პრესის საერთაშორისო ინსტიტუტი და 12 ორგანიზაცია მზია ამაღლობელის დაუყოვნებლივ გათავისუფლებას ითხოვს
მზია ამაღლობელის საქმე
პრესის საერთაშორისო ინსტიტუტი (IPI) და მედიის უფლებადამცველი 12 ორგანიზაცია, ერთობლივი განცხადებით მიმართავენ საქართველოს ხელისუფლებას და „ბათუმელებისა“ და „ნეტგაზეთის“ დამფუძნებლის, მზია ამაღლობელის დაუყოვნებლივ გათავისუფლებისკენ მოუწოდებენ.
„საქართველოს ხელისუფლებას მოვუწოდებთ, დაუყოვნებლივ და უპირობოდ გაათავისუფლოს ამაღლობელი და დაასრულოს მედიის მიმართ უპრეცედენტო ზეწოლა. ამასთან, მოვითხოვთ მზია ამაღლობელის მიმართ არასათანადო მოპყრობის საფუძვლიან გამოძიებას“, – ნათქვამია განცხადებაში.
🇬🇪IPI calls for immediate release of veteran Georgian journalist and founder and director of the online newspapers @Batumelebi_ge and @netgazeti @MAmaghlobeli. We demand a thorough investigation into mistreatment she endured.https://t.co/vGHqPTHSDn
— IPI – The Global Network for Independent Media (@globalfreemedia) January 23, 2025
განცხადებაში საუბარია მზია ამაღლობელის დაკავების გარემოებებზე, არასამთავრობო ორგანიზაციების შეფასებებსა და სასამართლო საქმის დეტალებზე. IPI მომხდარს თავისუფალ მედიაზე თავდასხმად აფასებს.
მზია ამაღლობელის დაკავება
დამოუკიდებელი ონლაინ გამოცემების, “ბათუმელებისა” და “ნეტგაზეთის” დამფუძნებელი და მედიამენეჯერი მზია ამაღლობელი 11-12 იანვრის ღამეს, ბათუმში, პოლიციის სამმართველოსთან მიმდინარე აქციაზე ორჯერ დააკავეს.
თავდაპირველად იგი დააკავეს პოლიციის შენობაზე სტიკერის გაკვრისთვის, რომელზეც ეწერა – “იფიცება საქართველო”. რამდენიმე საათში იგი გაათავისუფლეს ხელწერილის საფუძველზე. მაგრამ, მალევე მზია ამაღლობელი კვლავ დააკავეს პოლიციის უფროს ირაკლი დგებუაძისთვის სილის გაწვნის ფაქტზე. ინციდენტს წინ უძღოდა დაპირისპირება და ჭყლეტა მონაწილეებსა და პოლიციას შორის, რაც პოლიციის მხრიდან პროვოკაციული ქმედებებს მოჰყვა.
მზია ამაღლობელს სისხლის სამართლის დანაშაულს, პოლიციელზე თავდასხმას ედავებიან. მას 4-დან 7 წლამდე პატიმრობა ემუქრება. აღკვეთის ღონისძიების სახით მედიამენეჯერს წინასწარი პატიმრობა აქვს შეფარდებული. ქუთაისის სააპელაციო სასამართლომ მზია ამაღლობელისათვის აღკვეთის ღონისძიების შეცვლის შესახებ სარჩელი არ დააკმაყოფილა და ჟურნალისტი პატიმრობაში დატოვა.
რა ხდება ახლა
მზია ამაღლობელი შიმშილობს. მას ჯანმრთელობის პრობლემები აქვს. მისმა მეგობრებმა, კოლეგებმა და მხარდამჭერებმა ღია წერილით სთხოვეს შეწყვიტოს შიმშილობა.
“მე-11 დღეა შიმშილობ. გთხოვთ, შეაჩერო პროტესტის ეს უკიდურესი ფორმა. შენ ჩვენთვის და საზოგადოებისთვის ძალიან მნიშვნელოვანი ხარ, როგორც პროფესიონალი და როგორც ადამიანი. შენი ჯანმრთელობა და სიცოცხლე სასწორზე არ უნდა დადო, ერთად უნდა გავაგრძელოთ ბრძოლა, რომელსაც თითოეულ ჩვენგანზე, ჩვენს პროფესიაზე, ჩვენი ქვეყნის მოქალაქეებზე ამხელა გავლენა აქვს.
ყველანი შენ გვერდით ვართ, შენი მაგალითით გამხნევებულები და ძალამოცემულები, და გთხოვთ, იფიქრო საკუთარ ჯანმრთელობაზე, სიცოცხლეზე და მის მნიშვნელობაზე ჩვენთვის.
თავისუფლება ჩვენ შენთან ერთად გვჭირდება!“ – ეს წერილი ჟურნალისტებმა საჯაროდ წაიკითხეს 22 იანვარს, პარლამენტთან გამართულ, მზია ამაღლობელის მხარდამჭერ მორიგ აქციაზე.
