზიციური საპარლამენტო პარტიების მხარდაჭერითაცაა მიღებული, რაც ქართულ პოლიტიკურ სივრცეში პარტიების შეთანხმებისა და თანამშრომლობის იშვიათ და მისასალმებელ მაგალითს წარმოადგენს. რეფორმის გაგრძელებაზე უარი, ამ მხრივაც დააზიანებს ისედაც პოლარიზებულ პოლიტიკურ გარემოს და ეჭვქვეშ დააყენებს მმართველი პარტიის სანდოობას”, – ნათქვამია განცხადებაში.