არჩევნების წინ პრორუსული პარტიები გაერთიანდნენ
პრორუსული პარტიები საარჩევნოდ გაერთიანდნენ
საარჩევნოდ პრორუსული ე.წ. კონსერვატიული პარტიები გაერთიანდნენ და ერთობლივი პრესკონფერენცია გამართეს. საარჩევნო გაერთიანების წევრია პრორუსული, ძალადობრივი “ალტ ინფოც“.
“ის კი არა, რომ ბარიერს გადავლახავთ, ჩვენ შთამბეჭდავი შემადგენლობით შევალთ საქართველოს პარლამენტში.” – ამბობს პრორუსული პარტია “პატრიოტთა ალიანსის” ერთ-ერთი ლიდერი ირმა ინაშვილი.
11 ივნისს პუტინისტური “ალტ ინფოს” ლიდერმა, ზურაბ მახარაძემ თქვა, რომ ირმა ინაშვილისა და დავით თარხან-მოურავის პრორუსულ პარტია “პატრიოტთა ალიანსთან” შეთანხმება მიღწეულია და ისინი მომავალ საპარლამენტო არჩევნებში მონაწილეობას ერთად აპირებენ.
მახარაძე პირობას დებდა, რომ მისი მოძრაობა არჩევნებში მონაწილეობას აუცილებლად მიიღებს. აქამდე, 8 აპრილს საჯარო რეესტრმა ალტ-ინფოს პარტიას, კონსერვატიულ მოძრაობას რეგისტრაცია გაუუქმა.
ირმა ინაშვილის თქმით, სახელისუფლებო პარტია წლების განმავლობაში მიზანმიმართულად ებრძოდა არა ნაციონალურ მოძრაობას, არამედ კონსერვატიულ ფლანგს.
“ერთი მხრივ, არის ულტრალიბერალების გაერთიანება – კრებითი სააკაშვილი, ნაცმოძრაობა და მათი განშტოებები. მეორე მხრივ, ასევე ლიბერალური ქართული ოცნება, რომელიც ცდილობს, რომელიც დღეს გახდა ვითომ კონსერვატორი.
ის კი არა, რომ ბარიერს გადავლახავთ, ჩვენ შთამბეჭდავი შემადგენლობით შევალთ საქართველოს პარლამენტში.” – თქვა ირმა ინაშვილმა.
როგორც “პატრიოტთა ალიანსის” კიდევ ერთი ლიდერი, დავით თარხან-მოურავი ამბობს, 12 წელია ცდილობს, ყველა კონსერვატიული ძალა გააქროს და მათი ადგილი დაიპყროს.
“გასაგებია, რომ საქართველოს ინტერესი არ არის რუსეთთან ომი. ჩვენ არ შეგვიძლია ამ ომში გამარჯვება. ე. ი. უნდა მოვძებნოთ საერთო ენა, გვქონდეს მშვიდი, წყნარი ურთიერთობა. რეალურად ქართული ოცნება დღეს ნაციონალური მოძრაობაა, იქიდან იმპორტირებული ხალხით. 12 წელია ცდილობს, ყველა კონსერვატიული ძალა გააქროს და მათი ადგილი დაიპყროს.” – თქვა თარხან-მოურავმა.
“ალტ ინფოს” ლიდერის, ზურა მახარაძის მტკიცებით, ეს არის “ხალხის ერთობა, რომელიც ამბობს, საქართველოს სახელმწიფო ინტერესები უპირველეს ყოვლისა და ნებისმიერ მხარესთან დიალოგი”.
“ნებისმიერი პროდასავლური, პრორუსული, პროთურქული, პროჩინური პოზიცია არის საქართველოს ღალატი. ერთადერთი სწორი პოზიცია არის პროქართული პოზიცია. გარეთ ვპოულობთ ვიღაცა პატრონს და მისი პრიზმიდან ვუყურებთ სხვებს, ვის მიმართ აქვს პატრონ-ყმული დამოკიდებულება. ჩვენი ერთობა არის იმ ხალხის ერთობა, რომელიც ამბობს, საქართველოს სახელმწიფო ინტერესები უპირველეს ყოვლისა და ნებისმიერ მხარესთან დიალოგი, ურთიერთობა, უნდა გამომდინარეობდეს მაგ პრინციპიდან.” – ამბობს მახარაძე.