23 იანვარს, მზია ამაღლობელმა, კოლეგებსა და გულშემატკივრებს, საქართველოს ახალგაზრდა იურისტთა ასოციაციის თავმჯდომარის, ნონა ქურდოვანიძის საშუალებით აცნობა, რომ ის “არ შიმშილობს იმისთვის, რომ ამის გამო რაიმე შეღავათი მიიღოს, შიმშილობს პროტესტისთვის უსამართლობის გამო”. მან კოლეგებს სთხოვა, ასეთი თხოვნებისგან თავი შეიკავონ, რადგან ეს მასზე ძალიან მოქმედებს:
,,დემოკრატია არ არის საჩუქარი, ჩვენმა საზოგადოებამ ეს ყველაზე კარგად იცის და ეს გამოჩნდა ახლაც. შიმშილობა რომ შევწყვიტო, ჩავთვლი, რომ თანაზიარი ვარ ამ უსამართლობის“
მზია ამაღლობელისადმი სოლიდარობის ნიშნად კიდევ რამდენიმე სინდისის პატიმარმა დაიწყო შიმშილობა. მათ შორის, ცნობილია რომ შიმშილობენ პროევროპული აქციებისას დაკავებული რეზო კიკნაძე და ნიკოლოზ ჯავახიშვილი. კიდევ ერთმა სინდისის პატიმარმა, ზვიად ცეცხლაძემ კი მზია ამაღლობელს სოლიდარობა ციხიდან წერილით გამოუცხადა.
„თუ ჩაქრება ჟურნალისტების ხმა, ჩაწყდება ჩვენი ხმაც. ჟურნალისტები არის ხიდი დღევანდელ ჯოჯოხეთსა და იმ სამშვიდობოს შორის, სადაც ჩვენი ქვეყანა უნდა გავიყვანოთ.
ჩემი სოლიდარობა მზია ამაღლობელს, როგორც ძლიერ ქალს და ძლიერ ჟურნალისტს,“- წერს ზვიად ცეცხლაძე.
მზია ამაღლობელის დაკავებას, საქართველოს მასშტაბით, მასშტაბური საპროტესტო აქციები და არაერთი გამოხმაურება მოჰყვა.
21 იანვარს ევროპის საბჭოს ჟურნალისტთა უსაფრთხოების პლატფორმამ მზია ამაღლობელის სისხლის სამართლის მუხლით დაკავების შესახებ განგაშის სიგნალი გამოსცა. 2025 წელს პლატფორმაზე აქტიურია 4 საგანგაშო სიგნალი ევროპის საბჭოს წევრ ქვეყნებში ჟურნალისტთა უსაფრთხოების შესახებ, აქედან ერთი ეხება უკრაინას, ხოლო სამი – საქართველოს.
„მზია ამაღლობელი და ივანიშვილის რეჟიმის ყველა პოლიტპატიმარი დაუყოვნებლივ უნდა გათავისუფლდეს! უნდა იყოს თავისუფალი და სამართლიანი არჩევნები!“ – დაწერა რესპუბლიკელმა კონგრესმენმა ჯო უილსონმა X-ზე მზია ამაღლობელის დაპატიმრებისთანავე.
უფლებადამცველი ორგანიზაციებისა და იურისტების შეფასებით, მზია ამაღლობელის დაკავება არის უსამართლო, უსაფუძვლო და დაუსაბუთებელი.
საქართველოს ახალგაზრდა იურისტთა ასოციაციაში, იმ ორგანიზაციაში, რომელიც მზია ამაღლობელის ინტერესებს იცავს, ამბობენ, რო მისი პატიმრობა და სისხლის სამართლებრივი დევნა უკანონოა და ატარებს პოლიტიკური რეპრესიის სახეს. საია ვრცელ შეფასებაში საუბრობს უკანონო ადმინისტრაციულ პატიმრობასა და უკანონო სისხლის სამართლებრივ დევნაზე, მის მიმართ არასათანადო მოპყრობაზე, მთელ რიგ პროცედურულ დარღვევებზე.
მზის ამაღლობელის საქმის გარშემო არსებული გარემოებების შესწავლის და შეფასების შემდეგ, “მედიის ადვოკატირების კოალიციამ” განაცხადა, რომ “მზია ამაღლობელის საქმე სცილდება ერთი ჟურნალისტის წინააღმდეგ მიმართულ რეპრესიას – ეს არის შეტევა დამოუკიდებელ მედიაზე, სამოქალაქო საზოგადოებასა და საქართველოს დემოკრატიულ მომავალზე:
“მისი დაპატიმრებით ქართული ოცნების რეჟიმი ცდილობს დააშინოს ყველა, ვინც ბედავს ხმის ამაღლებას უსამართლობის წინააღმდეგ“, – ნათქვამია განცხადებაში.
დღეს, 23 იანვარს, ოპოზიციონერმა პოლიტიკოსმა ქალებმა გენერალურ პროკურატურას მიმართეს, შეცვალოს “ბათუმელებისა” და “ნეტგაზეთის” დირექტორის, მზია ამაღლობელის მიმართ აღკვეთის ღონისძიება.
“მზია ამაღლობელი უკვე მე-12 დღეა, შიმშილობს და ეს უკვე საგანგაშო პერიოდია მისი ჯანმრთელობისათვის. ჩვენ, ქალი პოლიტიკოსები, კატეგორიულად მოვითხოვთ, რომ სასამართლოსთან შუამდგომლობით შევიდეს გენერალური პროკურატურა და შეცვალოს პატიმრობის მოთხოვნა. წინააღმდეგ შემთხვევაში, პროცესების ცუდად წარმართვის ვითარებაში, სრული პასუხისმგებლობა დაეკისრება, როგორც ამ შენობაში მყოფ ადამიანებს, ბიძინა ივანიშვილს, გენერალურ პროკურორს და ყველა ადამიანს, ვინც ამ პროცესშია მონაწილე”, – წაიკითხეს ოპოზიციონერმა ქალებმა პარლამენტის წინ.
მათ განაცხადეს, რომ შეადგინეს, წერილი, რომელსაც გაუგზავნიან საერთაშორისო თანამეგობრობას, ყველა იმ ორგანიზაციას, რომელიც მედიის თავისუფლებისა და ჟურნალისტთა უფლებებზე მუშაობს.
მზია ამაღლობელის საქმე
