ამერიკა პოლიციის მანქანებს წვავს და მიწაზე დაწოლილი ადამიანები იმეორებენ - „ვერ ვსუნთქავ“. ფოტორეპორტაჟი
აშშ პრაქტიკულად სრულად მოიცვა მრავალათასიანმა აგრესიულმა პროტესტმა მას შემდეგ, რაც ქალაქ მინესოტაში, დაკავებისას, პოლიციას აფროამერიკელი ჯორჯ ფლოიდი შემოაკვდა.
1 ივნისს გაიმართება პირველი მოსმენა 44 წლის პოლიციელის, დერეკ შოვინის საქმეზე (ამერიკული მედია ხაზგასმით აღნიშნავს, რომ ის თეთრკანიანია), რომელსაც ბრალად ედება ჯორჯ ფლოიდის მკვლელობა. დაკავებისას მან მახრჩობელა ილეთი გამოიყენა, რომელმაც 46 წლის ჯორჯ ფლოიდის გარდაცვალება გამოიწვია.
აშშ-ის 40-ზე მეტ ქალაქში კომენდანტის საათია გამოცხადებული. მაგრამ ადამიანები დიდწილად მის იგნორირებას ახდენენ, რაც უკვე ბევრ შემთხვევაში გადაიზარდა პოლიციასთან შეტაკებებში.
დემონსტრანტებთან შეტაკებები განსაკუთრებით მძიმე იყო 1 ივნისის ღამეს ნიუ-იორკში, ჩიკაგოში, ფილადელფიასა და ლოს ანჯელესში. იქ ცრემლმდენი გაზი გაუშვეს და ადამიანებს წიწაკის ტყვიებს ესროდნენ.
ყველგან წვავენ პოლიციის მანქანებს, ბევრ ქალაქში გაძარცვეს მაღაზიები.
დენვერში, ათასობით ადამიანი მონაწილეობდა მშვიდობიან პროტესტში – ისინი მიწაზე იწვნენ, ხელები ზურგზე ჰქონდათ დაწყობილი და იმეორებდნენ: „ვერ ვსუნთქავ“.
15 შტატსა და ვაშინგტონში განათავსეს ეროვნული გვარდიის შენაერთები, ეს აშშ-ის სარეზერვო სამხედრო ძალაა, რომელიც ქვეყნის შიგნით, საგანგებო მდგომარეობის დროს სიტუაციის დასარეგულირებლად გამოიყენება.
31 მაისის ღამით, ეროვნული გვარდიის ხუთი ათასი წარმომადგენელი განათავსეს ვაშინგტონში მას შემდეგ, რაც მრავალათასიანმა ჯგუფმა თეთრ სახლთან ცეცხლი დაანთო და პოლიციელებს ქვები დაუშინა.
საპროტესტო აქციის ასობით მონაწილე დააპატიმრეს. ჯერჯერობით მსხვერპლის შესახებ ინფორმაცია არ ვრცელდება.
აშშ-ში ფლოიდის საქმეს მრისხანების ამოფრქვევა მოჰყვა, წარსულში მრავალი ანალოგიური შემთხვევის დროს პოლიციის მხრიდან აფროამერიკელების მიმართ გადაჭარბებული ძალადობის ფონზე. ბევრისთვის ეს პროტესტი გახდა ასევე აღშფოთების გამოხატულება სოციალურ-ეკონომიკური უთანასწორობისა და სეგრეგაციის გამო, რომელიც განსაკუთრებით, მინეაპოლისშია.
რა მოხდა ჯორჯ ფლოიდთან დაკავშირებით?
25 მაისს, საღამოს, მინესოტაში, პატარა სასურსათო მაღაზიაში პოლიცია გამოიძახეს, რადგან ჯორჯ ფლოიდი იქ 20-დოლარიანი ყალბი კუპიურით ცდილობდა გადახდას.
პოლიცია მის ავტომობილში ჩასმას შეეცადა, მაგრამ ის მიწაზე დაეცა და ამბობდა, რომ კლაუსტროფობია აწუხებდა.
პოლიციის ცნობით, ის მათ ფიზიკურ წინააღმდეგობას უწევდა და ხელბორკილი დაადეს.
პოლიციელმა დერეკ შოვინმა მიწაზე განრთხმულ ფლოიდს მუხლი კისერთან დააჭირა. ვიდეოზე ისმის, როგორ ამბობს ჯორჯ ფლოიდი: „გთხოვ, ვერ ვსუნთქავ“ და „არ მომკლა“.
წინასწარი გაკვეთის თანახმად, პოლიციელს დაკავებული ასეთ მდგომარეობაში რვა წუთი და 46 წამი ჰყავდა, თანაც, თითქმის სამი წუთი მას შემდეგ, რაც ფლიდმა რეაგირება შეწყვიტა.
მოგვიანებით ის საავადმყოფოში გადაიყვანეს, მაგრამ უკვე გარდაცვლილი იყო.
