"ბუჩამდე იყო აფხაზეთი, უკრაინის ოკუპაციამდე იყო საქართველოს ოკუპაცია" - პრეზიდენტის მიმართვა უკრაინის სამშვიდობო სამიტზე
პრეზიდენტის მიმართვა უკრაინის სამშვიდობო სამიტზე
საქართველოს პრეზიდენტმა, სალომე ზურაბიშვილმა შვეიცარიაში, უკრაინის სამშვიდობო სამიტზე მსოფლიო ლიდერების წინაშე სიტყვით გამოსვლისას განაცხადა, რომ საქართველოს შეუძლია გაიზიაროს უკრაინელი ხალხის მწარე ხვედრი. მისივე თქმით, “ბუჩამდე იყო აფხაზეთი, ეს ფილმის სათაურია” და უკრაინის წინააღმდეგ ომამდე იყო ომი საქართველოს წინააღმდეგ.
სალომე ზურაბიშვილის გამოსვლა
ომი უკრაინის წინააღმდეგ უკვე 800 დღეა გრძელდება. ესაა უდანაშაულო სიცოცხლეების, განადგურების და ეკონომიკის ნგრევის 800 დღე. 800 დღის განმავლობაში უკრაინელები იბრძვიან არა მხოლოდ თავისუფლებისთვის და მათი სამშობლოს ტერიტორიული მთლიანობისთვის, არამედ ევროპის უსაფრთხოებისა და თავისუფლებისთვის და დემოკრატიის იდეალებისთვის, კანონის უზენაესობის შენარჩუნების და აღდგენისთვის.
“ჩემს სამშობლოს, საქართველოს შეუძლია გაიზიაროს უკრაინელი ხალხის მწარე ხვედრი. ჩვენის მხრივ, ბუჩამდე იყო აფხაზეთი, ეს ფილმის სათაურია და დიახ, უკრაინის წინააღმდეგ ომამდე იყო ომი საქართველოს წინააღმდეგ, არა ერთხელ, არამედ მრავალჯერ, და უკრაინული ტერიტორიების ოკუპაციამდე იყო საქართველოს ტერიტორიების ოკუპაციაც.
ჩემს ქვეყანას შეუძლია მხოლოდ გაიზიაროს შეშფოთება არასტაბილურობისა და დაპირისპირების შესახებ, რომელიც რუსეთმა მოიტანა შავ ზღვაში თანამშრომლობისა და კავშირის ნაცვლად. შავი ზღვის მილიტარიზების ფონზე, რუსეთი გეგმავს ახალი, დამატებითი საზღვაო ბაზა საქართველოს ტერიტორიაზე, აფხაზეთის რეგიონში. ჩემს ქვეყანას შეუძლია მხოლოდ გაიზიაროს შეშფოთება ბირთვული უსაფრთხოების შესახებ, როცა უკრაინამ განიცადა ჩერნობილის კატასტროფის შედეგები.
ყველა ამ მიზეზის გამო, ჩვენ შეგვიძლია მხოლოდ ვიზიარებდეთ რწმენას, რომ უკრაინის წინააღმდეგ ომი უნდა შეწყდეს და გზა დაუთმოს მშვიდობას უკრაინასა და ევროპაში. ეს შეიძლება მოხდეს მხოლოდ იმ შემთხვევაში, როდესაც გადაიდგმება ის საწყისი ნაბიჯები, რომლებიც დღესვე უნდა განხორციელდეს. დიდება უკრანიას!”
სალომე ზურაბიშვილმა ასევე ისაუბრა შავი ზღვის უსაფრთხოების და რუსეთის მიერ აფხაზეთში სამხედრო ბაზის აშენების საკითხებზეც.
ევროპასა და უკრაინაში მშვიდობა მხოლოდ მაშინ დამყარდება, როცა საწყისი ნაბიჯების მიღმა, რუსეთი გააცნობიერებს, რომ მას აქვს საზღვრები ისევე, როგორც სხვა სახელმწიფოებს, ჰყავს მეზობლები, როგორც სხვა სახელმწიფოებს და საერთაშორისო საზოგადოებას და უსაფრთხოების ახალ არქიტექტურას მხოლოდ მაშინ შეუძლია არსებობა, როცა მსოფლიოს უდიდესი სახელმწიფო ცნობს და პატივს სცემს მის მეზობლებს და მათ ტერიტორიულ მთლიანობას. – აღნიშნა პრეზიდენტმა.
მანამდე სალომე ზურაბიშვილი უკრაინის პრეზიდენტს, ვოლოდიმირ ზელენსკის შეხვდა.
ვოლოდიმირ ზელენსკიმ სალომე ზურაბიშვილთან შეხვედრის კადრები გამოაქვეყნა და დაწერა:
“მშვიდობის გლობალური სამიტის ფარგლებში შევხვდი საქართველოს პრეზიდენტს, სალომე ზურაბიშვილს. განვიხილეთ ორმხრივი თანამშრომლობის საკითხები და ჩვენი ქვეყნების უსაფრთხოების გამოწვევები. ვუამბე რუსეთის საჰაერო ტერორის შესახებ, უკრაინის ენერგეტიკული სისტემის წინააღმდეგ. ჩვენი ქვეყანა ყველა შესაძლო ძალას იყენებს ელექტროენერგიის გენერაციის აღსადგენად.
მადლობას ვუხდი სამიტში მონაწილეობისთვის. ეს ჩვენთვის ძალიან მნიშვნელოვანია.
ჩვენ ერთად ვართ.
მადლობა მხარდაჭერისთვის.
დარწმუნებული ვარ, დადგება დღე, როცა უკრაინა და საქართველო ევროკავშირში იქნებიან – ერთად და სამუდამოდ.
საქართველოს პრეზიდენტი, სალომე ზურაბიშვილი X-ზე წერს:
“ვულოცავ ამ ეტაპს უკრაინასა და მოლდოვას ევროკავშირში ინტეგრაციის გზაზე!
გულწრფელად ვულოცავ პრეზიდენტ ზელენსკისა და პრეზიდენტ სანდუს ამ მნიშვნელოვან მიღწევას. დარწმუნებული ვარ, ევროპელი ქართველი ერი თქვენს რიგებს მალე შეუერთდება.
სალომე ზურაბიშვილი უკრაინის მშვიდობის სამიტის ფარგლებში მოლდოვის პრეზიდენტს, მაია სანდუსაც შეხვდა და ევროკავშირში გაწევრიანებასთან დაკავშირებით მოლაპარაკებების დაწყება მიულოცა.
“დარწმუნებული ვარ, რომ საქართველო, მოლდოვა და უკრაინა მალე ერთად განაგრძობენ სვლას ევროპულ გზაზე.” – წერს ზურაბიშვილი სოციალურ ქსელ X-ზე.
